విజ‌య్‌- సంగీత జంట‌కే కాదు గ‌తంలోను ప‌లువురు నాయ‌కుల‌కు ఇదే ముస‌లం!

తమిళనాడు ముఖ్యమంత్రి, తమిళగ వెట్రి కళగం (TVK) అధినేత సి. జోసెఫ్ విజయ్ .. ఆయన భార్య సంగీత స్వర్ణలింగం విడాకుల వ్యవహారం చెంగల్‌పట్టు కుటుంబ న్యాయస్థానంలో ఉపసంహరణతో అధికారికంగా ముగిసింది. వీడియో కాన్ఫరెన్స్ ద్వారా విచారణకు హాజరైన సంగీత తన పిటిషన్‌ను వెనక్కి తీసుకోవడానికి గల కారణాలను కోర్టుకు విన్నవించగా శుక్రవారం కేసును పూర్తిగా మూసివేశారు. ఫిబ్రవరిలో దాఖలైన ఈ పిటిషన్‌లో శాశ్వత జీవనభృతి.. నీలాంగరై నివాస హక్కులు కోరినా.. తీవ్ర రాజకీయ ప్రాధాన్యత ఉన్న సమయంలో విజయ్ ప్రతిష్టకు భంగం కలగకుండా ఈ వివాదాన్ని సౌమ్యంగా ముగించినట్లు కనిపిస్తోంది.

1999లో వివాహ బంధంతో ఒకటైన ఈ జంట దాదాపు మూడు దశాబ్దాల పయనం తర్వాత విడిపోతున్నారనే వార్తలు అభిమానులను ఆందోళనకు గురిచేశాయి. 2023 నుంచి పలు వేడుకల్లో ముఖ్యంగా టీవీకే పార్టీకి చెందిన కీల‌క సదస్సుల్లో సంగీత గైర్హాజరు కావడంతో వైవాహిక బంధంలో విభేదాలు ఉన్నాయనే వార్తలకు బలం చేకూరింది. అయితే విజయ్ రాజకీయంగా ఉన్నత పదవిని చేపట్టి టీవీకే నాయకత్వంలో కాంగ్రెస్, వామపక్షాల కూటమితో కలిసి తమిళనాడులో సరికొత్త పాలనకు శ్రీకారం చుట్టిన ఈ తరుణంలో ఈ కేసు ముగియడం ఊరటనిచ్చే అంశం.

భారతీయ రాజకీయ చరిత్రలో పదవులు చేపట్టే ముందు లేదా అధికారంలో ఉన్న సమయంలో నాయకులు ఇలాంటి తీవ్రమైన వైవాహిక, కుటుంబ ఆరోపణలు ఎదుర్కోవడం ఇది మొదటిసారి కాదు. గతంలో పలువురు అగ్ర నాయకులు తమ రాజకీయ ఎదుగుదల సమయంలో భార్య లేదా కుటుంబ సభ్యుల నుండి బహిరంగ ఆరోపణలు.. చట్టపరమైన సవాళ్లు ఎదుర్కొన్నారు. కీలకమైన ఎన్నికలు లేదా పదవీ స్వీకార సమయాల్లో ఇటువంటి వ్యక్తిగత వివాదాలు మీడియాలో హెడ్‌లైన్స్‌గా మారి రాజకీయాన్ని తీవ్రంగా ప్రభావితం చేసిన సందర్భాలు ఉన్నాయి.

అయితే అధికారం దక్కించుకున్న తర్వాత లేదా ప్రజాదరణ శిఖరాగ్రానికి చేరిన వేళ అనేక సందర్భాల్లో ఈ రకమైన వివాదాలు సమసిపోవడం లేదా వార్తల నుంచి మాయమవ్వడం మనం చూస్తుంటాం. గతంలో సమాజ్‌వాదీ పార్టీ, ప్రాంతీయ పార్టీల నాయకులు లేదా జాతీయ స్థాయి నేతల విషయంలోనూ అంతర్గత వైరివర్గాలు సమసిపోవడం... లేదంటే సామరస్యపూర్వక ఒప్పందాలు కుదరడం ద్వారా విడాకుల పుకార్లకు చెక్ పడింది. రాజకీయ వ్యవస్థలో అధికారం, బాధ్యతలు పెరిగినప్పుడు కుటుంబాలు సైతం బహిరంగ వివాదాల కంటే అంతర్గత చర్చలకే ప్రాధాన్యత ఇస్తాయనడానికి ఇవన్నీ నిదర్శనాలు.

రాజకీయంగా ఎంతో బాధ్యతాయుతమైన ముఖ్యమంత్రి పీఠంపై ఉన్న విజయ్‌కు ఈ వ్యక్తిగత వివాదం సుఖాంతం కావడం మానసికంగా పెద్ద ఉపశమనం. కుటుంబ సమస్యల చిక్కుముడులు విడిపోవడంతో ఆయన ఇకపై పాలనపైనా.. అలాగే కూటమి ప్రభుత్వాన్ని విజయవంతంగా నడిపించడంపైనే దృష్టి సారించే అవకాశం లభించింది. ప్రజా జీవితంలో ఉన్న నాయకులకు వ్యక్తిగత వివాదాలు ముగిసిపోవడం అనేది వారి రాజకీయ పయనాన్ని మరింత స్థిరంగా ముందుకు తీసుకెళ్లడానికి దోహదపడుతుంది.