బిజీ మోడ్ లో నాని డైరెక్టర్లు.. తర్వాత ఏం చేస్తారో మరి..
ప్రస్తుతం నాని దృష్టంతా ప్యారడైజ్ పైనే ఉంది. భారీ స్థాయిలో తెరకెక్కుతున్న ఆ సినిమా కోసం ఎక్కువ సమయం కేటాయించాల్సి వస్తోంది.
By: M Prashanth | 3 July 2026 2:58 PM IST
నేచురల్ స్టార్ నానితో సినిమా చేయాలంటే ఇప్పుడు కాస్త ఓపిక అవసరమనే పరిస్థితి కనిపిస్తోంది. ది ప్యారడైజ్ వంటి భారీ ప్రాజెక్టుతో నాని పూర్తిగా బిజీగా ఉండటంతో, ఆయన కోసం కథలు సిద్ధం చేసుకున్న దర్శకులు ఎక్కువకాలం ఎదురుచూడకుండా తమ కెరీర్ లో గ్యాప్ రాకుండా కొత్త అవకాశాల వైపు అడుగులు వేస్తున్నారు. దీంతో ఒకప్పుడు నాని లైనప్ లో కనిపించిన పలువురు దర్శకులు ఇప్పుడు ఇతర స్టార్ హీరోలతో బిజీ అవ్వడం గమనార్హం.
ప్రస్తుతం నాని దృష్టంతా ప్యారడైజ్ పైనే ఉంది. భారీ స్థాయిలో తెరకెక్కుతున్న ఆ సినిమా కోసం ఎక్కువ సమయం కేటాయించాల్సి వస్తోంది. దీంతో ఆయన తదుపరి ప్రాజెక్టులు ఆలస్యమవుతున్నాయి. ఆ పరిస్థితిని అర్థం చేసుకున్న దర్శకులు కూడా కొత్త సినిమాలు చేసేందుకు ముందుకు వెళ్తున్నారు. ఆ జాబితాలో ముందుగా వినిపించే పేరు సుజీత్. నాని-సుజీత్ కాంబినేషన్ లో బ్లడీ రోమియో అనౌన్స్మెంట్ ఇప్పటికే వచ్చింది.
అయితే ఆ సినిమా ప్రారంభానికి సమయం పట్టే పరిస్థితి రావడంతో సుజీత్ ప్రస్తుతం పవన్ కళ్యాణ్ ఓజీ 2 పనులపై దృష్టి పెట్టారు. దీంతో నానితో సినిమా కొంతకాలం వాయిదా పడినట్లు కనిపిస్తోంది. హాయ్ నాన్నతో విజయాన్ని అందుకున్న దర్శకుడు శౌర్యువ్ పరిస్థితి కూడా దాదాపు ఇలాగే ఉంది. మరోసారి నానితో సినిమా చేయాలని ఆయన భావించినా, డేట్లు వెంటనే అందుబాటులో లేవు. దీంతో శౌర్యువ్ ఇప్పుడు విజయ్ దేవరకొండతో కొత్త సినిమాను తెరకెక్కించే పనిలో బిజీ అయ్యారు.
అదే విధంగా జై భీమ్ దర్శకుడు టీజే జ్ఞానవేల్ కూడా నానితో సినిమా చేయాలని చాలాకాలం చర్చలు జరిపారు. కథ కూడా ఓకే అయినట్టు ప్రచారం జరిగింది. కానీ నాని వరుస కమిట్మెంట్ల కారణంగా ప్రారంభం కాలేదు. దీంతో జ్ఞానవేల్ ఆలస్యం చేయకుండా సూర్యతో సినిమా ప్రారంభించారు. ప్రస్తుతం ఆ ప్రాజెక్టుతో ఆయన పూర్తిగా బిజీగా ఉన్నారు. సినీ పరిశ్రమలో ఒక సినిమా కోసం ఏళ్లపాటు ఎదురుచూడడం దర్శకులకు అంత ఈజీ కాదు.
కథ సిద్ధంగా ఉన్నా, హీరో డేట్లు ఆలస్యమైతే కెరీర్పై ప్రభావం పడే అవకాశం ఉంటుంది. అందుకే చాలా మంది దర్శకులు వచ్చిన అవకాశాన్ని వదులుకోకుండా మరో హీరోతో సినిమాలు చేయడానికి ప్రాధాన్యం ఇస్తున్నారు. ఇప్పుడు నాని లైనప్ లో ఉన్న దర్శకులు కూడా అదే మార్గాన్ని ఎంచుకున్నట్లు కనిపిస్తోంది. అయితే దీనివల్ల నాని-సుజీత్, నాని-శౌర్యువ్, నాని-టీజే జ్ఞానవేల్ కాంబినేషన్లు ఆగిపోయాయని చెప్పలేం.
ప్రస్తుతం తమ తమ ప్రాజెక్టులు పూర్తి చేసిన తర్వాత మళ్లీ ఆ కాంబినేషన్లలో సినిమాలు వచ్చే అవకాశం ఉంది. కానీ అది ఎప్పుడు జరుగుతుందనేది చెప్పలేం. ఏదేమైనా నాని కోసం ఎదురుచూడడం కంటే కెరీర్ లో గ్యాప్ రాకుండా కొత్త అవకాశాలను అందిపుచ్చుకోవడానికి ఆయన దర్శకులు మొగ్గు చూపుతున్నారు. ఇప్పుడు ఆ బిజీ షెడ్యూల్స్ పూర్తయిన తర్వాత వారు మళ్లీ నానితో చేతులు కలుపుతారా లేదా అన్నది వేచి చూడాలి.