వింత కోడలు.. విచిత్ర ఫ్యామిలీ! ఆస‌క్తి రేకెత్తిస్తున్న యామి కొత్త సినిమా

బాలీవుడ్‌లో కంటెంట్ ఓరియెంటెడ్ కథలతో ప్రత్యేక గుర్తింపు సంపాదించుకున్న యామి గౌత‌మ్ న‌య్యి న‌వెల్లి అనే ఆసక్తికరమైన ప్రాజెక్ట్‌తో ప్రేక్షకుల ముందుకు రానున్నారు. హార్రర్ కామెడీ జానర్‌లో రూపొందుతున్న ఈ కొత్త సినిమా ద్వారా యామి తన కెరీర్‌లో మరో కొత్త మలుపు తీసుకోబోతున్నారు. ముఖ్యంగా కథ, డైరెక్ష‌న్, ప్రొడక్షన్.. అన్నీ అంశాలు కలిసొచ్చే ఈ ప్రాజెక్ట్‌పై ఇండస్ట్రీలో మంచి ఆసక్తి నెలకొంది.

బాలాజీ మోహ‌న్ ద‌ర్శ‌క‌త్వంలో..

ఈ సినిమాను డైరెక్ట్ చేస్తున్నది బాలాజీ మోహ‌న్. ప్రత్యేకమైన నేరేషన్ స్టైల్, సున్నితమైన హ్యూమర్, మరియు రియలిస్టిక్ ఎమోషన్స్‌తో గుర్తింపు పొందిన బాలాజీ మోహన్.. ఈసారి హార్రర్ కామెడీని ఎలా ప్రెజెంట్ చేస్తార‌న్నది ఆసక్తికరంగా మారింది. ఆయన గత సినిమాల్లో కనిపించిన ఎమోషన్స్, లైట్ హ్యూమర్ ఈ సినిమాలో కూడా కీలక పాత్ర పోషించ‌నున్నాయి. అదే సమయంలో కథలోని మిస్టరీ ఎలిమెంట్స్‌కు ఆయన ఎలాంటి ట్రీట్‌మెంట్ ఇస్తారన్నది ఇప్పుడు ఈ సినిమాకు హైలైట్‌గా మారొచ్చు.

కంటెంట్ ఓరియెంటెడ్ సినిమాల‌కు క్వీన్ గా గుర్తింపు

ఇక యామి గౌతమ్ విషయానికొస్తే తన కెరీర్‌ను పూర్తిగా కంటెంట్ ఆధారంగా మలుచుకున్న న‌టిగా పేరు తెచ్చుకున్నారు. కమర్షియల్ సినిమాల కంటే, పాత్రకు ప్రాధాన్యం ఉన్న కథలనే ఎంచుకుంటూ వస్తున్న ఆమె, కంటెంట్ ఓరియెంటెడ్ సినిమాలకు క్వీన్ గా పేరు తెచ్చుకున్నారు. ఈ కొత్త ప్రాజెక్ట్ కూడా అదే దారిలో కొనసాగుతుందని తెలుస్తోంది. ఒక సాధారణ కోడలిగా కనిపించే పాత్రలోనే యామి ఈసారి భిన్నమైన షేడ్స్‌ను చూపించ‌నున్నారు.

త‌ర‌చూ వార్త‌ల్లో యామి పేరు

అయితే, యామి గౌతమ్ గురించి చర్చల్లో తరచుగా వినిపించే మరో అంశం ఆమె వ్యక్తిగత జీవితం. ప్రముఖ డైరెక్ట‌ర్ ఆదిత్య ధ‌ర్ భార్యగా గుర్తింపు ఉన్నప్పటికీ, యామి తన కెరీర్‌ను పూర్తిగా తన టాలెంట్‌తోనే నిలబెట్టుకున్నారు. ఈ సినిమా కూడా ఆమె వ్యక్తిగత గుర్తింపును మరింత బలపరిచే అవకాశముందని సినీ విశ్లేషకులు అభిప్రాయపడుతున్నారు. ప్రొడక్షన్ పరంగా కూడా ఈ సినిమా బలమైన టీమ్‌ను కలిగి ఉంది. ప్రముఖ నిర్మాత ఆనంద్ ఎల్. రాయ్, హిమాన్షు శ‌ర్మ ఈ ప్రాజెక్టును నిర్మిస్తుండ‌గా, అమెజాన్ ఎంజీఎం స్టూడియోస్ ఈ మూవీని స‌మ‌ర్పిస్తోంది.

ఈ సినిమా కథ విషయానికి వస్తే ఒక గందరగోళంగా ఉన్న కుటుంబంలోకి అడుగుపెట్టిన ఒక అమ్మాయి, ఆ ఇంటిని పూర్తిగా మార్చేస్తుంది. కానీ ఆమె నిజంగా ఆదర్శ కోడలేనా? లేక వేరే లోకం నుంచి వచ్చిన దుష్ట శక్తా? అనే సందేహం కుటుంబ సభ్యుల్లో ఒకరికి కలుగుతుంది. ఈ అనుమానం చుట్టూ తిరిగే కథ, హార్రర్ మరియు కామెడీ మేళవింపుతో సాగుతుంది. మొత్తానికి బలమైన కథ, మంచి అనుభవజ్ఞుడైన దర్శకుడు, నమ్మకమైన ప్రొడక్షన్ టీమ్, మరియు కంటెంట్‌పై దృష్టి పెట్టే యామి గౌతమ్.. ఈ ప్రాజెక్ట్‌పై అంచనాలు పెంచుతున్నాయి.