తెలుగు సినిమాలకు ప్రాంతీయ హద్దులు వచ్చేశాయా?

ఒకప్పుడు సినిమా కథ బాగుంటే చాలు.. ప్రేక్షకులు ఎక్కడైనా ఆ సినిమాను ఆదరించేవారు. కథ, నటన, పాటలు, కామెడీ బాగుంటే భాషతో సంబంధం లేకుండా సినిమాలను చూసేవారు. కానీ ఇప్పుడు పరిస్థితులు కొంచెం మారుతున్నట్లు కనిపిస్తోంది. సినిమా కథతో పాటు దాని ప్రాంతం, అక్కడి భాష, యాస కూడా ప్రేక్షకుల ఆదరణపై ప్రభావం చూపిస్తున్నాయా అనే అనుమానం ఇప్పుడు చాలామందిలో కలుగుతుంది.

తెలుగు సినిమా ఇప్పుడు ప్రపంచవ్యాప్తంగా గుర్తింపు తెచ్చుకుంటోంది. ముఖ్యంగా పాన్ ఇండియా సినిమాలతో మన హీరోలు ఇతర భాషల ప్రేక్షకులకు కూడా దగ్గరవుతున్నారు. అయితే తెలుగు రాష్ట్రాల్లోనే కొన్ని సినిమాల ఆదరణ ప్రాంతాలను బట్టి మారుతోందనే అభిప్రాయాలు వినిపిస్తున్నాయి.

ఇటీవల కొన్ని సినిమాలు తెలంగాణ గ్రామీణ నేపథ్యంలో తెరకెక్కుతున్నాయి. మరికొన్ని సినిమాలు రాయలసీమ యాస, అక్కడి జీవన విధానాన్ని ప్రధానంగా చూపిస్తున్నాయి. ఇలాంటి సినిమాలు వాటికి సంబంధించిన ప్రాంతాల్లో ఎక్కువగా కనెక్ట్ అవుతున్నాయనే అభిప్రాయాలు వ్యక్తమవుతున్నాయి. ఇతర ప్రాంతాల్లో కూడా ప్రేక్షకులు ఆదరిస్తున్నప్పటికీ, అక్కడి స్పందన కొంత భిన్నంగా ఉండవచ్చు.

ఒక ప్రాంతానికి సంబంధించిన భాష, సంస్కృతి, సంప్రదాయాలు అక్కడి ప్రేక్షకులకు సులభంగా అర్థమవుతాయి. పాత్రలు మాట్లాడే మాటలు, వారి సమస్యలు, జీవన విధానం తమ జీవితాలకు దగ్గరగా ఉన్నాయని వారు భావిస్తారు. దీంతో సినిమాతో త్వరగా అనుబంధం ఏర్పడుతుంది.

అయితే ఒక సినిమా ఒక ప్రాంతంలోనే బాగా ఆడుతుందని చెప్పలేం. మంచి కథ, బలమైన భావోద్వేగాలు, ఆసక్తికరమైన కథనం ఉంటే అన్ని ప్రాంతాల ప్రేక్షకులను ఆకట్టుకునే అవకాశం ఉంటుంది. ప్రాంతీయ నేపథ్యం సినిమాకు ప్రత్యేకతను తీసుకురావచ్చు. కానీ అదే సినిమా విజయాన్ని నిర్ణయించే ఏకైక అంశం కాదు.

ఇటీవల 'ఇడుపు కాయితం' సినిమా గురించి మాట్లాడిన నిర్మాత బన్నీ వాస్ కూడా ప్రాంతీయ భావనలపై స్పందించారు. ఈ సినిమా షూటింగ్ తెలంగాణలోని గుళ్లపల్లిలో జరిగినప్పుడు అక్కడి పచ్చని పొలాలు తనను ఆశ్చర్యపరిచాయని ఆయన తెలిపారు. గోదావరి ప్రాంతాన్ని గుర్తు చేసే వాతావరణం అక్కడ కనిపించిందని చెప్పారు.

తెలంగాణలో తెరకెక్కిన సినిమాను చూసి ప్రేక్షకులు మరో ప్రాంతానికి చెందిన సినిమాగా భావిస్తారేమోనని ఆయన సరదాగా వ్యాఖ్యానించారు. అలాగే తెలుగు ప్రజలంతా ఒక్కటేనని, సినిమాలను ప్రాంతాల పేర్లతో విడదీయడం సరైన పద్ధతి కాదనే అభిప్రాయాన్ని వ్యక్తం చేశారు.

అయితే ఇలా ప్రాంతాలవారీగా సినిమాలు డివైడయి దాన్నిబట్టి కలెక్షన్స్ వస్తే.. అది తెలుగు ఇండస్ట్రీకి పెద్ద నెగిటివ్ అయి కూర్చోవడం ఖాయంలా కనిపిస్తోంది. కాబట్టి యాసా, ప్రాంతం కన్నా …మన దర్శకులు కూడా సినిమా కథ పైన ఎక్కువ కాన్సెంట్రేట్ చేస్తే పుష్పలాగా ఒక ప్రాంతానికి సంబంధించిన సినిమాలు కూడా బ్లాక్ బస్టర్ అయ్యే అవకాశాలు లేకపోలేదు.