హీరోల రెమ్యూన‌రేష‌నే చెబుతోంది.. టాలీవుడ్ ఎంత ఎదిగిందో!

ఒకప్పుడు తెలుగు సినిమా మార్కెట్ గురించి మాట్లాడితే ప్రధానంగా తెలుగు రాష్ట్రాల‌తో పాటు పరిమిత స్థాయిలో ఓవర్సీస్ కలెక్షన్లే డిస్క‌ష‌న్‌కి వచ్చేవి. అలాంటి పరిస్థితుల్లో స్టార్ హీరోల రెమ్యూన‌రేష‌న్ కొన్ని కోట్ల రూపాయల స్థాయిని దాటడం కూడా పెద్ద విషయంగానే భావించేవారు. అయితే గత 13-15 ఏళ్లలో టాలీవుడ్ చేసిన ఆర్థిక ప్రస్థానాన్ని పరిశీలిస్తే, హీరోల రెమ్యూనరేషన్‌లో కనిపించిన పెరుగుదల కేవలం వ్యక్తిగత స్టార్‌డమ్‌కు సంబంధించిన అంశం మాత్రమే కాదని, మొత్తం ఇండ‌స్ట్రీ విస్త‌ర‌ణ‌కు అద్దం పట్టే సూచికగా మారిందని చెప్పొచ్చు.

2010ల ప్రారంభంలో ఒక స్టార్ హీరోకు రూ.6- 9 కోట్ల రెమ్యూన‌రేష‌న్ ఇవ్వ‌డ‌మంటే నిర్మాత భారీ పెట్టుబడి పెట్టినట్లే. అప్పటి బిజినెస్ మోడల్ పూర్తిగా థియేట్రికల్, శాటిలైట్ రైట్స్ పైనే ఆధారపడేది. విదేశీ మార్కెట్ కూడా లిమిటెడ్ గానే ఉండేది. అందువల్ల హీరో రెమ్యూన‌రేషన్ పెరగాలంటే దేశీయ మార్కెట్‌లోనే భారీ ఓపెనింగ్స్ రావాల్సి ఉండేది.

కానీ ఆ తర్వాత పరిస్థితి వేగంగా మారింది. తెలుగు సినిమాలు ఇతర భాషల్లో డబ్ అవడం, దేశవ్యాప్తంగా రిలీజ‌వ‌డం, అంతర్జాతీయ మార్కెట్లలో గుర్తింపు పొందడం, డిజిటల్ ప్లాట్‌ఫారమ్‌ల విస్తరణ వంటి పరిణామాలు ఇండ‌స్ట్రీ ఆదాయ వనరులను పూర్తిగా మార్చేశాయి. దీంతో నిర్మాతల వ్యాపార పరిమాణం పెరిగింది. అదే సమయంలో స్టార్ హీరోల మార్కెట్ కూడా ప్రాంతీయ స్థాయి నుంచి జాతీయ స్థాయికి విస్తరించింది.

ప్ర‌స్తుతం కొందరు అగ్ర హీరోల రెమ్యూన‌రేష‌న్ రూ.100 కోట్లకు చేరుకోవడం వెనుక కేవలం వారి అభిమాన బలం మాత్రమే లేదు. ఒక సినిమాకు రిలీజ్‌కు ముందే థియేట్రికల్, డిజిటల్, శాటిలైట్, ఆడియో, ఓవ‌ర్సీస్ రైట్స్ ద్వారా వచ్చే భారీ ఆదాయం కూడా కీలక పాత్ర పోషిస్తోంది. గతంతో పోలిస్తే నిర్మాతలు పెట్టే పెట్టుబడులు పెరిగినట్లే, వాటిని తిరిగి రాబట్టే అవకాశాలు కూడా విస్తరించాయి.

అయితే ఈ మార్పును కేవలం రెమ్యూనరేషన్ పెరుగుదలగా మాత్రమే చూడడం సరైంది కాదు. ఇది టాలీవుడ్ ఆర్థిక వ్యవస్థ ఎంతగా ఎదిగిందనే విషయాన్ని సూచించే కీలక సంకేతంగా చూడొచ్చు. ఒకప్పుడు తెలుగు మార్కెట్‌కే పరిమితమైన పరిశ్రమ, ఇప్పుడు ప్రపంచవ్యాప్తంగా ప్రేక్షకులను అల‌రించే స్థాయికి ఎదిగింది. ఆ ప్రయాణంలో స్టార్ హీరోల రెమ్యూన‌రేష‌న్లు కూడా ఇండ‌స్ట్రీ అభివృద్ధికి ప్రతిబింబంగా నిలిచాయి.