నెద‌ర్లాండ్స్‌ ప్ర‌ధానిగా స్వ‌లింగ సంప‌ర్కుడు.. భార‌త్‌లో సాధ్య‌మేనా?

రాబ్ జెట్టెన్ గురించి వివ‌రాల్లోకి వెళితే.. అత‌డి వయసు 38 ఏళ్లు. నెదర్లాండ్స్ చరిత్రలో ఇంత చిన్న వయసులో ప్రధాని బాధ్యతలు చేపట్టిన వ్యక్తి ఆయనే. డెమోక్రాట్స్ 66 (D66) పార్టీకి నాయకత్వం వహిస్తున్నారు. 2018లోనే తాను స్వలింగ సంపర్కుడినని ఆయన బహిరంగంగా ప్రకటించారు. కేవలం రాజకీయ నాయకుడిగానే కాకుండా, LGBTQ+ వర్గానికి ఒక రోల్ మోడల్‌గా నిలిచారు. ఆయన నేతృత్వంలోని ప్రభుత్వానికి పార్లమెంటులో పూర్తి మెజారిటీ లేదు. 150 సీట్లలో 66 మాత్రమే ఉన్నాయి. కాబట్టి ఇతర పార్టీల మద్దతుతో ఆయన పాలన సాగించాల్సి ఉంటుంది.

ఆయన మేల్ భాగస్వామి వివ‌రాలు..

రాబ్ జెట్టెన్ తన వ్యక్తిగత జీవితం గురించి కూడా చాలా స్పష్టంగా ఉంటారు. ఆయన భాగస్వామి గురించి వివరాలను ఆయ‌నే వెల్ల‌డించారు. త‌న భాగ‌స్వామి నికోలస్ కీనన్ అర్జెంటీనాకు చెందిన ప్రొఫెషనల్ ఫీల్డ్ హాకీ క్రీడాకారుడు. ఒలింపిక్స్‌లో అర్జెంటీనా తరపున ఆడటంతో పాటు ఐరోపాలోని ప్రముఖ క్లబ్‌ల తరపున హాకీ ఆడుతుంటారు. వీరిద్దరూ గత కొన్నేళ్లుగా రిలేషన్‌షిప్‌లో ఉన్నారు. ప్రస్తుతం వీరిద్దరికీ నిశ్చితార్థం కూడా జరిగింది. రాబ్ జెట్టెన్ రాజకీయ బాధ్యతల్లో నికోలస్ అండగా ఉంటున్నారు.

చారిత్రక ప్రాధాన్యత:

ప్రపంచంలోనే మొట్టమొదటిసారిగా (2001లో) స్వలింగ వివాహాలను చట్టబద్ధం చేసిన దేశం నెదర్లాండ్స్. అయితే, ఒక స్వలింగ సంపర్కుడు ఆ దేశానికి ప్రధానమంత్రి కావడం మాత్రం ఇదే తొలిసారి. యూరప్ రాజకీయాల్లో ఇదొక పెద్ద మార్పుగా విశ్లేషకులు భావిస్తున్నారు. వ్యక్తిగత ఇష్టాఇష్టాలు దేశాభివృద్ధికి, నాయకత్వానికి అడ్డంకి కావు! అనే సందేశాన్ని ఈ పరిణామం ప్రపంచానికి చాటిచెబుతోంది.

భార‌త‌దేశంలో ప‌రిస్థితి?

భారతదేశంలో ఎల్‌జిబిటిక్యూ (LGBTQ+) లేదా స్వలింగ సంపర్కుల పరిస్థితిపై చట్టం, సామాజిక దృక్పథం గత దశాబ్ద కాలంలో గణనీయంగా మారాయి. భారతదేశంలో స్వలింగ సంపర్కం నేరం కాదు. సుప్రీంకోర్టు తన చారిత్రాత్మక తీర్పు (న‌వ‌తేజ్ సింగ్ జోహార్ కేసు) ద్వారా ఏకాభిప్రాయంతో కూడిన స్వలింగ సంపర్కాన్ని నేరంగా పరిగణించలేమని స్పష్టం చేసింది. దీనివల్ల వారు స్వేచ్ఛగా జీవించే హక్కును పొందారు.

అయితే స్వలింగ వివాహాలకు ఇంకా చట్టబద్ధమైన గుర్తింపు రాలేదు. 2023లో సుప్రీంకోర్టు దీనిపై తీర్పునిస్తూ.. చట్టం చేసే బాధ్యతను పార్లమెంటుకు వదిలివేసింది. అలాగే స్వలింగ జంటలు పిల్లలను దత్తత తీసుకోవడానికి కూడా ప్రస్తుతం పూర్తిస్థాయి చట్టపరమైన అనుమతి లేదు. 2019లో వచ్చిన ట్రాన్స్‌జెండర్ వ్యక్తుల (హక్కుల రక్షణ) చట్టం ద్వారా వారు విద్యా, ఉపాధి రంగాల్లో వివక్షకు గురికాకుండా రక్షణ పొందారు.

నాయకుడు అయ్యేందుకు ఆస్కారం ఉందా?

అంటే క‌చ్చితంగా ఉంద‌నేది విశ్లేష‌ణ‌. భారత రాజ్యాంగం ప్రకారం.. భారతదేశ పౌరుడైన స్వ‌లింగ సంప‌ర్కులు ఎవరైనా అర్హతలు ఉంటే ఎన్నికల్లో పోటీ చేయవచ్చు.. నాయకులు కావచ్చు. భారతదేశంలో ఇప్పటికే కొందరు ట్రాన్స్‌జెండర్ వ్యక్తులు మేయర్లుగా, ఎమ్మెల్యేలుగా ఎన్నికయ్యారు. మధు కిన్నర్ - రాయ్‌ఘర్ మేయర్, షబ్నం మౌసి దీనికి ఉదాహ‌ర‌ణ‌లు. చట్టపరంగా ఎటువంటి అడ్డంకులు లేనప్పటికీ, సమాజంలో ఉన్న కొన్ని మూస పద్ధతుల వల్ల వారు రాజకీయాల్లో ఎదగడం ఇప్పటికీ సవాలుగానే ఉంది. కానీ, యువతరం, విద్యావంతుల మద్దతుతో పరిస్థితులు మారుతున్నాయి.

భారతదేశంలో చట్టపరంగా వారికి స్వేచ్ఛగా జీవించే హక్కు ఉంది కానీ సమానమైన సామాజిక హోదా (వివాహం వంటివి) పొందేందుకు ఇంకా కొంత సమయం పట్టవచ్చు. ఒక వ్యక్తి సమర్థతను వారి లైంగిక గుర్తింపుతో కాకుండా.. వారి పనితీరుతో కొలిచే స్థాయికి సమాజం ఎదుగుతోంది.