జనం కళ్లల్లోకి చూసి రాయలేను.. గురూజీ మైండ్‌సెట్ వెనుక అసలు కథ!
ఏదైనా సినిమా ఈవెంట్ లో మైక్ పట్టుకుంటే పంచులు, ప్రాసలతో హాల్ మొత్తం హోరెత్తించే త్రివిక్రమ్, ఆదర్శ కుటుంబం ప్రెస్ మీట్ లో మాత్రం చాలా డిఫరెంట్ గా కనిపించారు.
By: M Prashanth | 29 Oct 2026 3:01 PM IST
ఏదైనా సినిమా ఈవెంట్ లో మైక్ పట్టుకుంటే పంచులు, ప్రాసలతో హాల్ మొత్తం హోరెత్తించే త్రివిక్రమ్, ఆదర్శ కుటుంబం ప్రెస్ మీట్ లో మాత్రం చాలా డిఫరెంట్ గా కనిపించారు. అనవసరపు హడావుడి చేయకుండా ఒక సీనియర్ రైటర్ లా తన భయాలు, వర్కింగ్ స్టైల్ గురించి ఓపెన్ గా మాట్లాడటం అందరినీ ఆశ్చర్యపరిచింది. గుంటూరు కారం తర్వాత తన చుట్టూ తిరుగుతున్న విమర్శలను లైట్ తీసుకుంటూనే, తన క్రియేటివ్ ప్రాసెస్ లో ఉన్న పట్టును చాలా కూల్ గా బయటపెట్టారు.
వెంకటేష్ తో మళ్లీ సినిమా చేయడానికి పాతికేళ్లు ఎందుకు పట్టిందనే ప్రశ్నకు ఆయన ఇచ్చిన సమాధానం చాలా నిజాయితీగా ఉంది. నువ్వు నాకు నచ్చావ్, మల్లీశ్వరి లాంటి క్లాసిక్స్ తర్వాత ఆయనకు సరిపోయే సబ్జెక్ట్ చెప్పలేక పదేళ్ల పాటు తప్పించుకు తిరిగానని ఒప్పుకున్నారు. ఎంత పెద్ద స్టార్ డైరెక్టర్ అయినా పాత సినిమాల బెంచ్ మార్క్ ఎంతటి ఒత్తిడిని క్రియేట్ చేస్తుందో చెప్పడానికి ఈ ఒక్క మాటతో అర్థమవుతుంది.
ఇటీవల కాలంలో దర్శకులంతా సోషల్ మీడియా ట్రోల్స్, ఆడియన్స్ రెస్పాన్స్ చూసి కథలు మార్చేస్తున్నారు. కానీ త్రివిక్రమ్ దీనికి పూర్తి భిన్నమైన ఫిలాసఫీ చెప్పారు. జనం కళ్లల్లోకి చూస్తూ వాళ్లకు నచ్చుతుందా లేదా అని భయపడుతూ కూర్చుంటే ఏ కథా రాయలేమని కుండబద్దలు కొట్టారు. మన పని మనం చేసుకుంటూ పోవాలని, ఆ కథే ఆడియన్స్ కు కనెక్ట్ అవ్వాలని కోరుకోవడమే ఒక రచయిత చేయాల్సిన అసలైన పని అంటూ క్లారిటీ ఇచ్చారు.
సంగీత చర్చల్లో సిరివెన్నెల సీతారామశాస్త్రి లేకపోవడం ఎంత లోటు అని అడిగినప్పుడు కూడా త్రివిక్రమ్ చాలా ప్రాక్టికల్ గా మాట్లాడారు. ఆయన ఉన్నప్పుడు కూడా జులాయి లాంటి కొన్ని సినిమాలకు ఆయనతో పాటలు రాయించలేదని గుర్తుచేశారు. ఏదైనా టైటిల్ వినగానే జనాలకు వెంటనే ఒక నెగెటివ్ అభిప్రాయం వచ్చేస్తుందని, జులాయి టైమ్ లోనూ ఈ పేరేంటని చాలామంది కామెంట్ చేశారని చెప్పారు. సెకండాఫ్ లో తనికెళ్ల భరణి డైలాగ్ వచ్చేదాకా ఆ టైటిల్ జస్టిఫికేషన్ ఎవరికీ అర్థం కాలేదంటూ.. సాగరసంగమంలో కమల్ హాసన్ క్యారెక్టర్ లాగే ఏ విషయానికైనా కాస్త సమయం పడుతుందని, అప్పటిదాకా వచ్చే మాటలను పెద్దగా పట్టించుకోవాల్సిన పనిలేదని క్లారిటీ ఇచ్చారు.
AK 47 రెగ్యులర్ రొమాంటిక్ కామెడీ కాదని, తాము మొదటిసారి ట్రై చేసిన డార్క్ క్రైమ్ కామెడీ అని చెప్పడం ద్వారా సినిమాపై కొత్త క్యూరియాసిటీని పెంచేశారు. ఇక రీసెంట్ ఈవెంట్ లో శ్రీనిధి శెట్టికి కాళ్ళకు దండం పెట్టినట్లు వైరల్ అయిన విజువల్స్ పై సోషల్ మీడియాలో రకరకాల ఊహాగానాలు నడిచాయి. అయితే ఈ విషయంపై ఆయన చాలా కూల్ గా స్పందిస్తూ, అది కేవలం ఒక సరదా ఫ్రెండ్లీ బాంటర్ మాత్రమేనని తేల్చేశారు. అనవసరపు వివాదాలకు తావివ్వకుండా, ఒక చిన్న నవ్వుతో ఆ రూమర్లకు చెక్ పెట్టేశారు.