త్రివిక్రమ్.. గ్యాప్ వస్తే గొడవేనా..

సినీ ఇండస్ట్రీలో సక్సెస్ ఫుల్ కాంబినేషన్లకు ఉండే క్రేజ్ వేరు. ఒకసారి ఆ మ్యాజిక్ వర్కవుట్ అయితే, ఆ దర్శక, నిర్మాతలు అదే పనిగా ఆ కాంబోను రిపీట్ చేయడానికి ఇష్టపడతారు. మాటల మాంత్రికుడు త్రివిక్రమ్ శ్రీనివాస్, మ్యూజిక్ సెన్సేషన్ తమన్ కాంబినేషన్ గత కొన్నేళ్లుగా టాలీవుడ్ లో మ్యూజికల్ గా దుమ్మురేపింది. అల వైకుంఠపురములో నుంచి గుంటూరు కారం వరకు వీరి ప్రయాణం సూపర్ హిట్ గా సాగింది. కానీ ఇప్పుడు సడెన్ గా త్రివిక్రమ్ రూట్ మార్చడం చర్చనీయాంశమైంది.

తమన్‌ను పక్కన పెట్టి త్రివిక్రమ్ కొత్త మ్యూజిక్ డైరెక్టర్ల వైపు చూస్తున్నారని వార్తలు వస్తున్నాయి. వెంకటేశ్ తో చేయబోయే సినిమాకు హర్షవర్ధన్ రామేశ్వర్ ను, ఎన్టీఆర్ సినిమాకు అనిరుధ్ ను ఎంచుకున్నట్లు టాక్. దీంతో సోషల్ మీడియాలో రకరకాల రూమర్స్ పుట్టుకొచ్చాయి. గతంలో దేవి శ్రీ ప్రసాద్ తో క్రియేటివ్ డిఫరెన్సెస్ కారణంగానే తమన్ కు ఫిక్స్ అయ్యారని, ఇప్పుడు తమన్ తో కూడా అలాగే చెడిందా అని కొందరు గుసగుసలాడుకుంటున్నారు.

అయితే ఇండస్ట్రీ వర్గాల సమాచారం ప్రకారం ఇందులో ఎలాంటి గొడవలు లేవని తెలుస్తోంది. త్రివిక్రమ్ అంటేనే ఎంతో హుందాగా ఉండే వ్యక్తి. ఆయనతో పని చేయడం చాలా సరదాగా ఉంటుందని, ఆయనతో మాట్లాడితే ఎన్నో కొత్త విషయాలు తెలుస్తాయని ఇండస్ట్రీలో అందరూ చెబుతుంటారు. అలాంటి వ్యక్తి చిన్న చిన్న కారణాలకు గొడవపడి మ్యూజిక్ డైరెక్టర్లను దూరం పెడతారంటే నమ్మశక్యంగా లేదు.

నిజానికి ఒకే కాంబినేషన్ రిపీట్ అవుతుంటే ఆడియన్స్ కు బోర్ కొట్టడం సహజం. మళ్లీ వీళ్ళేనా, అదే మ్యూజిక్ వినిపిస్తుందేమో అనే కామెంట్స్ వస్తుంటాయి. బహుశా ఆ మోనాటమీని బ్రేక్ చేయడానికే త్రివిక్రమ్ ఈ నిర్ణయం తీసుకుని ఉండవచ్చు. క్రియేటివ్ ఫీల్డ్ లో ఎప్పుడూ కొత్తదనం కోరుకోవడం చాలా ముఖ్యం. ఆ గ్యాప్ వచ్చినంత మాత్రాన అది గొడవ అనుకోవడం పొరపాటే అవుతుంది.

త్రివిక్రమ్ కు మ్యూజిక్ విషయంలో ఎప్పుడూ కొత్త ప్రయోగాలు చేయడమంటే చాలా ఇష్టం. అందుకే వెంకటేశ్ సినిమా కోసం హర్షవర్ధన్ రామేశ్వర్ లాంటి యంగ్ టాలెంట్ ను ఎంచుకున్నట్లు కనిపిస్తోంది. కొత్త వాళ్లతో పని చేస్తే అవుట్ పుట్ ఫ్రెష్ గా ఉంటుంది, ఆడియన్స్ లో కూడా అంచనాలు వేరే లెవెల్ లో ఉంటాయి.

ఎన్టీఆర్ సినిమా కోసం అనిరుధ్ ను తీసుకోవడం కూడా కథ డిమాండ్ మేరకే తప్ప, తమన్ పై కోపంతో కాదని అర్థమవుతోంది. మొత్తానికి ఈ మార్పు కేవలం సినిమాకు కొత్త ఫ్లేవర్ ఇవ్వడానికే అనిపిస్తోంది. రేపు మళ్ళీ ఇంకో సినిమాకు త్రివిక్రమ్, తమన్ కలిసినా ఆశ్చర్యపోనక్కర్లేదు. కాబట్టి సోషల్ మీడియాలో జరిగే ప్రచారం కేవలం ఊహాగానాలే తప్ప, వారి మధ్య రిలేషన్ బాగానే ఉందని సన్నిహితులు అంటున్నారు.