టాలీవుడ్, కోలీవుడ్ దాటి హాలీవుడ్‌పై కన్నేసిన యంగ్ మ్యూజిక్ టాలెంట్

సినీ ఇండ‌స్ట్రీలోకి అడుగుపెట్టిన ప్రతి మ్యూజిక్ డైరెక్ట‌ర్‌కీ ఒకే తరహా ప్రయాణం ఉండదు. కొందరు అసిస్టెంట్ డైరెక్టర్లుగా, మరికొందరు సీనియర్ కంపోజర్ల దగ్గర పనిచేస్తూ అవకాశాలు అందుకుంటారు. ఇంకొందరు తమ టాలెంట్ ను ఇండిపెండెంట్ మ్యూజిక్ ద్వారా పరిచయం చేసుకుని, అదే గుర్తింపును సినిమా అవకాశాలుగా మార్చుకుంటారు. సాయి అభ్యంకర్ జ‌ర్నీ ఈ కొత్త మార్గానికి ఎగ్జాంపుల్‌గా కనిపిస్తోంది. ముఖ్యంగా చాలా తక్కువ టైమ్ లోనే భారీ ప్రాజెక్టుల వరకు చేరుకోవడం ఇప్పుడు ఇండస్ట్రీలో ఇంట్రెస్టింగ్ డిస్క‌ష‌న్‌కు దారితీస్తోంది.

సాధారణంగా ఒక కొత్త మ్యూజిక్ డైరెక్టర్‌కు సినిమా అవకాశాలు రావాలంటే కొంతకాలం ఇండ‌స్ట్రీలో పేరు సంపాదించుకోవాల్సి ఉంటుంది. కానీ డిజిటల్ యుగంలో ఆ లెక్కలు క్రమంగా మారుతున్నాయి. థియేటర్లలో సినిమా రిలీజ్ కావడానికి ముందే ఒక మ్యూజిక్ డైరెక్ట‌ర్ సాంగ్ కోట్లాది మందికి చేరుకునే అవకాశం ఉంది. సోషల్ మీడియా, మ్యూజిక్ స్ట్రీమింగ్ ప్లాట్‌ఫామ్స్, షార్ట్ వీడియో కంటెంట్ వంటి ప్లాట్‌ఫామ్స్ కొత్త టాలెంట్‌కు డైరెక్ట్ గా ఆడియ‌న్స్ తో కనెక్ట్ అయ్యే ఛాన్స్ ఇస్తున్నాయి. దీని వల్ల ఇండిపెండెంట్ మ్యూజిక్ ఇక సినిమా రంగానికి బయట ఉన్న ప్రపంచం కాకుండా, సినిమాల్లోకి ప్రవేశించేందుకు ఒక స్ట్రాంగ్ ప్లాట్‌ఫామ్‌గా మారుతోంది.

సాయి అభ్యంకర్ విషయంలో కూడా ఇదే మార్పు స్పష్టంగా కనిపిస్తోందనే చర్చ జరుగుతోంది. ముందుగా తన మ్యూజిక్ తో ఆడియ‌న్స్ లో ఆసక్తి పెంచుకుని, ఆ తర్వాత సినిమా అవకాశాలను అందుకోవడం కొత్త తరం కంపోజర్లకు ఒక ప్రత్యామ్నాయ కెరీర్ మోడల్‌ను చూపిస్తోంది. అయితే పెద్ద హీరోల సినిమాలు చేతిలోకి రావడం ఒక్కటే స‌క్సెస్ కు కొలమానం కాదు. వరుస ప్రాజెక్టుల్లో తన మ్యూజిక్ కు ప్రత్యేకమైన గుర్తింపు తీసుకురావడమే అసలైన‌ సవాల్.

ఇక అత‌ని కెరీర్‌లో మరో ఇంట్రెస్టింగ్ అంశం అతని గ్లోబల్ ఆలోచన. టాలీవుడ్, కోలీవుడ్ స్థాయిలో అవకాశాలు వచ్చిన వెంటనే అక్కడితో ఆగిపోకుండా హాలీవుడ్‌లో అది కూడా క్రిస్టోఫ‌ర్ నోల‌న్ తో వ‌ర్క్ చేయాల‌నే టార్గెట్ పెట్టుకోవడం కొత్త తరం ఇండియ‌న్ టెక్నీషియన్ల మారుతున్న ఆలోచనా విధానాన్ని ప్రతిబింబిస్తోంది. ఒకప్పుడు విదేశీ సినిమాల్లో అవకాశం అనేది కెరీర్‌లో ఎప్ప‌టికో ద‌క్కే మైల్‌స్టోన్‌గా భావించేవారు. ఇప్పుడు మాత్రం తమ కెరీర్ తొలి దశలోనే అంతర్జాతీయ స్థాయిని టార్గెట్ చేస్తున్న యంగ్ టాలెంటెడ్ టెక్నీషియ‌న్లు కనిపిస్తున్నారు.

అయితే ఇలాంటి విష‌యాల‌ను అనౌన్స్ చేయ‌డం కంటే దాన్ని మ్యూజిక్ తో సాధించడం ముఖ్యం. సాయి అభ్యంక‌ర్ ముందున్న అసలు పరీక్ష కూడా ఇదే. ఇప్పటికే వచ్చిన అవకాశాలను ఎంత విభిన్నంగా ఉపయోగించుకుంటాడు? తన సొంత సంగీత శైలిని ఎంత బలంగా నిర్మించుకుంటాడు? భారతీయ సినిమాలను దాటి అంతర్జాతీయ స్థాయిలో తనకంటూ ఒక గుర్తింపు తెచ్చుకోగలడా? రాబోయే సినిమాలు ఈ ప్రశ్నలకు సమాధానం చెప్పనున్నాయి. మొత్తానికి సాయి అభ్యంక‌ర్ జ‌ర్నీ కేవలం ఒక యంగ్ మ్యూజిక్ డైరెక్ట‌ర్ ఎదుగుదల మాత్రమే కాకుండా, ఇండిపెండెంట్ మ్యూజిక్ నుంచి మెయిన్‌స్ట్రీమ్ సినిమా, అక్కడి నుంచి గ్లోబల్ స్టేజ్ వైపు సాగుతున్న కొత్త కెరీర్ మార్గానికి సంకేతంగా మారుతోంది.