పూరి సేతుపతి.. జెట్ స్పీడ్ లోనే..

ఈ రోజుల్లో ఒక సినిమా మొదలయిందంటే చాలు.. అది రిలీజ్ అయ్యేసరికి ఎన్నాళ్లు పడుతుందో చెప్పడం కష్టం. ఇక అది 'పాన్ ఇండియా' సినిమా అయితే మినిమమ్ రెండేళ్లు ఫిక్స్ అవ్వాల్సిందే. కానీ టాలీవుడ్ లో ఒక డైరెక్టర్ మాత్రం ఈ రూల్స్ కి అతీతం. ఆయనే డాషింగ్ డైరెక్టర్ పూరీ జగన్నాథ్. లైగర్, డబుల్ ఇస్మార్ట్ ఫలితాలు ఎలా ఉన్నా, ఆయన మేకింగ్ స్పీడ్ మాత్రం ఎప్పుడూ తగ్గదు. ఇప్పుడు విజయ్ సేతుపతి సినిమాతో అది మరోసారి ప్రూవ్ అయ్యింది.

అసలు ఈ ప్రాజెక్ట్ ఎప్పుడు స్టార్ట్ అయ్యింది? ఎప్పుడు షూటింగ్ అయిపోయింది? అని జనాలు ఆశ్చర్యపోయేలా ప్లానింగ్ సాగింది. జూన్ నెలలో ఈ క్రేజీ కాంబినేషన్ సెట్స్ పైకి వెళ్లింది. కట్ చేస్తే.. నవంబర్ ఎండింగ్ కల్లా షూటింగ్ మొత్తం పూర్తయిపోయింది. కేవలం ఐదు నెలల్లో.. అదీ విజయ్ సేతుపతి లాంటి బిజీ పాన్ ఇండియా స్టార్ డేట్స్ ని పక్కాగా వాడుకుని సినిమాను ఫినిష్ చేయడం అంటే మామూలు విషయం కాదు.

ప్రస్తుతం మన ఇండస్ట్రీలో స్టార్ హీరోల సినిమాలు ఏళ్ల తరబడి షూటింగ్ జరుపుకుంటున్నాయి. పుష్ప, గేమ్ చేంజర్, దేవర లాంటి సినిమాలు ఎంత టైం తీసుకున్నాయో చూస్తున్నాం. ఇలాంటి టైమ్ లో పూరీ జగన్నాథ్ జూన్ నుంచి నవంబర్ లోపు ఒక భారీ యాక్షన్ ఎంటర్టైనర్ ను చుట్టేయడం నిజంగా గ్రేట్ అనే చెప్పాలి. బడ్జెట్ కంట్రోల్ లో ఉండాలన్నా, హీరోల కాల్షీట్స్ వేస్ట్ కాకూడదన్నా ఈ స్పీడ్ చాలా ముఖ్యం.

ఈ సినిమా షూటింగ్ చివరి రోజు సెట్స్ లో ఎమోషనల్ సీన్స్ కనిపించాయి. నిర్మాత ఛార్మి వీడియో కాల్ చేసి మాట్లాడగా.. "పూరీ గారిని మిస్ అవుతాను" అంటూ విజయ్ సేతుపతి ఎమోషనల్ అయ్యారు. కేవలం ఐదు నెలలే అయినా, వీరి మధ్య బాండింగ్ ఎంత స్ట్రాంగ్ గా ఏర్పడిందో దీన్ని బట్టి అర్థం చేసుకోవచ్చు. పూరీ కూడా సేతుపతితో వర్క్ చేయడం హ్యాపీగా ఉందని చెప్పారు. దీన్ని బట్టి అవుట్ పుట్ కూడా అంతే పర్ఫెక్ట్ గా వచ్చి ఉంటుందని అంచనా వేస్తున్నారు.

ఇక ఈ సినిమాలో కేవలం విజయ్ సేతుపతి మాత్రమే కాదు.. సీనియర్ నటి టబు, దునియా విజయ్, హీరోయిన్ గా సంయుక్త మీనన్ వంటి భారీ తారాగణం ఉంది. ఇంతమంది ఆర్టిస్టుల డేట్స్ ని మేనేజ్ చేస్తూ, అనుకున్న టైమ్ కి గుమ్మడికాయ కొట్టడం పూరీ మార్క్ స్క్రీన్ ప్లేకి నిదర్శనం. త్వరలోనే ఈ మూవీ ఫస్ట్ లుక్ ని రిలీజ్ చేయడానికి ప్లాన్ చేస్తున్నారు.

మొత్తానికి పూరీ జగన్నాథ్ మళ్ళీ తన పాత పంథాలోకి వచ్చేశారనిపిస్తుంది. హిట్టు ప్లాపులతో సంబంధం లేకుండా, చకచకా సినిమాలు తీసే ఆ ఎనర్జీ మళ్ళీ కనిపిస్తోంది. ఐదు నెలల్లో తీసిన ఈ సినిమా, స్క్రీన్ మీద ఏ రేంజ్ మ్యాజిక్ చేస్తుందో చూడాలి.