ఈ స్టార్ హీరో విల‌న్ పాత్ర‌లు చేసుకుంటేనే బెస్ట్

భారతీయ చలనచిత్ర రంగంలో తనకంటూ ఒక ప్రత్యేకమైన బ్రాండ్ ఇమేజ్‌ను సొంతం చేసుకున్న నటుడు సంజయ్ దత్ (సంజూ భాయ్). ఒకప్పుడు బాలీవుడ్‌లో స్టార్ హీరోగా ఒక వెలుగు వెలిగిన ఆయన సెకండ్ ఇన్నింగ్స్‌లో విలక్షణమైన పాత్రలతో అలరిస్తున్నారు. ఇటీవల బాక్సాఫీస్ వద్ద దాదాపు 3000 కోట్ల రూపాయల భారీ వసూళ్లను సాధించిన దురంధర్, దురంధర్ 2 వంటి ప్రతిష్టాత్మక మల్టీస్టారర్ చిత్రాలలో సంజయ్ దత్ నటించి మెప్పించారు. ఈ మెగా ప్రాజెక్టులలో రణ్‌వీర్ సింగ్ అసాధారణ నటనతో పాటు, సంజూ భాయ్ పోషించిన అత్యంత ప్రభావవంతమైన ఎస్పీ చౌద‌రి అస్లామ్ పాత్ర ప్రేక్షకుల మనసు గెలుచుకుంది. ఈ బెంచ్ మార్క్ పెర్ఫార్మెన్స్‌కు సినీ వర్గాల నుండి గొప్ప ప్రశంసలు దక్కాయి.

నిజానికి సంజయ్ దత్‌కు నెగెటివ్ షేడ్స్ ఉన్న పాత్రలు కొత్తేమీ కాదు. గతంలో `అగ్నిపథ్` చిత్రంలో కాంచా చీనాగా వణికించిన అత‌డు ఆ తర్వాత `కేజీఎఫ్ 2`లో `అధీరా` అనే క్రూర‌మైన విల‌న్ పాత్రలో చూపించిన నటన నభూతో నభవిష్యతి అనే చెప్పాలి. ఆ పవర్‌ఫుల్ విలనిజం సినిమా విజయానికి ప్రధాన బలమై నిలిచింది. అలాగే టాలీవుడ్‌లో రామ్ పోతినేని నటించిన సినిమాలో కూడా సంజూ భాయ్ అద్భుతమైన నటనాభినయంతో తెలుగు ప్రేక్షకులను అలరించారు. సౌత్ ఇండియన్ సినిమాలలో విలన్ వేషాలతో పాటు కీలకమైన సహాయక పాత్రలు చేయడం అత‌డికి నటుడిగా సరికొత్త మైలేజ్ ఇచ్చింది. దీనివల్ల ఉత్తరాదిన అవకాశాలతో సంబంధం లేకుండా ఇక్కడ మోస్ట్ బిజీ నటుడిగా మారిపోయారు.

ఇలాంటి వైవిధ్యమైన పాత్రలతో కెరీర్ పరంగా సంజూ భాయ్ అత్యుత్తమ దశలో ఉన్న తరుణంలో ఆయన మళ్లీ హీరోగా చేసిన ప్రయత్నం వికటించింది. సంజయ్ దత్ ప్రధాన కథానాయకుడిగా నటించిన తాజా బాలీవుడ్ చిత్రం `ఆఖ‌రి స‌వాల్` బాక్సాఫీస్ వద్ద దారుణంగా విఫలమైంది. కనీసం తొలి వీకెండ్‌లో 3 కోట్ల రూపాయల కలెక్షన్లను కూడా రాబట్టలేక బాక్సాఫీస్ వద్ద చతికిలబడటంతో ట్రేడ్ వర్గాలు షాక్‌కు గురయ్యాయి. ఈ ఘోర పరాజయాన్ని చూసిన నెటిజన్లు ఆయన అభిమానులు సోషల్ మీడియా వేదికగా పెదవి విరుస్తున్నారు.

ఈ నేపథ్యంలోనే సంజూ భాయ్ ఇకపై అనవసరంగా హీరోగా సినిమాలు చేసి చేతులు కాల్చుకోకుండా.. కేవలం విలన్ పాత్రలనే కంటిన్యూ చేస్తే బెస్ట్ అని సోషల్ మీడియాలో నెటిజన్లు గట్టిగా అభిప్రాయపడుతున్నారు. ఎందుకంటే ప్రస్తుత తరం ప్రేక్షకులు పెద్ద హీరోలను కూడా నెగెటివ్ పాత్రల్లో చూడటానికే ఎక్కువ ఇష్టపడుతున్నారు. సంజయ్ దత్ లాంటి భారీ పర్సనాలిటీ ఉన్న నటుడికి స్క్రీన్ ప్రెజెన్స్, రౌద్ర రసం పండించే క్రూరమైన విలన్ పాత్రలు పర్ఫెక్ట్‌గా సూట్ అవుతాయి. విలన్ క్యారెక్టర్లలో ఆయన రేంజ్.. డిమాండ్ ఎప్పుడూ తగ్గవని విశ్లేషకులు చెబుతున్నారు.

మొత్తానికి ఒకప్పటి స్టార్ హీరోలు వయసుకు తగ్గట్టుగా విలన్లుగా, క్యారెక్టర్ ఆర్టిస్టులుగా మారడం ఇండస్ట్రీలో సహజమే. మునుముందు సంజయ్ దత్ ఈ విషయాన్ని గ్రహించి హీరోగా సోలో ప్రయోగాలు పక్కనబెట్టి `అధీరా` వంటి మైండ్ బ్లోయింగ్ విలన్ పాత్రలపైనే దృష్టి పెట్టాలని అందరూ కోరుకుంటున్నారు. సౌత్ సినిమాల ద్వారా లభిస్తున్న క్రేజ్‌ను నిలబెట్టుకుంటూ విలనిజంలో సరికొత్త రికార్డులు సృష్టించడమే సంజూ భాయ్‌కు నటుడిగా సేఫ్ అండ్ బెస్ట్ రూట్ అని చెప్పక తప్పదు.