కంబ్యాక్ కోసం శ్రీనువైట్ల ప్రయత్నం ఫలిస్తుందా? 'జార్జ్ క్రిష్'తో నాటి వైభవం సాధ్యమేనా?

తెలుగు చిత్రసీమలో ఒకప్పుడు `శ్రీనువైట్ల మార్క్` కామెడీ అంటే థియేటర్లలో నవ్వుల పండగే. ఢీ, రెడీ, దూకుడు వంటి బ్లాక్‌బస్టర్ చిత్రాలతో టాలీవుడ్‌లో వినోదానికి సరికొత్త అర్ధాన్ని చెప్పిన శ్రీనువైట్ల, ఆ తర్వాత కాలంలో రొటీన్ ఫార్ములా సినిమాలతో ఫ్లాపుల బాటపట్టారు. ఒకే తరహా పాత్రలు, బ్రహ్మానందం ప్యాటర్న్ ప్రహసనాలపై ప్రేక్షకులు తీవ్ర విసుగు చెంది ఆయన శైలిని తిరస్కరించడం ప్రారంభించారు. దీంతో దాదాపు దశాబ్ద కాలంగా సరైన విజయం లేక వెనుకబడిన శ్రీనువైట్ల.. త‌న సెకండ్ ఇన్నింగ్స్ లో కూడా అవే త‌ప్పులు చేసి దొరికిపోయాడు. మాస్ రాజా వంటి వారు కూడా అత‌డిని ఆదుకోలేక‌పోయారు. కానీ ఇప్పుడు శ‌ర్వానంద్ `జార్జ్ క్రిష్` చిత్రంతో తన పూర్వ వైభవాన్ని పునరుద్ధరించుకోవడానికి తీవ్ర ప్రయత్నాలు చేస్తున్నారు.

వైట్ల మార్క్ కామెడీపై విసుగు చెందిన ప్రేక్షకులు ఇప్పుడు ఆయన నుంచి అవుట్ అండ్ అవుట్ కొత్తదనం నిండిన ఫార్ములాని, ఆధునికమైన నవ్వులను ఆశిస్తున్నారు. ఇలాంటి క్లిష్ట సమయంలో వైవిధ్యమైన కథలను ఎంచుకోవడంలో దిట్ట అయిన శర్వానంద్ ఆయనకు ఈ `చివరి అవకాశం` ఇవ్వడం పరిశ్రమలో ఆసక్తికరంగా మారింది. ప్రయోగాత్మక చిత్రాలు చేస్తూనే ఎంటర్‌టైన్‌మెంట్ మైంటైన్ చేసే శర్వానంద్.. ఫామ్‌లో లేని దర్శకుడితో హ్యాండ్ కలపడం కొంత రిస్క్‌తో కూడుకున్న వ్యవహారమే. అయినా కథలోని ఫన్, పాత్రల వైవిధ్యం నచ్చి శర్వా ఈ ప్రాజెక్ట్‌కు గ్రీన్ సిగ్నల్ ఇచ్చినట్లు తెలుస్తోంది.

ఈ చిత్రంలో శ్రీనువైట్ల తన పాత ఫార్ములాకు స్వస్తి పలికి... డిఫరెంట్ జానర్‌లో న్యూ-ఏజ్ ఫన్‌ను క్రియేట్ చేయడానికి ప్రయత్నిస్తున్నట్లు చిత్ర బృందం చెబుతోంది. మునుపటి రొటీన్ కామెడీ భిన్నంగా రెట్రో అండ్ మాస్ ఎలిమెంట్స్‌తో కూడిన పూర్తిస్థాయి పండగ ఎంటర్‌టైనర్‌గా `జార్జ్ క్రిష్`ను తీర్చిదిద్దుతున్నారు. ఇక ఫెమినా మిస్ ఇండియా విజేత మానస వారణాసి కథానాయికగా నటించడం సినిమాకు అదనపు గ్లామర్ అట్రాక్షన్ కానుంది. గ్లామర్‌తో పాటు నటనకు ప్రాధాన్యమున్న పాత్ర కావడంతో ఈ మిస్ బ్యూటీ సినిమాకు పెద్ద ప్లస్ పాయింట్‌గా మారే అవకాశాలు కనిపిస్తున్నాయి.

`జార్జ్ క్రిష్` చిత్రం సాంకేతికంగానూ ఎంతో బలంగా రూపొందుతోంది. ఎకే ఎంటర్‌టైన్‌మెంట్స్ పతాకంపై రామబ్రహ్మం సుంకర నిర్మిస్తున్న ఈ చిత్రానికి ప్రముఖ సంగీత దర్శకుడు అనూప్ రూబెన్స్ స్వరాలు అందిస్తుండగా.. కె.వి. గుహన్ ఛాయాగ్రాహకుడిగా.. అమర్ రెడ్డి కుడుముల ఎడిటర్‌గా వ్యవహరిస్తున్నారు. అమరనాథ్ అండ్ గ్యాంగ్ డిజైన్ చేసిన కథా కథనాలు వినోదంతో పాటు థ్రిల్లింగ్ ఎలిమెంట్స్‌ను కలిగి ఉంటాయని తెలుస్తోంది. ఇటీవల విడుదలైన `ఫస్ట్ బూస్టర్` టైటిల్ టీజర్ వినోదాత్మకంగా ఉండటంతో సినిమాపై సానుకూల వాతావరణం ఏర్పడింది.

మొత్తానికి శ్రీనువైట్ల మళ్లీ ఫామ్‌లోకి వచ్చి బాక్సాఫీస్ వద్ద తన సత్తా చాటుతారా లేదా అనేది వేచి చూడాలి. 2027 సంక్రాంతి కానుకగా (జనవరి 14న) ప్రేక్షకుల ముందుకు రాబోతున్న ఈ `జార్జ్ క్రిష్` శర్వానంద్‌కి మరో హిట్‌ను అందించి శ్రీనువైట్లకు కోల్పోయిన గతా వైభవాన్ని తెచ్చిపెడుతుందో లేదో చూడాలి!