రాజ‌కీయాల‌పై స్పందించిన న‌యా స్టార్!

కేరళ అసెంబ్లీ ఎన్నికల పోలింగ్ సందర్భంగా ఇరింజలకుడలో ఓటు వేసిన టోవినో థామస్ రాజకీయ భవిష్యత్తుపై వ‌స్తోన్న‌ ఊహాగానాలకు తెరదించారు. కొంద‌రు సినీ తారలు తమ ప్రజాదరణను రాజకీయ పెట్టుబడిగా మార్చుకోవాలని చూస్తుంటారు. కానీ టోవినో మాత్రం తనకు రాజకీయాలపై ఆసక్తి లేదని స్పష్టం చేశారు. ఒక పౌరుడిగా ఓటు వేయడం తన ప్రాథమిక బాధ్యత అని అంతకు మించి తాను ప్రత్యక్ష రాజకీయాల్లోకి వచ్చే ఆలోచన లేదని ఆయన తేల్చి చెప్పారు. ఈ నిర్ణయం ఆయనలోని పరిణతిని , వృత్తి పట్ల ఉన్న స్పష్టతను సూచిస్తోంది.

నటుడిగా ఉంటూనే ప్రజాక్షేమానికి పాటుపడతానన్న టోవినో మాటలు ఎంతోమందికి స్ఫూర్తినిస్తున్నాయి. సమాజంలో మార్పు తీసుకురావడానికి , ప్రజల సమస్యలను ప్రతిబింబించడానికి కేవలం అధికార రాజకీయాలే మార్గం కాదని ఆయన నమ్ముతున్నారు. ఒక నటుడిగా మంచి సందేశాత్మక చిత్రాలు చేయడం ద్వారా, సమాజంలోని రుగ్మతలను ఎండగట్టడం ద్వారా కూడా ప్రజలకు సేవ చేయవచ్చని ఆయన అభిప్రాయపడ్డారు. వెండితెరపై పోషించే పాత్రలు సమాజంపై చూపే ప్రభావం రాజకీయ ప్రసంగాల కంటే శక్తివంతంగా ఉంటుందని ఆయన విశ్వాసం గా చెప్పొచ్చు.

టోవినో గతంలో కేరళలో సంభవించిన వరదల సమయంలో స్వయంగా క్షేత్రస్థాయిలోకి వెళ్లి సహాయక చర్యల్లో పాల్గొన్న తీరు అందరికీ తెలిసిందే. అప్పట్లో ఆయన ఎటువంటి రాజకీయ ప్రయోజనం ఆశించకుండా ఒక సామాన్య పౌరుడిగా స్పందించారు. ఇప్పుడు కూడా తాను ఏంచేయాలనుకున్నా? నటుడిగానే చేస్తానని చెప్పడం ద్వారా సామాజిక బాధ్యత అనేది పదవులపై ఆధారపడి ఉండదని నిరూపిస్తున్నారు. తనకున్న ఇమేజ్‌ను సమాజ హితం కోసం, సేవా కార్యక్రమాల కోసం ఉపయోగిస్తానని పునరుద్ఘాటించారు.

నేటి కాలంలో యువత రాజకీయాల పట్ల విముఖత చూపుతున్నారనే విమర్శలు ఉన్నాయి. అయితే టోవినో వంటి నటులు ఓటు హక్కు ప్రాధాన్యతను వివరిస్తూ తాము రాజకీయాల్లోకి రాకపోయినా వ్యవస్థలో భాగస్వామ్యం వహిస్తామని చెప్పడం సానుకూల పరిణామం. ఆయన వ్యాఖ్యలు కేవలం ఒక ప్రకటన మాత్రమే కాదు. నటుడిగా తన పరిమితులు , అవకాశాలపై ఆయనకు ఉన్న అవగాహనకు నిదర్శనం. రాజకీయ రంగు పూసుకోకుండానే ప్రజల మనసుల్లో నిజమైన హీరోగా నిలవడానికి ఆయన ప్రాధాన్యత ఇస్తున్నారు.

అధికారం కోసం ఆరాటపడకుండా తన వృత్తిని గౌరవిస్తూనే సమాజానికి సేవ చేస్తానన్న ఆయన నిబద్ధత అభినందనీయం. స్టార్‌డమ్ అనేది కేవలం వసూళ్ల కోసం మాత్రమే కాకుండా ప్రజా చైతన్యం కోసం కూడా ఉపయోగపడుతుందని టోవినో నిరూపిస్తున్నారు. భవిష్యత్తులో ఆయన మరిన్ని అర్థవంతమైన చిత్రాలతో ప్రేక్షకులను అలరిస్తూనే తన సామాజిక బాధ్యతను కొనసాగిస్తారని ఆశిద్దాం.