న్యూటన్స్ థర్డ్ లా ట్రైల‌ర్: క్యూరియాసిటీ పెంచిన‌ స‌స్పెన్స్ థ్రిల్లర్‌

ఈటీవీ విన్ థ్రిల్ల‌ర్ కాన్సెప్ట్‌తో నిర్మించిన `న్యూటన్స్ థర్డ్ లా` చిత్ర అధికారిక ట్రైలర్ విడుదలవ్వడంతో ప్రేక్షకుల్లో ఈ సినిమాపై ఆసక్తి ఒక్కసారిగా పెరిగింది. అక్కినేని హీరో సుమంత్ కథానాయకుడిగా నటించిన ఈ సస్పెన్స్ ఇన్వెస్టిగేటివ్ క్రైమ్ థ్రిల్లర్... జూలై 31న థియేటర్లలో విడుదలకు సిద్ధమవుతోంది. ట్రైలర్ గ్లింప్స్ విడుదలైనప్పటి నుంచి సినీ ప్రియులను, ముఖ్యంగా థ్రిల్లర్ సినిమాలను ఇష్టపడే ప్రేక్షకులను ఎంతగానో ఆకట్టుకుంటోంది.

వైవిధ్యభరితమైన కథలను ఎంచుకోవడంలో తనదైన శైలిని చాటుకునే సుమంత్ యార్లగడ్డ ఈ చిత్రంలో ఒక కీలకమైన పాత్రలో కనిపించనున్నారు. ఆయనతో పాటు వర్సటైల్ నటుడు జగపతి బాబు, నటుడు-దర్శకుడు అవసరాల శ్రీనివాస్ ప్రధాన పాత్రలు పోషిస్తున్నారు. షెల్లీ ఎన్ కుమార్, రవివర్మ, త్రినాథ్ వర్మ, నేహా పఠాన్ వంటి నటీనటులు ఇతర ముఖ్య పాత్రల్లో నటిస్తున్నారు. రాజేష్ కర్ణ దర్శకత్వంలో తెరకెక్కిన ఈ చిత్రానికి హరీష్ కోహిర్కర్ నిర్మాతగా వ్యవహరిస్తుండగా... సింజిత్ యెర్రమిల్లి సంగీతం .. వేదవ్యాస్ గొట్టిపాటి ఛాయాగ్రహణం అందించారు.

భౌతికశాస్త్రంలోని ``ప్రతి చర్యకు దానికి సమానమైన ప్రతిచర్య ఉంటుంది`` అనే భౌతిక సూత్రం (న్యూటన్ మూడో నియమం) ఆధారంగా ఈ కథాంశం రూపుదిద్దుకుంది. మానవ జీవితంలో చేసే ప్రతి పనికి..గతంలో తీసుకునే నిర్ణయాలకు భవిష్యత్తులో పరిణామాలు ఎలా ఎదురవుతాయి? అనే పాయింట్‌ను ఒక రహస్యమైన క్రైమ్ లేదా మర్డర్ మిస్టరీ ఇన్వెస్టిగేషన్ చుట్టూ దర్శకుడు ఆసక్తికరంగా మలిచినట్లు ట్రైలర్ చెబుతోంది. పగ, ద్రోహం, నమ్మలేని నిజాల కలబోతగా సాగే ఈ మైండ్ గేమ్ ప్రేక్షకులలో ఉత్కంఠను రేకెత్తిస్తోంది.

ట్రైలర్ విడుదలైన కొద్దిసేపటికే సోషల్ మీడియాలో ఆడియన్స్ నుండి మంచి స్పందన లభించింది. సుమంత్ గతంలో చేసిన `సుబ్రహ్మణ్యపురం`, `కపటధారి` వంటి థ్రిల్లర్ సినిమాల తరహాలోనే, ఈ సినిమా కూడా ఒక కంటెంట్ బేస్డ్ స్క్రిప్ట్‌గా నిలుస్తుందని ఫ్యాన్స్ భావిస్తున్నారు. ట్రైలర్ కట్, నేపథ్య సంగీతం, జగపతి బాబు-సుమంత్ కాంబినేషన్ సీన్స్ బాగున్నాయని కామెంట్స్ రూపంలో కాంప్లిమెంట్స్ వెల్లువెత్తుతున్నాయి.

మంచి టెక్నికల్ వాల్యూస్, బలమైన నటీనటుల ప్రతిభ..గ్రిప్పింగ్ కథనంతో వస్తున్న `న్యూటన్స్ థర్డ్ లా` ఈ నెలాఖరున టాలీవుడ్ బాక్సాఫీస్ వద్ద ఒక ఆసక్తికరమైన రేసును ప్రారంభించబోతోంది. డిజిటల్ ప్లాట్‌ఫామ్స్‌లో క్వాలిటీ కంటెంట్‌తో గుర్తింపు తెచ్చుకున్న ఈటీవీ విన్ సంస్థ థియేట్రికల్ రిలీజ్‌గా తెస్తున్న ఈ సినిమా ప్రేక్షకుల అంచనాలను ఎంతవరకు అందుకుంటుందో చూడాలి.