ఛాంపియన్ కోసం రంగంలోకి చిరుత

హీరో శ్రీకాంత్ తనయుడు రోషన్ మేక హీరోగా నటిస్తున్న లేటెస్ట్ సినిమా ఛాంపియన్. డిసెంబర్ 25న క్రిస్మస్ కానుకగా ఈ సినిమా థియేటర్లలోకి రావడానికి సిద్దమవుతున్న విషయం తెలిసిందే. ఇప్పటికే విడుదలైన గ్లింప్స్, పాటలు యువతను బాగానే ఆకట్టుకున్నాయి. ఒక పక్కా కమర్షియల్ ఎలిమెంట్స్ తో, యూత్ ఫుల్ ఎంటర్టైనర్ గా ఈ సినిమాను తెరకెక్కించారు. అయితే బాక్సాఫీస్ దగ్గర గట్టి పోటీ ఉన్నప్పుడు సినిమాకు బజ్ రావాలంటే ఒక బలమైన సపోర్ట్ కావాలి. సరిగ్గా ఇక్కడే ఛాంపియన్ టీమ్ ఒక మాస్టర్ ప్లాన్ వేసింది.

సాధారణంగా చిన్న సినిమాలకు లేదా యంగ్ హీరోల సినిమాలకు పెద్ద స్టార్స్ వచ్చి ప్రమోట్ చేస్తే ఆ రీచ్ వేరే లెవెల్ లో ఉంటుంది. సినిమా జనాల్లోకి వెళ్లాలంటే స్టార్ పవర్ తోడవ్వాల్సిందే. రోషన్ లాంటి ప్రామిసింగ్ హీరోకి ఇప్పుడు ఇండస్ట్రీ నుంచి అలాంటి దన్ను దొరికింది. అది కూడా మామూలు సపోర్ట్ కాదు, ఏకంగా గ్లోబల్ స్టార్ రేంజ్ లో అందటం విశేషం.

మెగా పవర్ స్టార్ రామ్ చరణ్ ఇప్పుడు ఛాంపియన్ కోసం రంగంలోకి దిగుతున్నారు. డిసెంబర్ 18న జరగబోయే ఈ సినిమా ట్రైలర్ లాంచ్ ఈవెంట్ కు రామ్ చరణ్ ముఖ్య అతిథిగా విచ్చేస్తున్నారు. ఈ విషయాన్ని చిత్ర యూనిట్ అధికారికంగా ప్రకటించింది. చిరుతోస్తే చిందే వేయాలా అంటూ ఒక అదిరిపోయే విడియో తో ఈ విషయాన్ని షేర్ చేశారు. ప్రస్తుతం పెద్ది పనుల్లో బిజీగా ఉన్న చరణ్, రోషన్ కోసం టైమ్ కేటాయించడం నిజంగా గొప్ప విషయం.

ఇక్కడ మరో ఆసక్తికరమైన విషయం ఏంటంటే చిరుత ఫర్ ఛాంపియన్ అనే హ్యాష్ ట్యాగ్ ను వాడుతున్నారు. రామ్ చరణ్ మొదటి సినిమా చిరుత ద్వారా పరిచయం అయ్యి ఇప్పుడు గ్లోబల్ స్టార్ గా ఎదిగారు. ఇప్పుడు అదే చిరుత ఒక ఛాంపియన్ ను ఎంకరేజ్ చేయడానికి వస్తున్నాడనే అర్థం వచ్చేలా ప్రమోషన్స్ చేస్తున్నారు. ఈ అనౌన్స్ మెంట్ తో మెగా ఫ్యాన్స్ కూడా అలర్ట్ అయిపోయారు. సోషల్ మీడియాలో ఈ న్యూస్ ను తెగ షేర్ చేస్తున్నారు.

రామ్ చరణ్ రాకతో ఈ ఈవెంట్ కు ఎక్కడ లేని క్రేజ్ వస్తుందని చెప్పవచ్చు. చరణ్ ఏం మాట్లాడతారు, రోషన్ గురించి ఏం చెబుతారు అనేది ఆసక్తికరంగా మారింది. పెద్ది రాకకు సిద్ధంగా ఉన్న సమయంలో చరణ్ బయట కనిపిస్తే ఆ సందడి వేరేలా ఉంటుంది. ఆ హైప్ కచ్చితంగా ఛాంపియన్ సినిమాకు ప్లస్ అవుతుంది. ఓపెనింగ్స్ పరంగా ఇది రోషన్ కు బాగా హెల్ప్ అయ్యే ఛాన్స్ ఉంది. మరి ఈ చిరుత సపోర్ట్ తో ఛాంపియన్ బాక్సాఫీస్ దగ్గర ఏ రేంజ్ లో గర్జిస్తాడో చూడాలి.