ఇమేజ్ వర్సెస్ ఎక్స్‌పెరిమెంట్!

తెలుగు చలనచిత్ర పరిశ్రమ దశాబ్దాలుగా ప్రత్యేకమైన కమర్షియల్ ఫార్ములాపై ఆధారపడి నడుస్తోంది. ఇక్కడ అగ్ర హీరోల లార్జర్-దెన్-లైఫ్ మాస్ ఇమేజ్ చుట్టూనే వందల కోట్ల వ్యాపారం తిరుగుతుంది. అయితే మారుతున్న కాలంతో పాటు ప్రేక్షకుల అభిరుచులు ముఖ్యంగా ఓటీటీ విప్లవం తర్వాత పూర్తిగా మారిపోయాయి. ఈ నేపథ్యంలో టాలీవుడ్ స్టార్ హీరోలు సైతం రెగ్యులర్ ఇమేజ్ పంథాను వీడి భిన్నమైన కాన్సెప్ట్ ఓరియంటెడ్ సినిమాలు చేయడానికి ఆసక్తి చూపిస్తున్నారు. కానీ ఇక్కడే అసలైన ప్రశ్న తలెత్తుతోంది. మన ఇండస్ట్రీ ప్రస్తుత బిజినెస్ మోడల్ ఇలాంటి ప్రయోగాలకు నిజంగా సహకరిస్తుందా?

అగ్ర హీరోల సినిమా అంటేనే భారీ బడ్జెట్, హై-వోల్టేజ్ యాక్షన్, పాటలు, కమర్షియల్ ఎలిమెంట్స్ అనేవి కనీస అవసరాలుగా మారిపోయాయి. థియేట్రికల్ బిజినెస్ పరంగా చూస్తే డిస్ట్రిబ్యూటర్లు ,ఎగ్జిబిటర్లు స్టార్ హీరోల నుండి ఆశించేది ఇదే. ఎందుకంటే సామాన్య ప్రేక్షకుడు థియేటర్‌కు వచ్చి టికెట్ కొనేది ఆ మాస్ హంగామాను చూడటానికే. ఒకవేళ స్టార్ హీరో ఇమేజ్‌ను పక్కన పెట్టి పూర్తిగా ప్రయోగాత్మక .. కంటెంట్-డ్రైవెన్ సినిమా చేస్తే దానికి ఓపెనింగ్స్ రాబట్టడం థియేట్రికల్ మార్కెట్‌లో పెద్ద సవాలుగా మారుతుంది. ప్రస్తుత బిజినెస్ మోడల్ ఎక్కువగా మొదటి వారాంతపు వసూళ్లపైనే ఆధారపడి ఉండటం వల్ల ప్రయోగాలకు రిస్క్ ఫ్యాక్టర్ ఎక్కువ.

అయితే ఈ బిజినెస్ మోడల్‌లో ఓటీటీ -శాటిలైట్ రైట్స్ రూపంలో పెద్ద రక్షణ కవచం లభిస్తోంది. అగ్ర హీరో భిన్నమైన సబ్జెక్ట్‌తో సినిమా చేసినప్పుడు థియేట్రికల్ మార్కెట్ ఒడిదుడుకులకు గురైనా? నాన్-థియేట్రికల్ రైట్స్ ద్వారా సేఫ్ జోన్‌కు వచ్చే అవకాశం ఉంది. డిజిటల్ ప్లాట్‌ఫామ్స్ భిన్నమైన, కాన్సెప్ట్ ఓరియంటెడ్ కంటెంట్‌ను కొనుగోలు చేయడానికి భారీగా పెట్టుబడి పెడుతున్నాయి. దీనివల్ల నిర్మాతలు బడ్జెట్‌ను సరిగ్గా ప్లాన్ చేసుకోగలిగితే ఇమేజ్‌కు భిన్నమైన సినిమాలను కూడా లాభదాయకమైన వ్యాపారంగా మార్చొచ్చు. కాకపోతే దీనికి బడ్జెట్ నియంత్రణ అనేది అత్యంత కీలకమైన అంశం.

ఇక్కడ మరో ప్రధానమైన అడ్డంకి హీరోల రెమ్యునరేషన్. టాలీవుడ్‌లో పెద్ద సినిమా బడ్జెట్‌లో సింహభాగం హీరో .. దర్శకుడి పారితోషికాలకే సరిపోతుంది. ప్రయోగాత్మక చిత్రాలు చేసినప్పుడు కూడా అదే స్థాయి రెమ్యునరేషన్స్ ఆశిస్తే ఆ ప్రాజెక్ట్ బిజినెస్ పరంగా వర్కవుట్ కావడం అసాధ్యం. ఒకవేళ అగ్ర హీరోలు ప్రాఫిట్ షేరింగ్ లేదా రీజనబుల్ రెమ్యునరేషన్ మోడల్‌కు అంగీకరిస్తే తప్ప టాలీవుడ్ బిజినెస్ స్ట్రక్చర్ కాన్సెప్ట్ సినిమాలకు పూర్తిగా మద్దతు ఇవ్వలేదు. హీరోలు మార్కెట్ రిస్క్‌ను ఓనర్షిప్ రూపంలో పంచుకున్నప్పుడే నిర్మాతలకు ప్రయోగాలు చేసే ధైర్యం వస్తుంది.

పాన్ ఇండియా మార్కెట్ విస్తరణ కూడా ఈ బిజినెస్ ఈక్వేషన్‌ను మార్చేసింది. ఉత్తరాది - ఇతర భాషల ప్రేక్షకులు తెలుగు హీరోల నుండి ఎక్కువగా లార్జర్-దెన్-లైఫ్ యాక్షన్ విజువల్స్‌ను మాత్రమే కోరుకుంటున్నారు. గ్లోబల్ మార్కెట్‌లో `ఆర్ఆర్ఆర్` .`పుష్ప` వంటి చిత్రాలు క్రియేట్ చేసిన ఇంపాక్ట్ వల్ల టాలీవుడ్ అంటేనే ఒక బ్రాండ్ మాస్ సినిమా అనే ముద్ర పడింది. ఈ క్రేజ్‌ను క్యాష్ చేసుకోవాలనే తపనలో ఇండస్ట్రీ బిజినెస్ మోడల్ మరింత ఎక్కువగా కమర్షియల్ సినిమాల వైపే మొగ్గు చూపుతోంది. దీనివల్ల కంటెంట్ ఓరియంటెడ్ సినిమాలకు అంతర్జాతీయ స్థాయిలో మార్కెట్ సృష్టించడం మరింత క్లిష్టంగా మారుతోంది.

ప్రస్తుత బిజినెస్ మోడల్ పూర్తిగా ప్రయోగాలకు వ్యతిరేకం కాదు. కానీ అది కొన్ని కఠినమైన షరతులతో కూడుకున్నది. అగ్ర హీరోలు తమ ఇమేజ్ ఇరుకున పడకుండా ఉండాలంటే బడ్జెట్ పరిమితులు, మారుతున్న పంపిణీ వ్యూహాలు ,విభిన్నమైన ప్రమోషన్ పద్ధతులను అవలంబించాల్సి ఉంటుంది. కేవలం స్టార్ పవర్ మీదే కాకుండా స్క్రిప్ట్ బలంపై నమ్మకంతో వ్యాపార సమీకరణాలను మార్చుకోగలిగితేనే టాలీవుడ్ బిజినెస్ మోడల్ ఇమేజ్ .. ఎక్స్‌పెరిమెంట్ రెండింటికీ సమానంగా సహకరించగలుగుతుంది.