'స్పిరిట్' క్యాస్టింగ్.. సందీప్ మాస్టర్ ప్లానా? లేక రిస్కా?

సందీప్ రెడ్డి వంగా.. ఈ పేరు వింటేనే ఆడియన్స్‌కు గుర్తొచ్చేది రా, ఇంటెన్స్, అన్‌కన్వెన్షనల్ సినిమాలు. ఆయన క్యారెక్టర్లు ఎంత పవర్‌ఫుల్‌గా ఉంటాయో, వాటిని పోషించే నటుల ఎంపిక కూడా అంతే అనూహ్యంగా ఉంటుంది. 'అర్జున్ రెడ్డి'లో విజయ్ దేవరకొండను ఒక యాంగ్రీ యంగ్ మ్యాన్‌గా చూపిస్తే, 'యానిమల్'లో రణ్‌బీర్ కపూర్‌లోని వైల్డ్ యాంగిల్‌ను బయటకు తీశారు. ఇప్పుడు ప్రభాస్‌తో చేస్తున్న 'స్పిరిట్' విషయంలోనూ ఆయన క్యాస్టింగ్ ఛాయిస్‌లు మరోసారి ఇండస్ట్రీలో పెద్ద చర్చకు దారితీశాయి.

ప్రభాస్ సరసన తృప్తి దిమ్రి, కీలక పాత్రలో కాంచన.. ఈ ఎంపికలు ఫ్యాన్స్‌కు పెద్దగా షాక్ ఇవ్వలేదు. కానీ, మరో కీలక పాత్ర కోసం సందీప్ ఎంచుకున్న పేరు వినగానే చాలామంది ఆశ్చర్యపోయారు. ఆ పేరు వివేక్ ఒబెరాయ్. 'స్పిరిట్' లాంటి ఒక భారీ పాన్ ఇండియా ప్రాజెక్ట్‌లో, అదీ ప్రభాస్‌కు పోటీగా నిలిచే పాత్రలో, చాలా కాలంగా పెద్దగా ఫామ్‌లో లేని వివేక్‌ను తీసుకోవడం వెనుక సందీప్ ఆలోచన ఏంటి? అనేది ఇప్పుడు అసలు ప్రశ్న.

ఫ్యాన్స్‌లో కొందరు ఈ ఎంపికపై నిరాశ వ్యక్తం చేస్తున్నారు. ఇంత పెద్ద ప్రాజెక్ట్‌కు, ప్రస్తుత ట్రెండ్‌కు తగ్గట్టుగా సౌత్ నుంచో, బాలీవుడ్ నుంచో ఒక పెద్ద స్టార్‌ను విలన్‌గా తీసుకుంటారని ఊహించారు. కానీ, సందీప్ మాత్రం అందరి అంచనాలను తలకిందులు చేస్తూ, వివేక్‌ను లైన్‌లోకి తెచ్చాడు. ఇది సినిమాకు మైనస్ అవుతుందేమోనని కొందరు ఆందోళన చెందుతున్నారు.

అయితే, సందీప్ రెడ్డి వంగా ట్రాక్ రికార్డ్ తెలిసిన వాళ్లు మాత్రం దీన్ని మరో మాస్టర్ స్ట్రోక్‌గా చూస్తున్నారు. 'యానిమల్' సినిమాకు ముందు బాబీ డియోల్ పరిస్థితి కూడా దాదాపు ఇలాగే ఉండేది. కానీ, సందీప్ ఆయన్ను ఒక పవర్‌ఫుల్ విలన్‌గా రీ లాంచ్ చేసి, అతని సెకండ్ ఇన్నింగ్స్‌కు అదిరిపోయే బూస్ట్ ఇచ్చాడు. ఇప్పుడు వివేక్ ఒబెరాయ్ విషయంలోనూ అదే జరగబోతోందని, అతనిలోని అసలైన నటుడిని సందీప్ బయటకు తీయబోతున్నాడని ఇంకొందరు బలంగా నమ్ముతున్నారు.

నిజానికి, వివేక్ ఒబెరాయ్ ఒక ప్రూవ్డ్ యాక్టర్. ముఖ్యంగా నెగటివ్ షేడ్స్ ఉన్న పాత్రల్లో ఆయన పెర్ఫార్మెన్స్ అద్భుతంగా ఉంటుంది. 'కంపెనీ', 'రక్త చరిత్ర' లాంటి సినిమాలే దీనికి ఉదాహరణ. బహుశా, 'స్పిరిట్'లోని ఆ కీలక పాత్రకు కావాల్సిన ఇంటెన్సిటీ, క్రూరత్వం వివేక్‌లో చూసి సందీప్ అతన్ని ఎంచుకుని ఉండొచ్చు. స్టార్‌డమ్ కంటే, పాత్రకు ఎవరు పర్ఫెక్ట్‌గా సూట్ అవుతారనే దానికే ఆయన ఎక్కువ విలువిచ్చి ఉండొచ్చు.

మొత్తం మీద, వివేక్ ఒబెరాయ్ ఎంపిక 'స్పిరిట్'పై అంచనాలను తగ్గించలేదు, కానీ ఒక కొత్త రకమైన క్యూరియాసిటీని పెంచింది. ఇది సందీప్ తీసుకున్న రిస్క్ అవుతుందా లేక బాబీ డియోల్ లాంటి మరో సక్సెస్ స్టోరీ రిపీట్ అవుతుందా అనేది తెలియాలంటే సినిమా విడుదల వరకు ఆగాల్సిందే.