ట్రెండింగ్: 'బంగారం' లాంటి మ‌హిళా శ‌క్తులు

టాలీవుడ్‌లో సమంత రూత్ ప్రభు, దర్శకురాలు నందిని రెడ్డి, ఫ్యాషన్ డిజైనర్ శిల్పా రెడ్డిల స్నేహం ఒక ప్రత్యేకమైన బంధం. ఆ ముగ్గురినీ `బంగారం` లాంటి మహిళా శక్తులుగా అభివర్ణించవచ్చు. వృత్తిపరంగా ఎవరి రంగాల్లో వారు అగ్రగామిగా ఉన్నా కానీ.. వ్యక్తిగత జీవితంలో ఒకరికి ఒకరు వెన్నంటి ఉంటూ మహిళా సాధికారతకు నిలువెత్తు రూపాలుగా నిలుస్తున్నారు. అంతర్జాతీయ మహిళా దినోత్సవం సందర్భంగా ఈ ముగ్గురూ ఒకే వేదికపైకి వచ్చి తమ స్నేహం గురించి ఆసక్తికర విషయాలు పంచుకున్నారు.

ఈ సందర్భంగా వారు మాట్లాడుతూ.. మహిళలు ఒకరికొకరు తోడుగా నిలబడటమే అసలైన శక్తి అని వ్యాఖ్యానించారు. ముఖ్యంగా కష్టకాలంలో తమ స్నేహం తమను ఎలా నిలబెట్టిందో గుర్తుచేసుకున్నారు. కేవలం సంతోష సమయాల్లోనే కాకుండా, వైఫల్యాలు ఎదురైనప్పుడు కూడా ఒకరినొకరు ప్రోత్సహించుకుంటూ ముందుకు సాగడమే తమ బంధంలోని అసలైన రహస్యమని వారు తెలిపారు. మహిళా దినోత్సవం అంటే కేవలం వేడుక మాత్రమే కాదు.. అది ఒకరి స్ఫూర్తిని మరొకరు గౌరవించుకునే రోజు అని వారు ఈ వేదిక ద్వారా సందేశాన్ని ఇచ్చారు.

`మా ఇంటి బంగారం` చిత్ర విశేషాలు:

2026 అంతర్జాతీయ మహిళా దినోత్సవం వేళ నటి సమంత రూత్ ప్రభు తన సోషల్ మీడియా వేదికగా మహిళా శక్తికి అద్భుతమైన నివాళి అర్పించారు. తన జీవితంలో ఎదురైన అద్భుతమైన మహిళలే తనకు నిజమైన స్ఫూర్తి అని పేర్కొంటూ.. తన తల్లి, స్నేహితులు, సహోద్యోగులకు హృదయపూర్వక కృతజ్ఞతలు తెలిపారు. ఈ సందర్భంగా స‌మంత షేర్ చేసిన ఇన్‌స్టా ఫోటోలు నెట్టింట వైరల్ అవుతున్నాయి. ప్రతిరోజూ ఎవరి నుండి అయితే నేర్చుకుంటూ పెరుగుతున్నానో.. అటువంటి అద్భుతమైన మహిళలతో కలిసి భవిష్యత్తును నిర్మించడం నా అదృష్టం! అని సమంత రాసిన మాటలు ఎందరికో స్ఫూర్తినిస్తున్నాయి.

ప్రస్తుతం సమంత నటిస్తున్న `మా ఇంటి బంగారం` షూటింగ్ కర్ణాటకలోని శివమొగ్గ జిల్లాలో శరవేగంగా జరుగుతోంది. మల్నాడు ప్రాంతంలోని హోసనగర తాలూకా పరిసరాల్లోని పచ్చని ప్రకృతి ఒడిలో కీలక సన్నివేశాలను చిత్రీకరిస్తున్నారు. దర్శకురాలు బి.వి. నందినీ రెడ్డి ఈ చిత్రానికి నాయకత్వం వహిస్తున్నారు. సమంత, నందినీ రెడ్డి కాంబినేషన్‌లో గతంలో వచ్చిన చిత్రాలు విజయవంతం కావడంతో ఈ సినిమాపై కూడా భారీ అంచనాలు నెలకొన్నాయి. గుల్షన్ దేవయ్య, దిగంత్ మంచాలె వంటి ప్రతిభావంతులైన నటులు ఈ సినిమాలో కీలక పాత్రలు పోషిస్తుండగా, గౌతమి తడిమల్ల, మంజూష, శ్రీముఖి త‌దిత‌ర‌ మహిళా మణులు తమ నటనతో సినిమాకు అదనపు బలాన్ని ఇస్తున్నారు. కొంత విరామం తర్వాత సమంత తెలుగు తెరపైకి రీ-ఎంట్రీ ఇస్తుండటం అభిమానులకు పండగ లాంటి వార్త.

`మా ఇంటి బంగారం` చిత్రం మే 15న ప్రపంచవ్యాప్తంగా విడుదల కానుంది. బలమైన భావోద్వేగాలు, కుటుంబ విలువల కలయికతో రూపొందుతున్న ఈ చిత్రం ప్రేక్షకులను కచ్చితంగా ఆకట్టుకుంటుందని అంచ‌నా.