3D యానిమేషన్ మూవీ 'వాయుపుత్ర'.. ఆ పండక్కి రిలీజ్..
ఇటీవల ప్రేక్షకుల ముందుకు వచ్చిన 3డీ యానిమేషన్ చిత్రం మహావతార్ నరసింహ ఎలాంటి హిట్ అయిందో అందరికీ తెలిసిందే.
By: M Prashanth | 10 Sept 2025 12:42 PM IST
ఇటీవల ప్రేక్షకుల ముందుకు వచ్చిన 3డీ యానిమేషన్ చిత్రం మహావతార్ నరసింహ ఎలాంటి హిట్ అయిందో అందరికీ తెలిసిందే. కేవలం రూ.40 కోట్ల బడ్జెట్ తో రూపొందిన ఆ సినిమా.. ఇప్పటి వరకు రూ.300 కోట్లకు పైగా కలెక్షన్స్ సొంతం చేసుకుని సత్తా చాటుతోంది. ఎలాంటి అంచనాలు లేకుండా రిలీజ్ అయ్యి.. ఇప్పుడు అనేక రికార్డులు కొల్లగొడుతోంది.
అయితే కన్నడ సినీ ఇండస్ట్రీ నిర్మించిన ఆ సినిమా పాన్ ఇండియా రేంజ్ లో అదరగొడుతోంది. ఇప్పుడు టాలీవుడ్ లో కూడా యానిమేషన్ చిత్రాల సందడి మొదలైంది. ప్రముఖ సితార ఎంటర్టైన్మెంట్స్ సంస్థ 3డీ యానిమేషన్ వాయుపుత్ర సినిమా నిర్మిస్తున్నట్లు ప్రకటించింది. ఫస్ట్ లుక్ పోస్టర్, రిలీజ్ మంత్ ను కూడా అనౌన్స్ చేసింది.
సితార ఎంటర్టైన్మెంట్స్ బ్యానర్ పై నాగవంశీ నిర్మిస్తున్న ఆ సినిమాను చందు మొండేటి తెరకెక్కిస్తున్నారు. డివోషనల్ జోనర్ లో కార్తికేయ మూవీతో మంచి హిట్ అందుకున్న ఆయన ఇప్పుడు వాయుపుత్ర మూవీ చేస్తుండడం విశేషం. 2026 దసరా సందర్భంగా తెలుగు, హిందీ, తమిళం, మలయాళం, కన్నడ భాషల్లో పాన్ ఇండియా రేంజ్ లో రిలీజ్ కానుంది చిత్రం.
అయితే వాయుపుత్ర అనౌన్స్మెంట్ పోస్టర్ ఇప్పుడు సోషల్ మీడియాలో వైరల్ గా మారి.. ఓ రేంజ్ లో అందరినీ ఆకట్టుకుంటోంది. హనుమంతుడు కొండపై నిలబడి, దహనమవుతున్న లంకను చూస్తున్న పవర్ ఫుల్ పోస్టర్.. సినిమా ద్వారా మేకర్స్ అందించాలనుకుంటున్న ఇతిహాస స్థాయి, ఆధ్యాత్మిక లోతును ఆడియన్స్ కు క్లియర్ గా అర్థమయ్యేలా చెబుతోంది.
కేవలం సినిమా కాదు, థియేటర్లను దేవాలయాలుగా మార్చే పవిత్ర దృశ్యంగా కనిపిస్తోంది. మునుపెన్నడూ లేని విధంగా భక్తి పారవశ్యంలో ఆడియన్స్ ను ముంచేయడానికి సిద్ధమవుతున్నట్లు కనిపిస్తోంది. వాయుపుత్ర ఒక సినిమాటిక్ మైల్ స్టోన్ గా మారనున్నట్లు అర్థమవుతోంది. భారీ స్థాయిలో 3D యానిమేషన్ చిత్రంగా సందడి చేయనుంది వాయుపుత్ర మూవీ.
అయితే చందూ మొండేటి దర్శకత్వంలో.. నాగవంశీ నిర్మిస్తున్న ఆ చిత్రం.. చరిత్ర, భక్తి, ఆధునిక దృశ్యాల ఉత్కంఠభరితమైన కలయికను హామీ ఇస్తుంది. డైరెక్టర్ గా చందూ మొండేటి దార్శనికత, నిర్మాతగా నాగవంశీ నైపుణ్యంతో వాయుపుత్ర భారతీయ సినిమాను మరింత ఎత్తుకు తీసుకెళ్లేందుకు సిద్ధమవుతున్నట్లు ఉంది.
కాగా, మన చరిత్ర, ఇతిహాసాల్లో వాయుపుత్రుడు హనుమంతుడు ప్రత్యేక స్థానాన్ని కలిగి ఉన్నారు. సప్త చిరంజీవుల్లో ఒకరైన హనుమంతుడు.. తన బలం, భక్తితో కాలాన్ని అధిగమించిన శాశ్వత యోధుడు. అలాంటి గొప్ప యోధుడు కథతో వాయుపుత్ర చిత్రం రూపొందుతోంది. మరి సినిమా ఎలాంటి అద్భుతాలు సృష్టిస్తుందో వేచి చూడాలి.