ల‌క్ష్యం 1000 కోట్లు అంత‌కుమించి.. క‌ర్ణుడిగా న‌టిస్తున్న స‌ల్మాన్ టార్గెట్ ఇదేనా?

భారతీయ సినీ పరిశ్రమలో బాక్సాఫీస్ రికార్డుల వేట ఇప్పుడు రూ. 1000 కోట్లను దాటి వేల‌ కోట్ల దిశగా పరుగులు తీస్తోంది. ఒకప్పుడు ప్రభాస్, రాజమౌళి కాంబినేషన్‌లో వచ్చిన `బాహుబలి 2` నెలకొల్పిన రికార్డులను అందుకోవడానికి ఖాన్ ల‌ త్రయం నుండి నేటి తరం స్టార్ల వరకు అందరూ తపిస్తున్నారు. ఇటీవలే `యానిమల్`తో అలరించిన రణ్‌బీర్ కపూర్ `రామాయణం` ఫ్రాంచైజీతో వేల కోట్ల క్ల‌బ్‌లో అడుగుపెట్టాల‌ని క‌సిగా ప్ర‌య‌త్నిస్తున్నాడు. అంత‌కుముందే `దురందర్` ఫ్రాంఛైజీతో రణ్‌వీర్ సింగ్ 3000 కోట్ల వ‌సూళ్ల క్ల‌బ్‌లో నిల‌బ‌డి రేసులో ముందంజలో ఉన్నారు. ఈ క్రమంలో బాలీవుడ్ సుల్తాన్ సల్మాన్ ఖాన్ కూడా భారీ టార్గెట్‌తో ఈ పాన్-ఇండియా రేసులోకి దిగుతున్నారు.

సల్మాన్ ఖాన్ తన కెరీర్‌లోనే అత్యంత భారీ చిత్రంగా భావిస్తున్న `కర్ణ` ప్రాజెక్ట్ ద్వారా బాక్సాఫీస్ వద్ద రూ. 1000 కోట్లకు పైగా వసూళ్లు సాధించడమే లక్ష్యంగా పెట్టుకున్నారు. మహాభారతంలో అత్యంత సంక్లిష్టమైన, శక్తివంతమైన పాత్ర అయిన కర్ణుడి కథ ఆధారంగా ఈ చిత్రం తెరకెక్క‌నుంది. రాకేష్ ఓంప్రకాష్ మెహ్రా దర్శకత్వంలో ఎక్సెల్ ఎంటర్‌టైన్‌మెంట్ ఈ చిత్రాన్ని రెండు భాగాలుగా అత్యంత ప్రతిష్టాత్మకంగా.. ఊహించని భారీ బడ్జెట్‌తో నిర్మిస్తోంది. ప్రభాస్ `బాహుబలి`, రణ్‌బీర్ `రామాయణం` సినిమాలకు ఏమాత్రం తగ్గకుండా దీనిని విజువల్ వండర్‌గా తీర్చిదిద్దేందుకు ప్లాన్ చేస్తున్నారు.

గత ఐదేళ్లుగా ప్రీ-ప్రొడక్షన్ పనులు జరుపుకుంటున్న ఈ రెండు భాగాల మైథలాజికల్ ఎపిక్ 2027 ఆగస్టు నాటికి సెట్స్ పైకి వెళ్లేందుకు సిద్ధమవుతోంది. అయితే ఈ ఐదేళ్ల సుదీర్ఘ ప్రయాణంలో పూర్తిగా నిమగ్నమవ్వడానికి ముందు దర్శకుడు రాకేష్ ఓంప్రకాష్ మెహ్రా ఒక ఆసక్తికరమైన ప్లాన్ చేశారు. `కర్ణ` షూటింగ్ ప్రారంభమయ్యేలోపే యువ నటుడు విక్రాంత్ మాస్సేతో కలిసి ఒక చిన్న పట్టణం నేపథ్యంలో సాగే రొమాంటిక్ లవ్ స్టోరీని తెరకెక్కించనున్నారు.

విక్రాంత్ మాస్సేతో చేసే ఈ లవ్ స్టోరీ షూటింగ్‌ను కేవలం 30 రోజుల్లోనే వేగంగా పూర్తి చేయాలని దర్శకుడు భావిస్తున్నారు. ఈ చిన్న సినిమా షూటింగ్ జరుగుతున్న సమయంలో కూడా `కర్ణ` ప్రీ-ప్రొడక్షన్ పనులు ఎక్కడా ఆగకుండా ఎక్సెల్ ఎంటర్‌టైన్‌మెంట్ సాంకేతిక బృందం నిరంతరం కొనసాగిస్తుండటం విశేషం. ఒక భారీ ప్రాజెక్ట్‌కి ముందు మైండ్ రిఫ్రెష్‌మెంట్ కోసం దర్శకుడు ఈ క్విక్ ప్రాజెక్ట్‌ను ఎంచుకున్నారు.

అయితే ప్ర‌జ‌ల దృష్టి స‌ల్మాన్ న‌టించ‌నున్న భారీ పాన్ ఇండియా సినిమా క‌ర్ణ పైనే. దీనిగురించే ఇటీవ‌ల మీడియాలోను డిబేట్లు ఉత్కంఠ పెంచుతున్నాయి. సల్మాన్ ఖాన్ - రాకేష్ ఓంప్రకాష్ మెహ్రాల కాంబినేషన్‌లో తెర‌కెక్క‌నున్న ఈ `కర్ణ` చిత్రంపై ఇప్పటికే సినీ వర్గాల్లోనూ, ప్రేక్షకుల్లోనూ భారీ అంచనాలు నెలకొన్నాయి. పౌరాణిక అంశాలకు ఆధునిక సాంకేతికతను జోడించి తెరకెక్కించ‌నున్న‌ ఈ చిత్రం బ‌డ్జెట్ కార‌ణాల‌తో చాలా కాలంగా వెయిటింగ్ లో ఉంది. ఎట్ట‌కేల‌కు ఈ సినిమాని ప‌ట్టాలెక్కించాల‌ని స‌ల్మాన్- రాకేష్ బృందం క‌సిగా ప్ర‌య‌త్నిస్తున్న‌ట్టు తెలుస్తోంది. ర‌ణ‌బీర్ రామాయ‌ణంతో దూసుకెళుతున్న ఈ స‌మ‌యంలో స‌ల్మాన్ కూడా రేసులోకి రావ‌డం ఆస‌క్తిని క‌లిగిస్తోంది. అంతా ఆశించిన ప్ర‌కారం ముందుకు సాగితే.. సల్మాన్ ఖాన్ కూడా పాన్-ఇండియా రేసులో సరికొత్త రికార్డులను తిరగ రాస్తాడ‌నే అభిమానులు భావిస్తున్నారు. కొన్నిటికి కాల‌మే స‌మాధానం. ఏం జ‌రుగుతుందో వేచి చూడాలి.