సినిమాల వాయిదాతో అంతా నష్టాలే!

పెద్ద సినిమాల విడుదల వాయిదా ప‌డ‌టం చిత్ర పరిశ్రమను ఎప్ప‌టిక‌ప్పుడు కలవరపెడుతుంటుంది. భారీ బడ్జెట్ చిత్రాలు అకస్మాత్తుగా వాయిదా పడటం వల్ల నిర్మాతలకే కాక‌ సినిమాపై ఆధారపడిన పంపిణీదారులు, ఎగ్జిబిట‌ర్లు, చిన్న సినిమాల మేకర్స్‌కు కూడా కోలుకోలేని నష్టాలు వాటిల్లుతున్నాయి. ఒక పెద్ద సినిమా వాయిదా అనేది చిత్ర పరిశ్రమలోని మొత్తం వ్యవస్థపై ఒక చైన్ రియాక్షన్ లాంటి ప్రభావాన్ని చూపుతోంది. ముఖ్యంగా థియేటర్ల బిజినెస్ ఈ వాయిదాల వల్ల తీవ్రంగా దెబ్బతింటోంది. ఒక స్టార్ హీరో సినిమా రిలీజ్ అవుతుందంటే వందల సంఖ్యలో థియేటర్లను ముందుగానే బుక్ చేస్తారు.

అయితే ఆఖరి నిమిషంలో సినిమా వాయిదా పడటం వల్ల ఆ థియేటర్లన్నీ ఒక్కసారిగా ఖాళీ అవుతున్నాయి. ఆ సమయంలో ప్రత్యామ్నాయంగా ఏ చిన్న సినిమాను వేయాలన్నా ప్రేక్షకులను థియేటర్లకు రప్పించడం కష్టమవుతోంది. దీనివల్ల థియేటర్ల యజమానులు నిర్వహణ ఖర్చులను కూడా భరించలేక ఆర్థికంగా న‌ష్టాలు ఎదుర్కోవాల్సి వ‌స్తోంది. మ‌రోవైపు చిన్న, మీడియం రేంజ్ సినిమాలకు ఈ వాయిదాలు ఒక శాపంగా మారుతున్నాయి. పెద్ద సినిమాల రిలీజ్ తేదీలను దక్కించుకోవాలని చిన్న చిత్రాల నిర్మాతలు భావిస్తున్నప్పటికీ వారికి ప్రమోషన్ చేసుకోవడానికి తగిన సమయం దొర‌క‌డం లేదు.

విడుదల గురించి ప్రేక్షకులకు కనీస అవగాహన కల్పించకుండా థియేటర్లలోకి రావడం వల్ల ఆశించిన వసూళ్లు రాక ఆ సినిమాలు బాక్సాఫీస్ వద్ద చతికిలబడుతున్నాయి. నిర్మాతలకు ఓటీటీ డీల్స్ విషయంలో కూడా భారీ నష్టాలు తప్పడం లేదు. ప్రస్తుతం చాలా సినిమాలు థియేటర్ రిలీజ్ డేట్‌ను బట్టి ఓటీటీ సంస్థలతో ఒప్పందాలు చేసుకుంటున్నాయి. ఒప్పందం ప్రకారం నిర్ణీత సమయానికి సినిమా విడుదల కాకపోతే ఓటీటీ ప్లాట్‌ఫారమ్‌లు గతంలో కుదుర్చుకున్న భారీ మొత్తాన్ని తగ్గించేస్తున్నాయి లేదా అదనపు పెనాల్టీలు విధిస్తున్నాయి.

దీనివల్ల డిజిటల్ రైట్స్ ద్వారా రావాల్సిన ఆదాయం తగ్గుతోంది. దీంతో నిర్మాతలు వడ్డీల భారం పెరిగి ఇబ్బందులు పడుతున్నారు. సినిమాల వాయిదా వల్ల ఆయా చిత్రాల బడ్జెట్ కూడా అమాంతం పెరిగిపోతోంది. విడుదల ఆలస్యమయ్యే కొద్దీ పబ్లిసిటీ ఖర్చులు, ఫైనాన్స్ వడ్డీలు భారంగా మారుతున్నాయి. ఒక సినిమా వాయిదా పడితే? దాని ప్రభావం ఆ తర్వాత విడుదల కావాల్సిన ఇతర సినిమాలపై కూడా పడుతోంది. దీనివల్ల ఇండస్ట్రీలో విడుదల గందరగోళం స‌మ‌స్య‌గా మారుతోంది. ఆరోగ్యకరమైన పోటీకి ఆస్కారం లేకుండా పోతోంది.

తెలుగు చిత్ర పరిశ్రమ మళ్ళీ గాడిలో పడాలంటే నిర్మాతలు విడుదల తేదీల విషయంలో పక్కా ప్లానింగ్‌తో ఉండాల్సిన అవసరం ఉంది. కేవలం షూటింగ్ పూర్తి కాకపోవడం లేదా గ్రాఫిక్స్ పనుల సాకుతో సినిమాలను వాయిదా వేయడం వల్ల పరిశ్రమకు చేటు జరుగుతోంది. పంపిణీదారులు, ఎగ్జిబిటర్ల ప్రయోజనాలను దృష్టిలో పెట్టుకుని క్రమశిక్షణతో కూడిన రిలీజ్ క్యాలెండర్‌ను అనుసరించినప్పుడే ఇండస్ట్రీ అందరికీ లాభదాయకంగా ఉంటుందని విశ్లేష‌కులు భావిస్తున్నారు.