విజయ్ 'రణబాలి' సేఫ్ ప్రాజెక్టేనా?

విజయ్ దేవరకొండ కెరీర్ లో ఒక సాలిడ్ హిట్ కొట్టాలని మైత్రీ మూవీ మేకర్స్ ఎంతో ప్రతిష్టాత్మకంగా తీసిన సినిమా రణబాలి. పీరియాడిక్ బ్యాక్ డ్రాప్, భారీ బడ్జెట్, దానికి తోడు పెళ్లి తర్వాత విజయ్ రష్మిక కలిసి నటించిన సినిమా కావడంతో రిలీజ్ కు ముందు ఊహించని హైప్ క్రియేట్ అయింది. థియేటర్లలోకి వచ్చాక సక్సెస్ వేడుకలు కూడా గ్రాండ్ గానే నిర్వహించారు.

కానీ కలెక్షన్ల విషయంలో నిర్మాత రవిశంకర్ లేటెస్ట్ గా చేసిన కామెంట్స్ చూస్తుంటే.. భారీ లాభాల కంటే బయ్యర్లను సేఫ్ జోన్ లోకి తీసుకురావడానికే మేకర్స్ ఎక్కువ ప్రాధాన్యం ఇస్తున్నట్లు ట్రేడ్ వర్గాల్లో టాక్ మొదలైంది. రణబాలి దాదాపు అన్ని ఏరియాల్లో బ్రేక్ ఈవెన్ మార్క్ కు చేరుకుందని రవిశంకర్ రీసెంట్ గా ప్రకటించారు. అంటే ఈ సినిమాను కొన్న డిస్ట్రిబ్యూటర్లకు పెట్టిన పెట్టుబడి వెనక్కి వస్తుందన్న మాట.

విజయ్ మార్కెట్ ను నెక్స్ట్ లెవెల్ కు తీసుకెళ్లాలనే ఉద్దేశ్యంతో దర్శకుడు రాహుల్ సంకృత్యన్ ను నమ్మి మైత్రీ సంస్థ విదేశీ నటులు, భారీ యాక్షన్ సెట్స్ తో పెద్ద రిస్కే చేసింది. కానీ ఆ స్థాయి పాన్ ఇండియా ప్రాజెక్ట్ కు సంబంధించి కేవలం బ్రేక్ ఈవెన్ దగ్గరే నిర్మాత సంతృప్తి పడటం చూస్తుంటే, సినిమా అసలు అనుకున్న రేంజ్ బాక్సాఫీస్ టార్గెట్ ను రీచ్ కాలేదా అనే సందేహాలు వ్యక్తమవుతున్నాయి.

లైగర్, కింగ్ డమ్ లాంటి పరాజయాల తర్వాత విజయ్ దేవరకొండకు బాక్సాఫీస్ దగ్గర తన స్టామినా ఏంటో ప్రూవ్ చేసుకోవడానికి ఒక భారీ బ్లాక్ బస్టర్ చాలా అవసరం. పైగా రియల్ లైఫ్ కపుల్ గా మారిన తర్వాత విజయ్ రష్మిక స్క్రీన్ షేర్ చేసుకోవడం కూడా సినిమాకు పెద్ద అడ్వాంటేజ్ గా మారింది. కానీ రిలీజ్ రోజే కొద్దిగా మిక్స్డ్ టాక్ రావడంతో ఆ ఓపెనింగ్ క్రేజ్ ను పూర్తిగా భారీ వసూళ్లుగా మార్చుకోవడంలో రణబాలి కాస్త తడబడిందనే చెప్పాలి.

ట్రేడ్ వర్గాల అంచనాల ప్రకారం మొదటి తొమ్మిది రోజుల్లో రణబాలి ప్రపంచవ్యాప్తంగా 70 కోట్లకు పైగా గ్రాస్ వసూలు చేసింది. మొదటి రోజు ఇండియాలో 9.25 కోట్ల నెట్ తో ఓపెన్ అయిన ఈ సినిమా, రెండో వీకెండ్ శనివారం నాటికి 2.80 కోట్ల నెట్ కు పడిపోయింది. నిర్మాత చెప్పిన బ్రేక్ ఈవెన్ లెక్కలు ఏరియాల వారీగా షేర్స్ రూపంలో బయటకు వస్తే కానీ అసలు బిజినెస్ పరిస్థితిపై పూర్తి క్లారిటీ రాదు. దసరా సెలవుల అడ్వాంటేజ్ తో ఇక్కడిదాకా లాక్కొచ్చిన ఈ పీరియాడిక్ డ్రామా బాగానే కొనసాగుతోంది. ఇక సెలవులు అయిపోయాక సోమవారం నుంచి వీక్ డేస్ లో అసలు ఛాలెంజ్ మొదలవుతుంది. థియేటర్లలో ఏ మేర నిలబడుతుందనే దానిపైనే మిగిలిన బయ్యర్ల అసలైన రికవరీ ఆధారపడి ఉంది.