స్క్రిప్టు ప్ర‌కారం స్టార్ హీరోయిన్‌ని లైన్‌లో పెట్టిన యంగ్ హీరో

వెండితెర కోసం రాసిన స్క్రిప్టులు అప్పుడప్పుడు నిజ జీవితంలో కూడా నిజమవుతుంటాయి. సరిగ్గా ఇదే విషయం ప్రముఖ యువకథానాయకుడు.. ప్రముఖ స్టార్ హీరోయిన్ విషయంలో జరిగింది. ఒకప్పుడు కేవలం సరదా కోసం.. ఒక అవార్డు ఫంక్షన్ స్క్రిప్టు ప్రకారం ఆ యువకథానాయకుడు అడిగిన ప్రశ్న.. కాలక్రమేణా వారిద్దరినీ పెళ్లి పీటల వరకు తీసుకెళ్లి.. ఒక అందమైన ప్రేమకథగా మారింది.

దీనికి సంబంధించిన ఆసక్తికరమైన నేపథ్యం 2018 నాటి స్క్రీన్ అవార్డ్స్ వేడుకలో ఉంది. ఆ సమయంలో వేదికపై ఉన్న యువకథానాయకుడు, ఆ ప్రముఖ స్టార్ హీరోయిన్ స్టేజ్ దిగి వెళ్తున్నప్పుడు త‌న‌ను ఆపి.. ముఝ్సే షాదీ కరోగే? (నన్ను పెళ్లి చేసుకుంటావా?) అని సరదాగా ప్రశ్నించారు. ఈ అనూహ్యమైన ప్రశ్నతో ఆ స్టార్ హీరోయిన్ ఒక్కసారిగా ఆశ్చర్యపోగా.. అక్కడే ఉన్న ఆమె ల‌వ‌ర్ స్పందన కూడా అప్పట్లో సోషల్ మీడియాలో పెద్ద ఎత్తున వైరల్ అయ్యింది.

అయితే ఈ ప్రపోజల్ వెనుక అసలు రహస్యాన్ని ఆ ప్రముఖ యువకథానాయకుడు తర్వాత ఒక ఇంటర్వ్యూలో బయటపెట్టారు. అప్పట్లో తను చేసిన ఆ పని పూర్తిగా స్క్రిప్టులో భాగమేనని వివరించారు. ఆ షో నిర్వాహకులు రాసిన స్క్రిప్టు ప్రకారం.. అక్కడ ఉన్న పలువురు హీరోయిన్లను ఇదే విధంగా సరదాగా ఆటపట్టించాలి. కానీ అందరి కంటే ఎక్కువగా ఆ ప్రముఖ స్టార్ హీరోయిన్ తో ఆయన చేసిన ఆ చిలిపి సంభాషణే ప్రేక్షకులను విపరీతంగా ఆకర్షించింది.

స్క్రిప్టు ప్రకారం మొదలైన ఆ పరిచయం.. ఆ తర్వాత కాలంలో వారిద్దరి మధ్య బలమైన బంధానికి దారితీసింది. కొన్నాళ్ల పాటు రహస్యంగా ప్రేమాయణం సాగించిన ఈ జంట చివరకు 2021లో రాజస్థాన్ వేదికగా అంగ‌రంగ వైభ‌వ‌మైన పెళ్లితో కంచికి చేరుకుంది. ఒకప్పుడు స్టేజ్ మీద జోక్ కోసం అడిగిన పెళ్లి ప్రపోజల్.. నిజ జీవితంలో వాస్తవ రూపం దాల్చడం అభిమానుల‌కు నిజంగా ఒక షాక్ లాంటిది. ఒక ర‌కంగా ఆ ప్ర‌పోజ‌ల్ విన్న అగ్ర క‌థానాయిక లైఫ్ కి కీల‌కమైన మ‌లుపు.

ప్ర‌స్తుతం స్క్రిప్టు రాసిన వారు కూడా ఊహించని విధంగా ఆ ప్రముఖ యువకథానాయకుడు .. స్టార్ హీరోయిన్ ను పద్ధతిగా లైన్‌లో పెట్టాడని నెటిజన్లు కామెంట్స్ చేస్తున్నారు. విధి రాసిన స్క్రిప్టు ముందు మనుషులు రాసిన స్క్రిప్టులు ఎంత చిన్నవో ఈ జంటను చూస్తే అర్థమవుతుందని నెటిజన్లు ముచ్చటపడుతున్నారు.