ఇక్క‌డ కాక‌పోతే అక్క‌డ‌? ఎక్క‌డైనా ఒక్క‌టేగా!

వైకాపా అధికారం కోల్పోయిన త‌ర్వాత రోజా సెల్వమణి అవ‌స‌రం మేర మాత్ర‌మే రాజకీయాలపై స్పందిస్తున్నారు. అదిష్టానం ఆదేశాల మేర‌కు అధికార పక్షంపై కౌంటర్ వేయ‌డం లేదంటే? సైలెంట్ గా త‌న ప‌ని తాను చూసుకో వ‌డం త‌ప్ప కామ్ గానే వ్య‌వ‌హ‌రిస్తున్నారు. దీంతో చేతిలో కావాల్సినంత స‌మ‌యం ఉంటుంది. అలాగ‌ని బుల్లి తెర షోల‌తో మునుప‌టిలా మ‌రీ అంత బిజీ కాలేదు. వ‌చ్చిన అవ‌కాశాలు స‌ద్వినియోగం చేసుకుంటూ ఎంట‌ర్ టైన్ అవుతున్నారు. ఈ నేప‌థ్యంలో తాజాగా త‌మిళ బుల్లి తెర షోల‌కు గ్రీన్ సిగ్నెల్ ఇచ్చారు.

తమిళంలో అత్యంత ఆదరణ పొందిన రియాలిటీ షో `కుకు విత్ కోమాలి` సీజన్ 7 కి జడ్జిగా వ్యవహ రిస్తున్నారు.`ఇక్కడ కాకపోతే అక్కడ..ఎక్కడైనా ఎంటర్‌టైన్‌మెంట్ ఒక్కటే కదా` అనే చందంగా రోజా తన సెకండ్ ఇన్నింగ్స్‌ను అక్క‌డా ప్రారంభించారు. ఈ వంటల షోలో తనదైన శైలిలో నవ్వులు పూయిస్తున్నారు. కేవలం జడ్జిగానే కాకుండా, కంటెస్టెంట్లతో కలిసి సరదాగా ముచ్చటిస్తూ పంచ్‌లు వేస్తూ షోకి కొత్త కళను తీసుకువచ్చారు. రోజా రాకతో ఈ షో రేటింగ్స్ కూడా ఒక్కసారిగా పెరగడం విశేషం. ఈ షోలో రోజా తన పాత సినిమాల జ్ఞాపకాలను పంచుకోవడం ప్రేక్షకులను విశేషంగా ఆకట్టుకుంటోంది.

ముఖ్యంగా సూపర్ స్టార్ రజనీకాంత్‌తో కలిసి నటించిన `వీర`, `ఉళైప్పాలి` వంటి చిత్రాల షూటింగ్ సమయంలో జరిగిన ఆసక్తికర సంఘటనలను గుర్తు చేసుకుంటున్నారు. ఒకప్పుడు స్టార్ హీరోయిన్‌గా తమిళనాట ఒక వెలుగు వెలిగిన రోజాను మళ్ళీ తెరపై చూడటం అక్కడి ప్రేక్షకులకు కనువిందుగా మారింది. సోషల్ మీడియాలో కూడా ఆమె వీడియోలు విపరీతంగా వైరల్ అవుతున్నాయి. రోజా కేవలం ఒక నటిగానే కాకుండా ఒక అనుభవజ్ఞురాలైన రాజకీయ వేత్తగా కూడా ఈ షోలో తన పరిణతిని చాటుతున్నారు. వంటల పోటీల్లో వచ్చే ఒత్తిడిని కంటెస్టెంట్లు ఎలా తట్టుకోవాలో చెబుతూనే వారిని ప్రోత్సహిస్తున్నారు.

`రాజకీయాల్లో యుద్ధం చేశాను. ఇప్పుడు వంటల యుద్ధంలో జడ్జిగా ఉన్నాను` అంటూ ఆమె వేసే జోకులు ప్రేక్షకులను కడుపుబ్బ నవ్విస్తున్నాయి. రోజా ఎనర్జీ లెవల్స్ చూస్తుంటే గ్లామర్ వరల్డ్‌లో ఆమెకు ఉన్న పట్టు ఏమాత్రం తగ్గలేదని మ‌రోసారి ప్రూవ్ అయింది. ఇప్ప‌టి వ‌ర‌కూ తెలుగు షోలలో కనిపించిన రోజా ఇప్పుడు తమిళ మార్కెట్‌ను కూడా మళ్ళీ తన వైపుకు తిప్పుకుంటున్నారు. రాజకీయాల నుంచి కాస్త ప్రశాంతత కోరుకుంటున్న తరుణంలో ఇలాంటి వినోదాత్మక షోలు ఆమెకు రీఫ్రెష్‌మెంట్‌ను ఇస్తున్నాయి. భవిష్యత్తులో ఆమె మళ్ళీ సినిమాల్లోకి వస్తారా ? అనేది పక్కన పెడితే మాత్రం `కుకు విత్ కోమాలి` జడ్జిగా సందడి చేస్తూ టాక్ ఆఫ్ ది టౌన్‌గా మారారు.