డేంజర్ జోన్‌లో సీనియర్ హీరోయిన్ల‌ కెరీర్?

హీరోయిన్ల‌ కెరీర్ స్పాన్ త‌క్కువ‌గానే ఉంటుంద‌న్న‌ది కాద‌న‌లేని నిజం. హీరోల‌కు ఉన్నంత డిమాండ్ హీరోయిన్ల‌కు ఉండ‌దు. మేక‌ర్స్ కొత్త భామ‌ల‌కు ఇచ్చే ప్రాధాన్య‌త సీనియ‌ర్ల‌కు ఇవ్వ‌రు. ఎంత‌టి అగ్ర నాయికలైనా వరుస విజయాలు ప‌డ‌క‌పోతే? ఇండస్ట్రీలో నిలదొక్కుకోవడం కష్టంగానే ఉంటుంది. ప్రస్తుతం టాలీవుడ్ నుంచి కోలీవుడ్ వరకు బాక్సాఫీస్‌ను ఏలిన కొందరు సీనియర్ స్టార్ హీరోయిన్ల కెరీర్ ఒడుదొడుకులను ఎదుర్కొంటోంది. కాజల్ అగర్వాల్, తమన్నా , కీర్తి సురేష్ వంటి భామ‌ల‌కు ఇటీవల ఆశించిన స్థాయిలో హిట్లు పడకపోవడంతో కెరీర్ డేంజర్ జోన్‌లోకి వెళ్ళిపోయిందనే చర్చ జోరుగా సాగుతోంది.

ఒకానొక దశలో దశాబ్దానికి పైగా నంబర్ వన్ స్థానంలో కొనసాగిన చందమామ కాజల్ అగర్వాల్ మాతృత్వపు విరామం తర్వాత రీఎంట్రీ ఇచ్చినా? ఆశించిన సక్సెస్ రాలేదు. కాజ‌ల్ ప్రధాన పాత్రలో నటించిన చిత్రాలు బాక్సాఫీస్ వద్ద బోల్తా పడటంతో మేకర్స్ ఆమెను లీడ్ రోల్స్ కోసం సంప్రదించడానికి వెనుకడుగు వేస్తున్నారు. అలాగే మిల్కీ బ్యూటీ తమన్నా కెరీర్ కూడా కీలకమైన మలుపులోనే ఉంది. స్పెషల్ సాంగ్స్, డిజిటల్ ప్రాజెక్ట్‌లతో హడావుడి చేస్తున్నా? సోలో హీరోయిన్‌గా .. బలమైన పాత్రలతో సరైన హిట్ పడి చాలా కాలమే అవుతోంది.

ఇక జాతీయ ఉత్తమ నటిగా నీరాజ‌నాలు అందుకున్న‌ కీర్తి సురేష్ పరిస్థితి కూడా ఇందుకు భిన్నంగా లేదు. `మహానటి` తర్వాత ఆ స్థాయి గుర్తింపునిచ్చే? మరో బలమైన సక్సెస్ పడలేదు. ప్రయోగాత్మక పాత్రలు, లేడీ ఓరియెంటెడ్ సినిమాలతో పాటు కమర్షియల్ చిత్రాలు చేసినా? అవి బాక్సాఫీస్ వద్ద ఆశించిన ఫలితాలివ్వ‌లేదు.దీంతో అమ్మ‌డి కెరీర్ ఊగిసలాటలో పడింది. కొత్త తరం భామల తాకిడి పెరుగుతున్న నేప‌థ్యంలో సీనియర్ భామ‌ల‌కు మేకర్స్ నుంచి అవ‌కాశాలు త‌గ్గిపోతున్నాయి.

పరిశ్రమలో గ్లామర్, టాలెంట్ ఎంత ఉన్నా? బాక్సాఫీస్ వద్ద సక్సెస్ రేట్ లేకపోతే క్వీన్‌లుగా వెలిగిన వారైనా? సైడ్ అయిపోక తప్పదనేది మరోసారి రుజువవుతోంది. యంగ్ జనరేషన్ హీరోయిన్లు దూసుకొస్తుండ‌టం మేకర్స్ కూడా కొత్త ముఖాల వైపు మొగ్గు చూపుతుండటంతో సీనియర్ హీరోయిన్లకు డిమాండ్ క్రమంగా తగ్గుతోంది. ముఖ్యంగా కమర్షియల్ మాస్ చిత్రాలలో లీడ్ రోల్స్ దక్కడం గగనంగా మార‌డం వారి కెరీర్‌కు పెద్ద మైనస్‌గా మారుతోంది.

మరి ఈ పరిస్థితి నుంచి బయటపడాలంటే ముద్దుగుమ్మలు పంథాను మార్చుకోవాల్సిన అవసరం ఎంతైనా ఉంది. రొటీన్ కమర్షియల్ పాత్రలకే పరిమితం కాకుండా నటనకు ఆస్కారమున్న వైవిధ్యమైన పాత్రలు .. ఓటీటీ లో కంటెంట్ ఓరియెంటెడ్ ప్రాజెక్ట్‌లను ఎంచుకుంటేనే మళ్లీ రేసులోకి వచ్చే అవకాశం ఉంటుంది. అయితే లేడీ సూప‌ర్ స్టార్ న‌య‌న‌తార ప్ర‌యాణం మాత్రం వీరంద‌రికీ భిన్నంగానే ఉంది. కొన్ని ప‌రాజ‌యాలు ఎదురైనా? అమ్మ‌డి స్టార్ డ‌మ్ మాత్రం ఎక్క‌డా కింగ లేదు. అవ‌కాశాలు అమ్మ‌డి కోసం క్యూలో ఉన్నాయి అన్న‌ది కాద‌న‌లేని నిజం