బాక్సాఫీస్ దండయాత్ర.. టాలీవుడ్ సూపర్ స్టార్ల మైండ్ బ్లాంక్ లైనప్!

టాలీవుడ్ రేంజ్ ఇప్పుడు లోకల్ కాదు.. గ్లోబల్! మన సూపర్ స్టార్లు ఒక్కొక్కరు లైన్ లో పెట్టిన సినిమాల లిస్ట్ చూస్తుంటే బాక్సాఫీస్ వద్ద పాత రికార్డులన్నీ గాలికి కొట్టుకుపోవడం ఖాయం అనిపిస్తోంది. రాజమౌళి, ప్రశాంత్ నీల్, సందీప్ రెడ్డి వంగా లాంటి మోస్ట్ వాంటెడ్ దర్శకులతో మన హీరోలు సెట్ చేసుకున్న కాంబినేషన్లు ఇండియన్ సినిమా ఇండస్ట్రీలోనే అత్యంత క్రేజీ లైనప్‌గా మారాయి. టాలీవుడ్‌ను నెక్స్ట్ లెవెల్‌కు తీసుకెళ్లే ఆ క్రేజీ ప్రాజెక్ట్స్ పైన ఓ లుక్ వేద్దాం..

ఐకాన్ స్టార్ అల్లు అర్జున్ ‘ప్యాన్-వరల్డ్’ ప్లాన్:

'పుష్ప'తో ప్యాన్ ఇండియా లెవెల్లో రూల్ చేసిన అల్లు అర్జున్, ఇప్పుడు టాప్ డైరెక్టర్లతో ఇంటర్నేషనల్ రేంజ్ లైనప్ సెట్ చేసుకున్నారు. ఇక అట్లీ దర్శకత్వంలో ప్యారలల్ యూనివర్స్ కాన్సెప్ట్‌తో రాబోతున్న ‘రాకా’, లోకేష్ కనగరాజ్‌తో ‘AA23’, 'మిన్నల్ మురళి' ఫేమ్ బాసిల్ జోసెఫ్‌తో ఒక డిఫరెంట్ మూవీ మరియు సందీప్ రెడ్డి వంగాతో ఒక మైండ్ బ్లోయింగ్ ప్రాజెక్ట్ బన్నీ లైన్‌లో ఉన్నాయి. ఈ కాంబోస్ చూస్తుంటే బన్నీ ప్రతి సినిమాతోనూ సరికొత్త రికార్డులు క్రియేట్ చేయడం గ్యారెంటీ.

సూపర్ స్టార్ మహేష్ బాబు గ్లోబల్ అడ్వెంచర్:

సూపర్ స్టార్ మహేష్ బాబు ప్రస్తుతం దర్శకధీరుడు ఎస్.ఎస్. రాజమౌళి దర్శకత్వంలో మోస్ట్ అవేటెడ్ మూవీ ‘వారణాసి’ చేస్తున్నారు. గ్లోబల్ హిట్ 'ఆర్ఆర్ఆర్' తర్వాత జక్కన్న తీస్తున్న సినిమా కావడంతో దీనిపై ప్రపంచవ్యాప్తంగా అంచనాలు ఉన్నాయి. ఇక ఈ భారీ అడ్వెంచర్ మూవీ తర్వాత, వైల్డ్ అండ్ బోల్డ్ డైరెక్టర్ సందీప్ రెడ్డి వంగాతో మహేష్ ఒక క్రేజీ ప్రాజెక్ట్ లాక్ చేసినట్లు టాక్. ఈ రెండు సినిమాలతో మహేష్ ఇంటర్నేషనల్ లెవెల్లో దుమ్ములేపడం ఖాయం.

మ్యాన్ ఆఫ్ మాసెస్ ఎన్టీఆర్ ‘డ్రాగన్’ వీరవిహారం:

జూనియర్ ఎన్టీఆర్, కేజీఎఫ్ ఫేమ్ ప్రశాంత్ నీల్ కాంబినేషన్‌లో వస్తున్న ‘డ్రాగన్’ సినిమాపై ఇప్పటికే భారీ హైప్ క్రియేట్ అయ్యింది. 1960ల నాటి గంజాయి, హీరోయిన్ స్మగ్లింగ్ బ్యాక్‌డ్రాప్‌లో ఎంతో ఇంటెన్స్‌గా రాబోతున్న ఈ మూవీలో తారక్ కెరీర్‌లోనే అత్యంత డార్క్ క్యారెక్టర్‌లో కనిపించనున్నారు. ఇక దీనితో పాటు మాటల మాంత్రికుడు త్రివిక్రమ్‌తో ‘గాడ్ ఆఫ్ వార్’, ఆ తర్వాత ‘డ్రాగన్ 2’ కూడా లైన్ లో ఉన్నాయి.

రెబెల్ స్టార్ ప్రభాస్.. రూ. 5000 కోట్ల టార్గెట్:

ప్రస్తుతం ఇండియన్ సినీ పరిశ్రమలోనే అత్యంత బిజీగా ఉన్న హీరో ప్రభాస్. హను రాఘవపూడి దర్శకత్వంలో పీరియాడిక్ లవ్ అండ్ యాక్షన్ డ్రామా ‘ఫౌజీ’, సందీప్ వంగాతో మోస్ట్ వయలెంట్ పోలీస్ స్టోరీ ‘స్పిరిట్’ షూటింగ్స్‌తో డార్లింగ్ ఫుల్ స్పీడ్‌లో ఉన్నారు. ఇక వీటితో పాటు గ్లోబల్ హిట్ ‘కల్కి 2’, ప్రశాంత్ నీల్‌తో ‘సలార్ 2’ మరియు ప్రశాంత్ వర్మతో ఒక భారీ ప్రాజెక్ట్ ప్రభాస్ ఖాతాలో ఉన్నాయి.

పవన్ కళ్యాణ్, నాని, రామ్ చరణ్ హవా:

పవర్ స్టార్ పవన్ కళ్యాణ్ సుజీత్ దర్శకత్వంలో ఎంతో ప్రతిష్టాత్మకంగా తెరకెక్కుతున్న ‘OG 2’ తో పాటు సురేందర్ రెడ్డి సినిమాను లైన్‌లో పెట్టారు. నేచురల్ స్టార్ నాని ‘ద ప్యారడైజ్’ శ్రీకాంత్ ఓదెల, ‘బ్లడీ రోమియో’ సుజీత్ లతో వైవిధ్యమైన కంటెంట్‌తో వస్తున్నారు. ఇక గ్లోబల్ స్టార్ రామ్ చరణ్, టాలెంటెడ్ డైరెక్టర్ సుకుమార్ కాంబినేషన్‌లో ఒక ఊరమాస్ ప్రాజెక్ట్‌ను పట్టాలెక్కించబోతున్నారు.

ఒకరిని మించి మరొకరు అన్నట్లుగా మన టాలీవుడ్ హీరోలు సెట్ చేసుకున్న ఈ లైనప్ చూస్తుంటే, రాబోయే రోజుల్లో ఇండియన్ బాక్సాఫీస్ వద్ద తెలుగు సినిమాల దండయాత్ర మామూలుగా ఉండదని అర్థమవుతోంది. ట్రెండ్ పరంగా అల్లు అర్జున్, ప్రభాస్, మహేష్ బాబుల లైనప్స్ అత్యంత పవర్‌ఫుల్‌గా కనిపిస్తున్నాయి. మరి ఈ క్రేజీ కాంబినేషన్లలో ఏ సినిమా బాక్సాఫీస్ వద్ద ఎలాంటి ప్రభంజనం సృష్టిస్తుందో చూడాలి.