స్పిరిట్.. త్రివిక్రమ్ తనయుడు అప్పుడే స్టార్ట్ చేస్తాడా!

త్రివిక్రమ్ తనయుడు రిషి మనోజ్ ఇప్పుడు ప్రభాస్ స్పిరిట్‌కు అసిస్టెంట్ డైరెక్టర్‌గా పని చేస్తున్నాడు. ఈ కుర్రాడు ఎప్పుడు సొంత సినిమా స్టార్ట్ చేస్తాడన్న మాట కూడా అప్పుడప్పుడూ ఇండస్ట్రీలో వినిపిస్తోంది. పైగా స్పిరిట్ షూటింగ్ కూడా ఇప్పుడు మంచి స్పీడ్‌లో ఉంది. సందీప్ రెడ్డి వంగా చెప్పిన లెక్క ప్రకారం ఇంకా రెండే నెలల షూటింగ్ మిగిలి ఉంది. సినిమా 2027 మార్చి 5న రిలీజ్ కానుంది. దీంతో స్పిరిట్ పూర్తయ్యాక రిషి ప్లాన్ ఏంటన్నది ఆసక్తిగా మారింది.

రిషి స్పిరిట్‌తోనే అసిస్టెంట్ డైరెక్టర్ కాలేదు. విజయ్ దేవరకొండ కింగ్‌డమ్‌కు గౌతమ్ తిన్ననూరి దగ్గర కూడా పని చేశాడు. ఆ సినిమా తర్వాత మరో ప్రాజెక్ట్ కోసం సందీప్ వంగా టీమ్‌లోకి వెళ్లాడు. గౌతమ్ సినిమా సెటప్ ఒక రకం. వంగా పని చేసే విధానం మరో రకం. కెరీర్ మొదట్లోనే ఇద్దరు కంటెంట్ ఉన్న దర్శకుల దగ్గర పని చేసే ఛాన్స్ రిషికి వచ్చింది.

డైరెక్షన్ మీద ట్రయల్ ఐదేళ్ల క్రితమే మొదలైంది. ఇంతకుముందే రిషి నిశాచరుడు అనే షార్ట్ ఫిల్మ్‌ను డైరెక్ట్ చేసి అందులో నటించాడు. స్టాగ్నేషన్ అనే మరో షార్ట్ ఫిల్మ్‌కు ఎడిటర్‌గా పని చేశాడు. తర్వాత ఫీచర్ సినిమాల సెట్లోకి వెళ్లి అసిస్టెంట్‌గా పనిచేయడం మొదలుపెట్టాడు. స్పిరిట్ టీమ్ ఇప్పటికే 40 రోజుల షెడ్యూల్ పూర్తి చేసింది. మరో 65 షూటింగ్ రోజులు ఉన్నాయని వంగా చెప్పారు.

ఇవన్నీ వరుసగా జరగవు. మధ్యలో గ్యాప్స్, కొత్త షెడ్యూల్స్ ఉంటాయి. షూటింగ్ పూర్తయ్యాక కూడా పోస్ట్ ప్రొడక్షన్‌లో డైరెక్షన్ టీమ్‌కు పని ఉంటుంది. అయినా సినిమా రిలీజ్ అయ్యేలోపు రిషికి తన తర్వాతి స్టెప్ గురించి ఆలోచించడానికి మాత్రం టైమ్ దొరుకుతుంది. ఇప్పటివరకు రిషి తొలి ఫీచర్ సినిమా గురించి అధికారికంగా ఏమీ బయటకు రాలేదు.

హీరో పేరు గానీ, నిర్మాత పేరు గానీ వినిపించలేదు. మరో సినిమా అసిస్టెంట్‌గా చేస్తాడా అన్న సమాచారం కూడా లేదు. కానీ స్పిరిట్ పూర్తయ్యేసరికి అతని దగ్గర కింగ్‌డమ్, స్పిరిట్ అనే రెండు పెద్ద సినిమాల సెట్లో పని చేసిన అనుభవం ఉంటుంది. అక్కడి నుంచి డైరెక్షన్ వైపు వెళ్లే ఛాన్స్ మాత్రం ఉంటుంది. త్రివిక్రమ్ మాత్రం ముందుగా రచయితగా చాలా సినిమాలు చేశాడు. నువ్వే నువ్వే వచ్చే సమయానికి అప్పటికే త్రివిక్రమ్ పేరు రచయితగా ఇండస్ట్రీలో కూడా బాగా సెటిల్ అయిపోయింది.

స్వయంవరం, నువ్వే కావాలి, నువ్వు నాకు నచ్చావ్ తర్వాత 2002లో నువ్వే నువ్వేతో దర్శకుడయ్యాడు. రిషి జర్నీ మాత్రం మొదటి నుంచి డైరెక్షన్ డిపార్ట్‌మెంట్‌లోనే సాగుతోంది. స్పిరిట్ పని పూర్తయ్యాక కూడా ఇంకో దర్శకుడి దగ్గరే ఉండాలని అనుకుంటాడా, లేక అప్పటికే తన తొలి సినిమా కోసం కథ సిద్ధం చేసుకుంటాడా అన్నది చూడాలి. ఇక త్రివిక్రమ్ కు హోం బ్యానర్ ఉంది సితార ఎంటర్టైన్మెంట్ ఉంది. కాబట్టి వాళ్లే డెబ్యూ చాన్స్ ఇచ్చే అవకాశం ఉంది.