రామ్ చరణ్, సుక్కు.. ఎంత కష్టమంటే..

రామ్ చరణ్‌తో సుకుమార్ ప్రాజెక్ట్ సెట్టయ్యింది అనగానే.. మెగా అభిమానులకు ఈసారి అంచనాలు వేరేలా పెరిగాయి. వీళ్ల కాంబినేషన్‌లో మరో హిట్ వస్తే చాలనే పరిస్థితి లేదు. 'రంగస్థలం'లో చిట్టిబాబులా ఏళ్ల తరబడి గుర్తుండిపోయే పాత్ర కావాలనే కోరిక ఎక్కువగా కనిపిస్తోంది. పైగా 'ఆర్ఆర్ఆర్' తర్వాత చరణ్ నుంచి వచ్చిన సినిమాల ఫలితాలను చూస్తే ఈ అంచనాలకు కారణం అర్థమవుతుంది. ఇప్పుడు సుకుమార్ మీద ఉన్న అసలు ప్రెజర్ భారీ కలెక్షన్ల కంటే చరణ్‌కు ఎలాంటి క్యారెక్టర్ ఇస్తారనే విషయంలోనే ఉంది.

'రంగస్థలం'లో చిట్టిబాబు పాత్రను ఒకసారి గుర్తు చేసుకుంటే ఈ విషయం అర్థమవుతుంది. వినికిడి సమస్య ఉన్న పల్లెటూరి యువకుడిగా చరణ్ కనిపించిన తీరు అప్పట్లో అందరినీ ఆశ్చర్యపరిచింది. ఆ పాత్రలో అమాయకత్వం ఉంది, కోపం ఉంది, అన్నయ్య కోసం ఎంత దూరమైనా వెళ్లే ఎమోషన్ ఉంది. మధ్యలో కమర్షియల్ సీన్స్ వచ్చినా అవి కథలో భాగంగానే అనిపించాయి. ముఖ్యంగా చిట్టిబాబు ప్రవర్తన, మాటతీరు, బాడీ లాంగ్వేజ్ కలిసి ఆ పాత్రకు ప్రత్యేకమైన గుర్తింపు తెచ్చాయి.

ఆ తర్వాత రాజమౌళి 'ఆర్ఆర్ఆర్'లో అల్లూరి సీతారామరాజుగా చరణ్ మరోసారి గుర్తింపు తెచ్చుకున్నారు. కానీ ఆ తర్వాత వచ్చిన 'ఆచార్య'లో పరిమిత పాత్ర, 'గేమ్ ఛేంజర్' ఫలితం అభిమానులకు ఆశించిన స్థాయిలో సంతృప్తి ఇవ్వలేదు. 'పెద్ది' కోసం చరణ్ చాలా కష్టపడ్డారు. నటనకు ప్రశంసలు కూడా వచ్చాయి. అయితే సినిమా మొత్తం మీద మిక్స్డ్ టాక్ వచ్చింది. దీంతో చరణ్ నుంచి మరో బలమైన క్యారెక్టర్‌తో పాటు కమర్షియల్‌గా కూడా పూర్తి స్థాయిలో మెప్పించే సినిమా రావాలనే అంచనాలు పెరిగాయి.

ఇక సుకుమార్ పరిస్థితి కూడా అంత సులభంగా లేదు. 'పుష్ప' మొదటి భాగం భారీ విజయం సాధించడంతో రెండో భాగంపై అంచనాలు అమాంతం పెరిగాయి. వాటికి తగ్గట్టుగా 'పుష్ప 2' కోసం దాదాపు మూడేళ్లు కేటాయించారు. సినిమా బాక్సాఫీస్ దగ్గర భారీ వసూళ్లు అందుకుంది. ఇప్పుడు ఆ సినిమా తర్వాత సుకుమార్ చేస్తున్న ప్రాజెక్ట్ చరణ్‌తోనే. ఒకవైపు 'పుష్ప 2' స్థాయి కమర్షియల్ అంచనాలు, మరోవైపు 'రంగస్థలం'ను మించే పాత్ర కావాలనే అభిమానుల కోరిక.. ఈ రెండింటినీ బ్యాలెన్స్ చేయాల్సిన పరిస్థితి ఉంది.

అయితే చరణ్‌కు మరో పుష్పరాజ్ తరహా పాత్ర ఇస్తే సరిపోతుందా అంటే అదీ కష్టమే. పుష్పరాజ్‌లో మొండితనం, ఎదగాలనే కసి కథను నడిపిస్తే, చిట్టిబాబు అమాయకత్వం వెనక ఉన్న ఎమోషన్ ప్రేక్షకులకు కనెక్ట్ అయింది. ఇప్పుడు కూడా చరణ్‌కు ప్రత్యేకమైన క్యారెక్టరైజేషన్ అవసరం. దానికి తగ్గట్టుగా మాస్ ఎలివేషన్లు, యాక్షన్, పాటలు ఉంటే కమర్షియల్ అంశాలకు కూడా చోటుంటుంది. హీరోను గొప్పగా చూపించే సీన్స్ కంటే ఆ హీరో ఎందుకు అలా ప్రవర్తిస్తున్నాడనే విషయం ప్రేక్షకులకు కనెక్ట్ కావడం ముఖ్యం.

ఇక చరణ్, సుకుమార్ కొత్త సినిమాను 2024 మార్చిలోనే అధికారికంగా ప్రకటించారు. మైత్రీ మూవీ మేకర్స్, సుకుమార్ రైటింగ్స్ నిర్మాణంలో భాగస్వామ్యం కానున్నాయి. దేవిశ్రీ ప్రసాద్ సంగీతం అందించనున్నారు. 'పుష్ప 2' తర్వాత సుకుమార్ దర్శకత్వంలో రాబోయే సినిమా ఇదే. ప్రస్తుతం స్క్రిప్ట్, ప్రీ ప్రొడక్షన్ పనులు కొనసాగుతున్నట్లు సమాచారం. నవంబర్ లేదా డిసెంబర్‌లో షూటింగ్ మొదలవుతుందనే వార్తలు వస్తున్నా, చిత్రబృందం నుంచి ఇంకా అధికారిక తేదీ ప్రకటించలేదు.