హిందీలో మిరాయ్ సంచలనం.. అగ్ర హీరోల క్లబ్ లో తేజ సజ్జా!

తెలుగు సినీ ఇండస్ట్రీ నుంచి పాన్ ఇండియా స్థాయిలో సక్సెస్ సాధించడం అంత సులభం కాదు. ఇప్పటివరకు ఆ లెవెల్‌లో నిలబడ్డ వారు చాలా తక్కువ మంది మాత్రమే. ప్ర‌భాస్, అల్లూ అర్జున్, రామ్ చరణ్, ఎన్టీఆర్‌ లాంటి టాప్ స్టార్స్ మాత్రమే హిందీ బెల్ట్‌లో పెద్ద రేంజ్ వసూళ్లు సాధించారు. అయితే ఇప్పుడు వారి జాబితాలోకి యంగ్ హీరో తేజ సజ్జా పేరు కూడా చేరడం ఇండస్ట్రీలో చర్చనీయాంశంగా మారింది.

తాజాగా రిలీజ్ అయిన మిరాయ్ సినిమా మూడు రోజుల్లోనే హిందీ వెర్షన్ ద్వారా 10 కోట్ల మార్క్ దాటేసింది. ఇది తేజ సజ్జా కెరీర్‌లోనే కాకుండా టాలీవుడ్‌లోనూ ఒక అరుదైన రికార్డ్. ఇప్పటివరకు ఈ ఫీట్ సాధించిన తెలుగు హీరోలలో కేవలం నలుగురే ఉన్నారు. అలాంటి లెజెండరీ కాంపిటీషన్‌లో తేజ సజ్జా తనకంటూ ఒక ప్రత్యేక స్థానం సంపాదించుకోవడం అతనికి పెరుగుతున్న స్టార్‌డమ్‌కు నిదర్శనం.

మిరాయ్ సినిమా కేవలం తెలుగు రాష్ట్రాల్లోనే కాదు, దేశవ్యాప్తంగా ప్రభావం చూపిస్తోంది. అడ్వెంచర్, మైథాలజీ, సూపర్ హీరో అంశాలు కలగలిపిన ఈ కథ అన్ని వర్గాల ప్రేక్షకులను ఆకర్షిస్తోంది. ముఖ్యంగా నార్త్ బెల్ట్‌లో సాధించిన ఈ వసూళ్లు, తేజ సజ్జా మార్కెట్‌ని కొత్తగా డిఫైన్ చేస్తున్నాయి. పాన్ ఇండియా స్థాయిలో వరుస విజయాలను అందుకోవడం చాలా అరుదు.

కానీ తేజ సజ్జా ఆ అరుదైన గౌరవాన్ని సంపాదించుకుంటూ, ఇండస్ట్రీలో తదుపరి పెద్ద పేరు అవుతున్నాడని స్పష్టమవుతోంది. ఇక ఈ విజయానికి మరో ముఖ్య కారణం దర్శకుడు కార్తీక్ ఘట్టమనేని. అతను రూపొందించిన విజువల్స్, కథనం, యాక్షన్ సన్నివేశాలు సినిమాలోని సూపర్ హీరో కాన్సెప్ట్‌కి మరింత బలం చేకూర్చాయి. మంచు మనోజ్ పోషించిన విలన్ రోల్, శ్రీయ సరన్ తల్లిగా చేసిన ఎమోషనల్ పెర్ఫార్మెన్స్ కూడా సినిమాకి మరింత బూస్ట్ ఇచ్చాయి. టెక్నికల్ డిపార్ట్‌మెంట్‌లో ఉన్న నాణ్యత హిందీ ఆడియన్స్‌ని కూడా ఆకట్టుకుంది.

సినిమా మూడో రోజు ముగిసే సరికి వరల్డ్‌వైడ్ గ్రాస్ 81 కోట్లను దాటేసింది. అందులో హిందీ బెల్ట్ నుంచి 10 కోట్ల పైగా రావడం, సాధారణమైన విషయమేమీ కాదని ట్రేడ్ అనలిస్ట్‌లు చెబుతున్నారు. చిన్న వయసులోనే ఈ రేంజ్‌లో విజయం సాధించడం తేజ సజ్జా కెరీర్‌కి మిరాయ్ గేమ్ ఛేంజర్ అని వారు అభిప్రాయపడుతున్నారు.

మొత్తానికి, మిరాయ్ తో తేజ సజ్జా తనకంటూ ఒక స్పెషల్ స్పేస్ క్రియేట్ చేసుకున్నాడు. వరుస పాన్ ఇండియా హిట్స్‌తో అతను ఇప్పుడు నెక్స్ట్ బిగ్ హీరోగా ఎదుగుతున్నాడని ఇండస్ట్రీలో చర్చ నడుస్తోంది. ఇలాగే కంటెంట్ ఆధారంగా సక్సెస్‌లు సాధిస్తే, త్వరలోనే టాప్ స్టార్స్ సరసన నిలుస్తాడనే నమ్మకం అభిమానుల్లో పెరుగుతోంది.