పోలీసుల ఆంక్షలు.. ఇబ్బంది పడొద్దని 'విరోష్' పిలుపు!

విజయ్ దేవరకొండ - రశ్మిక మందన్న (విరోష్‌) వివాహ వేడుకలు అత్యంత ఘనంగా ముగిశాయి. ఇండియాలోనే క్రేజీ వెడ్డింగ్ ఈవెంట్‌గా నిలిచిన ఈ వేడుక దేశవ్యాప్తంగా ప్రతి ఒక్కరి దృష్టిని ఆకర్షించింది. ఈ క్రమంలోనే హైదరాబాద్‌లో జరగనున్న వీరి వెడ్డింగ్ రిసెప్షన్ కోసం ఏర్పాట్లు ముమ్మరంగా సాగుతున్నాయి. అయితే ఈ వేడుకకు సంబంధించి 'విరోష్' టీమ్ తాజాగా అభిమానుల సంక్షేమం కోసం ఒక‌ విజ్ఞప్తి చేసింది.

హైదరాబాద్‌లోని ప్రముఖ ఫైవ్ స్టార్ హోటల్ లేదా కన్వెన్షన్ సెంటర్ లో ఈ నెల 4వ తేదీ సాయంత్రం జ‌ర‌గ‌నున్న‌ రిసెప్షన్ కి కొన్ని ఆంక్ష‌లు ఉన్నాయ‌ని పెళ్ల‌యిన జంట పేర్కొంది. ఈ వేడుకకు కేవలం పరిమిత సంఖ్యలోనే అతిథులను ఆహ్వానించామ‌ని తెలిపారు. సుమారు 500 నుండి 800 మంది అత్యంత సన్నిహితులు, కుటుంబ సభ్యులు, సినీ పరిశ్రమకు చెందిన ప్రముఖులు మాత్రమే ఈ వేడుకలో పాల్గొంటారని ఒక అంచనా. ఆహ్వానితుల సంఖ్యను విరోష్ త‌క్కువ‌గా ఉండాల‌ని కోరుకున్నారు. అయినా అంద‌రి ర‌క్ష‌ణ కోసం భద్రతా పరమైన చర్యలను పోలీసులు కట్టుదిట్టం చేశారు.

విజయ్ దేవరకొండ, రశ్మికలకు ఉన్న విపరీతమైన క్రేజ్ దృష్ట్యా వేలాదిగా అభిమానులు తరలివచ్చే అవకాశం ఉందని నిఘా వర్గాలు హెచ్చరించాయి. దీంతో క్రౌడ్ గ్యాథరింగ్ పై పోలీసులు హై అలెర్ట్ ప్రకటించారు. హోటల్ పరిసర ప్రాంతాల్లో ట్రాఫిక్ ఇబ్బందులు కలగకుండా, ఎటువంటి అవాంఛనీయ సంఘటనలు జరగకుండా బారికేడ్లను ఏర్పాటు చేస్తున్నారు. కేవలం అధికారిక ఆహ్వాన పత్రిక ఉన్న వారిని మాత్రమే వేదిక లోపలికి అనుమతిస్తామని పోలీసులు స్పష్టం చేశారు.

పోలీసుల ఆంక్షల నేపథ్యంలో విరోష్ టీమ్ కూడా సోషల్ మీడియా వేదికగా అభిమానులకు కీలక సూచనలు చేసింది. మీ భద్రత, క్షేమమే మాకు ముఖ్యం. పోలీసుల నిబంధనల ప్రకారం పరిమిత సంఖ్యలో మాత్రమే అతిథులను ఆహ్వానించాం. కాబట్టి ఇన్విటేషన్ లేని వారు ఎవరూ వేదిక వద్దకు వచ్చి ఇబ్బంది పడవద్దు! అని విజ్ఞప్తి చేశారు. అభిమానుల తాకిడి పెరిగితే భద్రత పరంగా సవాలు ఎదురవుతుందని అందుకే ఈ నిర్ణయం తీసుకున్నట్లు తెలిపారు.

మీరు ఎక్కడున్నా మీ ఆశీస్సులు అందుతాయని, ఆహ్వానం లేని వారు వచ్చి ఇబ్బందుల పాలు కావొద్దని విజయ్-రశ్మిక జంట కోరుతోంది. భారీ ఎత్తున జనం గుమిగూడటం వల్ల భద్రతా విధులకు ఆటంకం కలగడమే కాకుండా.. అభిమానులు కూడా తోపులాటలో గాయపడే అవకాశం ఉందని పోలీసులు హెచ్చరిస్తున్నారు. అందుకే `నో ఇన్విటేషన్ - నో ఎంట్రీ` అనే నిబంధనను కఠినంగా అమలు చేయబోతున్నారు.

మొత్తానికి `విరోష్` వెడ్డింగ్ రిసెప్షన్ తక్కువ మంది సమక్షంలో ప్రైవేట్ వేడుకగా జరగబోతోంది. అభిమానులు ఈ జంటపై ఉన్న ప్రేమతో ఇంటి వద్ద నుండే తమ శుభాకాంక్షలు తెలపాలని టీమ్ కోరుతోంది. పోలీసుల సహకారంతో ఈ గ్రాండ్ రిసెప్షన్‌ను ఎటువంటి అడ్డంకులు లేకుండా పూర్తి చేయడానికి సర్వం సిద్ధమైంది.