100 కోట్ల డైరెక్టర్స్.. సుజిత్ డైనమిక్ రికార్డ్!

పవర్ స్టార్ పవన్ కళ్యాణ్ సినిమాలకి మాస్ హంగామా ఎలా ఉంటుందో ప్రత్యేకంగా చెప్పనక్కర్లేదు. కానీ ఈ సారి ఓజీకి వచ్చిన క్రేజ్ మాత్రం వేరే లెవెల్‌లో ఉంది. రిలీజ్‌కి ముందే అమెరికా, ఇండియా, ఓవర్సీస్ అన్నీ కలిపి ప్రీ సేల్స్ రికార్డులు సృష్టించాయి. బుకింగ్స్ ఓపెన్ అయిన దగ్గర నుంచి టికెట్లు హాట్‌కేక్స్‌లా అమ్ముడవుతూ, ఒక్కో సెంటర్‌లో షోలు హౌస్‌ఫుల్ అయ్యాయి. పవన్ మేనియా ఎక్కడ చూసినా ఊపిరి ఆడనివ్వని స్థాయిలో కొనసాగింది.

ఈ భారీ క్రేజ్ ఫలితంగా ఓజీ రిలీజ్ డే కలెక్షన్లు రికార్డ్ అనే చెప్పాలి. ట్రేడ్ టాక్ ప్రకారం మొదటి రోజే సినిమా రూ.100 కోట్లకు పైగా గ్రాస్ వసూలు అవుతున్నట్లు తెలుస్తోంది. ఇది పవన్ కళ్యాణ్ కెరీర్‌లోనే కాదు, టాలీవుడ్ రికార్డుల్లోనూ ఒక అరుదైన ఘనత. బెనిఫిట్ షోలు, స్పెషల్ ప్రీమియర్స్‌తో కలిపి ఈ సంఖ్య మరింత పెరిగే అవకాశం ఉంది. బాక్సాఫీస్‌లో ఓజీ బలమైన ఆరంభం సాధించడంతో ఫ్యాన్స్ ఆనందంలో మునిగిపోయారు.

ఇక ఓపెనింగ్ డే 100 కోట్ల క్లబ్‌లోకి ప్రవేశించడం పవన్‌కే కాదు, దర్శకుడు సుజీత్‌కూ కూడా ఒక బిగ్ రికార్డ్. ఇంతకు ముందు తెరకెక్కించిన సాహో కూడా తొలి రోజు 100 కోట్లకు పైగా వసూళ్లు సాధించింది. ఇప్పుడు ఓజీతో కూడా అదే ఘనతను అందుకున్నారు. దీంతో సుజీత్ ఇప్పుడు బ్యాక్ టు బ్యాక్ 100 కోట్ల ఓపెనర్స్ అందించిన డైరెక్టర్స్ జాబితాలోకి చేరిపోయారు.

ఇప్పటి వరకు ఈ లెవెల్ ఫీట్ సాధించిన డైరెక్టర్స్ చాలా తక్కువమంది మాత్రమే. రాజమౌళి బాహుబలి 2, ఆర్ఆర్ఆర్ సినిమాలతో ఈ రికార్డ్ అందుకున్నారు. ప్రశాంత్ నీల్ కేజీఎఫ్ 2, సలార్ సినిమాలతో ఈ లిస్ట్‌లోకి వచ్చారు. లోకేష్ కనగరాజ్ లియో, కూలీతో ఈ ఫీట్ సాధించారు. ఇప్పుడు సుజీత్ కూడా సాహో, ఓజీతో ఈ ప్రతిష్టాత్మక లైన్‌లో చేరారు.

దీంతో తెలుగు డైరెక్టర్స్‌లో ఒక ప్రత్యేకమైన రికార్డ్ ని సుజీత్ అందుకున్నారు. ఒకే డైరెక్టర్ వరుసగా రెండు సినిమాలతో 100 కోట్ల ఓపెనింగ్ సాధించడం అనేది సులభం కాదు. పెద్ద స్టార్ హీరోలు, భారీ బడ్జెట్ ప్రాజెక్టులు, అలాగే ఆడియన్స్‌లోని హైప్ కలసివస్తే మాత్రమే ఇది సాధ్యం. సుజీత్ ఇప్పుడు అలాంటి అరుదైన ఘనతను అందుకున్నారు.

మొత్తం మీద పవన్ కళ్యాణ్ ఓజీ రిలీజ్ డే ప్రభంజనం బాక్సాఫీస్ వాతావరణాన్ని మార్చేసింది. ప్రీ సేల్స్ మేనియా, ఓపెనింగ్ డే 100 కోట్ల రికార్డ్, డైరెక్టర్ సుజీత్ చేరిన ఎలైట్ లిస్ట్ ఇవన్నీ కలిపి ఓజీని ఈ ఏడాది అతిపెద్ద హిట్‌లలో ఒకటిగా నిలిపేలా ఉన్నాయి. ఇక ఓజి సినిమా కంటెంట్ ఆడియెన్స్ కి పూర్తి స్థాయిలో కనెక్ట్ అయితే మరిన్ని రికార్డులు బద్దలుకొట్టడం ఖాయం.