త్రివిక్ర‌మ్‌కు అప్ప‌టి బ‌ల‌మే ఇప్పుడు బ‌ల‌హీనతగా మార‌నుందా?

తెలుగు సినీ పరిశ్రమలో ప్రతి దర్శకుడికీ ఒక్కో ప్రత్యేకమైన పని విధానం ఉంటుంది. కొందరు షూటింగ్ ప్రారంభానికి ముందే ఫుల్ స్క్రిప్ట్‌ను రెడీ చేసుకుని సెట్స్‌కు వెళ్తే, మరికొందరు షూటింగ్ టైమ్ లో కొన్ని సీన్స్ ను మెరుగుపరుస్తూ ముందుకు సాగుతారు. ఇందులో రెండో కోవకు చెందిన డైరెక్ట‌ర్ల‌లో త్రివిక్రమ్ శ్రీనివాస్ ఉంటారు. సెట్స్‌పైకి వెళ్లిన తర్వాతే కొన్ని కొత్త ఆలోచనలు త్రివిక్రమ్‌కు వస్తాయని, వాటి ఆధారంగా సీన్స్ లేదా డైలాగులు మార్చ‌డం ఆయనకు కొత్త కాదని ఆయ‌న‌తో ప‌నిచేసిన ప‌లువురు న‌టులు, టెక్నిక‌ల్ టీమ్ చెప్తూ ఉంటారు.

ఈ విధానం గతంలో ఆయనకు ఎన్నో స‌క్సెస్‌ల‌ను సైతం తీసుకొచ్చింది. ఆడియ‌న్స్ ను ఆకట్టుకున్న అనేక సీన్స్ కూడా చివరి నిమిషంలో రూపుదిద్దుకున్నవేనని ఇండస్ట్రీ వర్గాల్లో తరచూ వినిపించే మాట. అందుకే త్రివిక్రమ్ తన క్రియేటివ్ ఇన్‌స్టింక్ట్‌ను బలంగా నమ్మే డైరెక్ట‌ర్ గా గుర్తింపు పొందారు. కథను పుస్తకంలా ఫిక్స్ చేయడం కంటే, సెట్స్‌లో పరిస్థితులు, యాక్ట‌ర్ల పెర్ఫార్మెన్స్‌లు, సీన్స్ ఫ్లో ను బట్టి మార్పులు చేయడంలో ఆయనకు ప్రత్యేకమైన నమ్మకం ఉంది.

అయితే ప్రస్తుతం వెంకటేష్ హీరోగా రూపొందుతున్న ఆదర్శ కుటుంబం విషయంలో ఇదే అలవాటు చర్చనీయాంశంగా మారుతోంది. షూటింగ్ జరుగుతున్న టైమ్ లో కూడా కథ, సీన్స్ లో మార్పులు చోటుచేసుకుంటున్నాయనే ప్రచారం ఇండస్ట్రీలో వినిపిస్తోంది. ఈ మార్పులు సినిమాను మరింత బలోపేతం చేసే ప్రయత్నమా? లేక నిర్మాణ ప్రక్రియపై అదనపు ఒత్తిడి సృష్టిస్తున్నాయా? అన్నదే ఇప్పుడు ఆసక్తికరమైన ప్రశ్నగా మారింది.

వాస్తవానికి త్రివిక్రమ్ ఒక్కరే ఇలా పనిచేసే డైరెక్ట‌ర్ కాదు. భారతీయ సినీ పరిశ్రమలో పలువురు ప్రముఖ దర్శకులు కూడా సెట్స్‌పైనే స్క్రిప్ట్‌ను తిరిగి పరిశీలించడం, కొత్త సీన్స్ ను యాడ్ చేయ‌డం, డైలాగులను మార్చడం వంటి విధానాలను అనుసరిస్తూ ఉంటారు. కొన్నిసార్లు అవే సినిమాలకు పెద్ద ప్లస్‌గా మారాయి. ఆడియ‌న్స్ గుర్తుంచుకునే ఎన్నో క్లాసిక్ సీన్స్ కూడా ఇలాంటి ప్రక్రియలోనే పుట్టుకొచ్చాయి.

కానీ ప్రతి సందర్భంలో అదే రిజ‌ల్ట్ వ‌స్తుంద‌నే గ్యారెంటీ మాత్రం లేదు. ముఖ్యంగా భారీ అంచనాల మధ్య తెరకెక్కుతున్న సినిమాల‌ విషయంలో రెగ్యుల‌ర్ మార్పులు స్క్రీన్ ప్లే లోని క్లారిటీని ప్రభావితం చేసే అవకాశం కూడా ఉంటుంది. ఇటీవల కొన్ని పెద్ద సినిమాల విషయంలో వచ్చిన విమర్శలు కూడా ఈ అంశాన్ని గుర్తు చేస్తున్నాయి. దీంతో ఇప్పుడంద‌రి దృష్టి ఆదర్శ కుటుంబం పైనే ఉంది. త్రివిక్రమ్ నమ్ముతున్న ఈ క్రియేటివ్ ప్రాసెస్ మరోసారి మ్యాజిక్ చేస్తుందా? లేక అదే విధానం ఈసారి సవాలుగా మారుతుందా? అన్నది సినిమా రిలీజైన తర్వాతే తేలనుంది. అయితే ఒక విషయం మాత్రం స్పష్టంగా కనిపిస్తోంది. ప్రస్తుతం ఈ సినిమాపై జరుగుతున్న డిస్క‌ష‌న్స్ లో కథ కంటే ఎక్కువగా త్రివిక్రమ్ పని విధానమే హాట్ టాపిక్‌గా మారింది.