వీడియో: AIలో చేసిన ఈ పెళ్లి వీడియో చూసి అవాక్కు.. హాలీవుడ్ తారలంతా సిగ్గు సిగ్గు!
స్పైడర్ మ్యాన్ ఫ్రాంచైజీ ద్వారా ప్రపంచవ్యాప్తంగా గుర్తింపు పొందిన టామ్ హాలాండ్ - జెండయా జంట మన దేశీయ సంప్రదాయంలో పెళ్లి పందిరిలో పెళ్లికి సిద్ధమైతే ఎలా ఉంటుందో ఊహించుకోవడమే ఒక అద్భుతమైన అనుభూతిని ఇస్తుంది.
By: Sivaji Kontham | 5 Aug 2026 3:55 PM IST
పాశ్చాత్య దేశాల్లో భారతీయ సంస్కృతి సాంప్రదాయాలకు ఉన్న గౌరవం అంతా ఇంతా కాదు. ఇండియాలో వేదమంత్రాల నడుమ పూజారి సమక్షంలో బ్యాండ్ భాజా సాంప్రదాయ పెళ్లిళ్ల కల్చర్ ని అమితంగా ఇష్టపడతారు. కానీ విదేశాలలో దీనిని అనుకరించేవారు ఉన్నారు. కానీ ఇప్పుడు ఏఐతో ఇంకా ఊహించని ఇలాంటి విప్లవాన్ని చూడబోతున్నాం.
హాలీవుడ్ ప్రముఖ స్టార్లు మన భారతీయ, ప్రత్యేకించి తెలుగు లేదా తమిళ సంప్రదాయ పద్ధతిలో పెళ్లి చేసుకుంటే ఆ సంబరం ఏ స్థాయిలో ఉంటుంది? పట్టు పంచెలు, చీరకట్టుతో హాలీవుడ్ తారలంతా ఒకే చోట చేరి, మంగళవాయిద్యాల నడుమ పెళ్లి పందిరిలో సందడి చేస్తే ఆ దృశ్యం చూడటానికి రెండు కళ్లు నిజంగా సరిపోవు. స్పైడర్ మ్యాన్ ఫ్రాంచైజీ ద్వారా ప్రపంచవ్యాప్తంగా గుర్తింపు పొందిన టామ్ హాలాండ్ - జెండయా జంట మన దేశీయ సంప్రదాయంలో పెళ్లి పందిరిలో పెళ్లికి సిద్ధమైతే ఎలా ఉంటుందో ఊహించుకోవడమే ఒక అద్భుతమైన అనుభూతిని ఇస్తుంది.
అయితే ఈ ఊహను కళ్లముందు నిలిపి సరికొత్త మాయాజాలాన్ని సృష్టించింది నేటి కృత్రిమ మేధస్సు (AI). హైదరాబాద్లోనే ఈ స్పైడర్ మ్యాన్ జంట నిక్కచ్చిగా తెలుగు ఇంట పెళ్లి చేసుకున్నారా? అనేంతటి అద్భుతమైన రీతిలో ఒక AI వీడియోను డిజైన్ చేశారు. పక్కా తెలుగింటి పెళ్లి వాతావరణాన్ని ప్రతిబింబిస్తూ.. హాలీవుడ్ దిగ్గజ తారలందరూ మన సంస్కృతీ సంప్రదాయాలను పాటిస్తూ కనిపించడం ఈ వీడియోలో విశేషం. అవెంజర్స్, స్పైడర్ మ్యాన్ ఫ్రాంచైజీల నుండి టాప్- 10 హాలీవుడ్ స్టార్లు ఈ పెళ్లి హడావుడిలో మునిగితేలడం ప్రేక్షకులను ఎంతగానో ఆశ్చర్యపరుస్తోంది.
ఈ వీడియోలో పెళ్లికూతురు జెండయా నిండైన తెలుగు పట్టుచీర, రవికె ధరించి కనువిందు చేస్తుండగా.. పెళ్లికొడుకు టామ్ హాలాండ్ సాంప్రదాయ తెలుపు రంగు వస్త్రాలలో చాలా ముచ్చటగా కుదురుకున్న తీరు ఆకట్టుకుంటోంది. మన సంప్రదాయంలో అత్యంత ప్రాధాన్యత కలిగిన అప్పగింతల కార్యక్రమం నుంచి వధూవరులిద్దరూ కలసి విస్తరి ముందు కూర్చుని భోజనం చేసే ఘట్టాల వరకు ప్రతి ఒక్క దృశ్యాన్ని అత్యంత సహజంగా రూపొందించారు. పాశ్చాత్య సంస్కృతిలోని ప్రజలు సైతం మన భారతీయ ఆచారాలలోని ఈ అనుబంధాన్ని, ఆప్యాయతలను ఎంతగానో కోరుకుంటారనడానికి ఈ వీడియో ఒక ఉదాహరణగా నిలుస్తుంది.
ఈ పెళ్లి వేడుకలో హాలీవుడ్ ప్రముఖ నటుడు రాబర్ట్ డౌనీ జూనియర్ పెద్ద దిక్కుగా వ్యవహరిస్తూ కనిపించడం ప్రధాన ఆకర్షణగా నిలిచింది. ఆయనతో పాటు క్రిస్ ఈవాన్స్, క్రిస్ హెమ్స్వర్త్ వంటి అగ్ర నటులు.. ప్రముఖ హాలీవుడ్ అందాల కథానాయికలు పట్టు పంచెలు, చీరలు ధరించి పెళ్లి పందిరికి సరికొత్త కళను తీసుకొచ్చారు. అతిథులందరూ తెలుగు లోగిళ్ల పద్ధతిలో భోజనాలు చేయడం, పెళ్లి పందిరిలో చిల్ అవుతూ హడావుడి చేయడం ఈ ఆర్టిఫిషియల్ ఇంటెలిజెన్స్ అద్భుత సృష్టికి మరింత జీవాన్ని ఇచ్చింది.
మొత్తానికి సాంకేతికత అందించిన ఈ AI మాయాజాలం హాలీవుడ్ మెరుపులను.. మన దక్షిణ భారతీయ సంస్కృతితో మిళితం చేసి ఒక సరికొత్త దృశ్యకావ్యాన్ని ఆవిష్కరించింది. పాశ్చాత్య తారలు మన పట్టు దుస్తులలో, తెలుగింటి ఆచార వ్యవహారాలను పాటిస్తూ కనిపిస్తున్న తీరు నెటిజన్లను విపరీతంగా ఆకట్టుకోవడమే కాకుండా, సాంప్రదాయ వివాహ వ్యవస్థలోని గొప్పదనాన్ని ప్రపంచస్థాయి నటుల రూపంలో మరోసారి చాటిచెప్పేలా చేసింది.