ధురంధర్ తర్వాత రణ్‌వీర్‌కు అసలు పరీక్ష.. కొత్త డైరెక్ట‌ర్‌తో రిస్క్

ఇండ‌స్ట్రీలో స్టార్ హీరోల కెరీర్‌ను గమనిస్తే.. ఒక భారీ సినిమా తర్వాత వచ్చే ప్రాజెక్ట్‌పై సహజంగానే అంచనాలు పెరుగుతాయి. ముఖ్యంగా యాక్షన్ జోన్‌లో భారీ ఇమేజ్‌ను అందుకున్న తర్వాత అదే స్థాయిని కంటిన్యూ చేయ‌డం ఒక సవాలైతే.. అదే సమయంలో కొత్తదనాన్ని చూపించడం మరో పెద్ద పరీక్ష. ఇప్పుడు బాలీవుడ్ స్టార్ రణ్‌వీర్ సింగ్ ముందున్న ప్రళయ్ కూడా అలాంటి కీలకమైన ప్రాజెక్ట్‌గానే కనిపిస్తోంది.

ఇప్పటికే ధురంధర్‌తో యాక్షన్ హీరోగా తన మార్కెట్‌ను మరింత బలపరుచుకున్న రణ్‌వీర్.. ఇప్పుడు సాధారణ యాక్షన్ కథకు భిన్నమైన ప్రపంచంలోకి అడుగుపెడుతున్నారు. వినాశనం తర్వాత మిగిలిపోయిన ప్రపంచం, బతుకుదెరువు కోసం జరిగే పోరాటం, మారిపోయిన నగర వాతావరణం వంటి అంశాలతో ఈ సినిమా రూపొందనుంది. అంటే హీరోకి ఎదురయ్యే సవాలు కేవలం ఒక వ్యక్తి లేదా ప్రత్యర్థి కాదు, పరిస్థితులే ప్రధాన శత్రువుగా మారే అవకాశ‌ముంది. ఈ నేపథ్యంలో రణ్‌వీర్ పెర్ఫార్మెన్స్ కూడా కేవలం యాక్షన్ సీన్లకే పరిమితం కాకుండా, భయం, ఒత్తిడి, స‌ర్వైవ‌ల్ ఇన్‌స్టింక్ట్ వంటి ఎమోష‌న్స్ ను కూడా మోసుకెళ్లాల్సి ఉంటుంది.

అయితే ఈ సినిమాకు మరో ఆసక్తికరమైన అంశం డైరెక్ట‌ర్ జై మెహతా. ఇప్పటివరకు తండ్రి హన్సల్ మెహతాతో కలిసి పనిచేసిన జై.. ఇప్పుడు థియేట్రికల్ డైరెక్టర్‌గా తన అదృష్టాన్ని పరీక్షించుకోబోతున్నాడు. సాధారణంగా ఒక డైరెక్ట‌ర్ మొద‌టి సినిమా అంటేనే ఎన్నో అంచనాలుంటాయి. అలాంటిది స్టార్ హీరో, భారీ యాక్షన్, విస్తృతమైన వీఎఫ్ఎక్స్ అవసరమయ్యే కాన్సెప్ట్‌తో డెబ్యూ చేయడ‌మంటే మరింత పెద్ద బాధ్యత.

ఇక్కడే రణ్‌వీర్ తీసుకున్న డెసిష‌న్ కూడా ఆసక్తిని పెంచుతోంది. మంచి స్టార్ ఇమేజ్ ఉన్న టైమ్ లో సేఫ్ ఫార్ములాను ఎంచుకోకుండా కొత్త ప్రపంచాన్ని ఎంచుకోవడం రిస్క్‌తో కూడుకున్న వ్య‌వ‌హార‌మే. అదే సమయంలో ధురంధర్ ద్వారా వచ్చిన యాక్షన్ క్రేజ్‌ను ప్రళయ్‌కు ఉపయోగించుకునే అవకాశం కూడా ఉంది. అయితే ఆడియ‌న్స్ కేవలం స్టార్ ఇమేజ్‌ను చూసి థియేటర్లకు వస్తారా? లేక కొత్త కథ, ప్రపంచ నిర్మాణం, ఎమోషన్ అన్నీ కలిసి పనిచేయాలా? అన్నదే ఇప్పుడు అసలు ప్రశ్నగా మారింది.

అందుకే ప్రళయ్ మూవీ రణ్‌వీర్‌కు మరో యాక్షన్ సినిమా మాత్రమే కాదు, ఇప్పటికే ఏర్పడిన ఇమేజ్‌ను కొత్త జానర్‌లో ఎంత సమర్థంగా మార్చుకోగలరో నిరూపించే పరీక్షగా మారుతోంది. జై మెహతాకు ఇది డైరెక్ట‌ర్ గా తొలి పెద్ద అడుగు అయితే.. రణ్‌వీర్‌కు తన స్టార్‌డమ్‌ను నెక్ట్స్ లెవెల్ కు తీసుకెళ్లే అవకాశంగా చెప్పొచ్చు. సినిమా ఎలా ఉండబోతుందన్న దానికంటే, ఈ కాంబినేషన్ ఎంత కొత్త అనుభూతిని ఇస్తుందన్నదే ఇప్పుడు ఆసక్తికరంగా మారింది.