ప్యారడైజ్ 100 కోట్ల కలెక్షన్స్ సరే.. రికవరీ వెనుకే అసలు కష్టం

నాని కెరీర్ లోనే హైయెస్ట్ ఓపెనింగ్స్ సాధించిన చిత్రంగా ది ప్యారడైజ్ బాక్సాఫీస్ దగ్గర సంచలనం సృష్టిస్తోంది. పోస్టర్ల మీద కనిపించే భారీ నంబర్లు చూసి ఫ్యాన్స్ ఫుల్ ఖుషీ అవుతున్నారు. కానీ ట్రేడ్ వర్గాల లెక్కల ప్రకారం సినిమా అసలు ఆట ఇప్పుడే మొదలైంది. రిలీజ్ కు ముందే భారీ రేట్లకు థియేట్రికల్ రైట్స్ అమ్ముడవడంతో, గ్రాస్ తో సంబంధం లేకుండా బయ్యర్లకు చేరే అసలైన షేర్ ఎంత అన్నదే ఇప్పుడు అసలు విషయం.

ట్రేడ్ రిపోర్ట్స్ ప్రకారం ప్యారడైజ్ రెండు రోజుల్లో వరల్డ్‌వైడ్ గా దాదాపు రూ.98.5 కోట్ల గ్రాస్ వసూలు చేసినట్లు టాక్ వస్తోంది. ఇందులో ఇండియా గ్రాస్ రూ.72.5 కోట్లు కాగా, ఓవర్సీస్ నుంచి రూ.26 కోట్ల వరకు వచ్చినట్లు చెబుతున్నారు. కర్ణాటకలో మొదటి రోజు నుంచే రూ.6 కోట్ల గ్రాస్ తో మంచి పికప్ కనిపించింది. నార్త్ లో హిందీ వెర్షన్ రెండు రోజుల నెట్ కలెక్షన్స్ రూ.3 కోట్ల మార్క్ దాటాయి. ఈ నంబర్లు బాగున్నా, బ్రేక్ ఈవెన్ టార్గెట్ మాత్రం చాలా దూరంలో ఉంది.

రిలీజ్ కు ముందు ఈ సినిమా వరల్డ్‌వైడ్ తెలుగు థియేట్రికల్ బిజినెస్ రూ.103 కోట్లకు పైగా జరిగింది. అంటే బయ్యర్లు సేఫ్ జోన్ లోకి రావాలంటే ప్రపంచవ్యాప్తంగా కనీసం రూ.105 కోట్ల షేర్ రాబట్టాలి. దీనికి దాదాపు రూ.200 కోట్ల గ్రాస్ కలెక్ట్ చేయాల్సి ఉంటుంది. సినిమా పోస్టర్ల మీద గ్రాస్ నంబర్లు ఎంత పెద్దగా కనిపించినా, డిస్ట్రిబ్యూటర్ల చేతికి వచ్చేది పక్కా షేర్ మాత్రమే. అందుకే ఈ భారీ రికవరీ ఒత్తిడి నాని సినిమాపై గట్టిగానే కనిపిస్తోంది.

ఏరియాల వారీగా చూస్తే ఏపీ, తెలంగాణ హక్కులు రూ.75.7 కోట్లకు అమ్ముడయ్యాయి. కర్ణాటక రైట్స్ రూ.6.5 కోట్లు కాగా, ఓవర్సీస్ బిజినెస్ రూ.18 కోట్లు, రెస్ట్ ఆఫ్ ఇండియా రూ.3.5 కోట్లు పలికింది. అన్నింటికంటే ఓవర్సీస్ మార్కెట్ కాస్త స్పీడ్ గా పుంజుకుంటోంది. రూ.18 కోట్ల బిజినెస్ రికవరీ కావాలంటే అక్కడ సుమారు రూ.42 కోట్ల గ్రాస్ రావాలి. రెండు రోజుల్లోనే రూ.26 కోట్లు వచ్చేయడంతో ఓవర్సీస్ డిస్ట్రిబ్యూటర్లు త్వరలోనే సేఫ్ అయ్యే ఛాన్స్ కనిపిస్తోంది.

అసలైన ఛాలెంజ్ మాత్రం తెలుగు రాష్ట్రాల్లోనే ఎదురుకాబోతోంది. ఏపీ, నైజాం కలిపి రూ.75.7 కోట్ల టార్గెట్ రీచ్ అవ్వడం మామూలు విషయం కాదు. మిక్స్డ్ టాక్ నడుస్తున్న వేళ ఈ వీకెండ్ లో వచ్చే కలెక్షన్లే సినిమా భవితవ్యాన్ని తేలుస్తాయి. అదృష్టవశాత్తూ తెలంగాణలో పెంచిన టికెట్ ధరలకు అక్టోబర్ 3 వరకు అనుమతి ఉండటం సినిమాకు కొంతవరకు కలిసిరానుంది. ఈ పెంచిన రేట్లు వీకెండ్ లో భారీ గ్రాస్ రావడానికి ఎంతవరకు పనికొస్తాయో చూడాలి.

నాని కెరీర్ లోనే వంద కోట్ల మార్కెట్ టార్గెట్ పెట్టుకుని దిగిన మొదటి సినిమా కావడంతో అందరి కళ్లూ కలెక్షన్ల మీదే ఉన్నాయి. పోస్టర్ల గ్రాస్ వంద కోట్లకు చేరువవుతున్నా, బయ్యర్ల జేబులు నిండాలంటే ఇంకా సగానికి పైగా షేర్ రాబట్టాల్సి ఉంది. శని, ఆదివారాలు ముగిసిన తర్వాత బయటకు వచ్చే ఏరియా వైజ్ షేర్ లెక్కలే ప్యారడైజ్ హిట్టా ఫట్టా అనేది క్లియర్ గా డిసైడ్ చేస్తాయి.