19 ఏళ్ల తర్వాత 14 మంది హీరోలతో విడుదలైన 'రక్త కశ్మీర'.. ఆశ్చర్యం ఏమిటంటే?

సినిమా రంగంలో కొన్ని చిత్రాలు పట్టాలెక్కినప్పుడే సంచలనం సృష్టిస్తాయి, కానీ అనుకోని కారణాల వల్ల అవి వెలుగు చూడటానికి దశాబ్దాల కాలం పడుతుంది. అలాంటి అరుదైన చిత్రాల్లో కన్నడ మూవీ 'రక్త కశ్మీర' , సూపర్ స్టార్ రజనీకాంత్ బాలీవుడ్ చిత్రం 'హమ్ మెయిన్ షాహెన్ షా కౌన్' ముందు వరుసలో ఉన్నాయి. దశాబ్దాల క్రితం మొదలై, నేటి తరం ప్రేక్షకులను పలకరించేందుకు సిద్ధమవుతున్న ఈ సినిమాల వెనుక ఉన్న ఆసక్తికరమైన విశేషాలు ఇప్పుడు చర్చనీయాంశంగా మారాయి..ఆ విశేషాలు ఇలా వున్నాయి..

రక్త కశ్మీర'- 14 మంది హీరోలు:

ఒక హీరో, ఇద్దరు హీరోలు నటించారంటేనే ప్రేక్షకులు సినిమా కోసం ఎదురు చూస్తారు. అలాంటిది దాదాపు 14 మంది హీరోలు ఒక పాటలో కనిపించారంటే ఆ మూవీ కోసం అభిమానులు ఎంతగా ఎదురు చూస్తారో ప్రత్యేకంగా చెప్పక్కర్లేదు. కానీ బాధాకరమైన విషయం ఏంటంటే ఆ హీరోలలో కొంతమంది ఇప్పుడు మన మధ్య లేకపోవడం.ఇక విషయానికి వస్తే 2007లో నిర్మాణం ప్రారంభమైన 'రక్త కశ్మీర' చిత్రం సుమారు 19 ఏళ్ల సుదీర్ఘ నిరీక్షణ తర్వాత 2026 లో విడుదలకు సిద్ధమైంది. ఈ సినిమాలోని ఒక ప్రత్యేక గీతంలో ఏకంగా 14 మంది కన్నడ అగ్ర హీరోలు కలిసి నటించడం అప్పట్లో ఒక పెద్ద సంచలనం.

అయితే, కాలక్రమేణా ఈ సినిమా విడుదల కొన్ని కారణాల వల్ల ఆలస్యం కావడంతో విడుదలకు నోచుకోలేదు. పైగా ఈ సినిమాలోని ఒక పాటలో కనిపించిన 14 మంది హీరోలలో ముగ్గురు దిగ్గజాలు, పునీత్ రాజ్‌కుమార్, విష్ణువర్ధన్, అంబరీష్ లాంటి నటులు నేడు మన మధ్య లేకపోవడం అత్యంత బాధాకరం. మరో ఆశ్చర్యకరమైన విషయం ఏమిటంటే, ఈ చిత్ర హీరో ఉపేంద్రకు కూడా ఈ సినిమా ఇప్పుడు విడుదలవుతున్నట్లు సమాచారం లేదని టాక్. పైగా ఈ సినిమాలో నటించిన నటి రమ్య ఇప్పుడు పరిశ్రమకు దూరం కాగా, నటుడు దర్శన్ ప్రస్తుతం జైలులో ఉన్నారు. ఈ పరిణామాలు ఈ సినిమా చుట్టూ ఒక ఆసక్తికరమైన ఉత్కంఠను రేకెత్తిస్తున్నాయి.

రజనీకాంత్ అరుదైన చిత్రం: 37 ఏళ్ల తర్వాత 4Kలో రీ-ఎంట్రీ:

ఇక కన్నడ చిత్రమే కాదు, భారతీయ సూపర్ స్టార్ రజనీకాంత్ నటించిన ఒక బాలీవుడ్ యాక్షన్ మూవీ 'హమ్ మెయిన్ షాహెన్ షా కౌన్' కూడా ఇలాంటి వింతైన పరిస్థితులను ఎదుర్కొంటోంది. అప్పట్లో 1989లోనే షూటింగ్ మొత్తం పూర్తి చేసుకున్న ఈ చిత్రం, వివిధ కారణాల వల్ల అప్పట్లో థియేటర్ల వరకు రాలేకపోయింది. ఇక హేమామాలిని, అమ్రిష్ పురి వంటి హేమాహేమీలు నటించిన ఈ భారీ బడ్జెట్ చిత్రాన్ని ఇప్పుడు అత్యాధునిక 4K టెక్నాలజీతో మళ్ళీ విడుదల చేసేందుకు నిర్మాత సిద్ధమవుతున్నారు. ఇంతవరకు బాగున్నా విచారకరమైన విషయం ఏమిటంటే, ఈ చిత్రానికి దర్శకత్వం వహించిన హారమేష్ మల్హోత్రాతో పాటు, విలన్ అమ్రిష్ పురి, హాస్యనటుడు జగదీప్ మరియు కొరియోగ్రాఫర్ సరోజ్ ఖాన్ వంటి లెజెండ్స్ ఇప్పుడు జీవించి లేరు. మరి ఈ సినిమాలు బాక్సాఫీస్ వద్ద ఎలాంటి ఫలితాలను సాధిస్తాయో చూడాలి.

ఈ రెండు సినిమాలు ఒక తరహా లాంటివి. దశాబ్దాల క్రితం నాటి తమ అభిమాన నటులను, వారి యవ్వన దశలో మళ్ళీ వెండితెరపై చూసే అవకాశం ప్రేక్షకులకు కలగనుంది. 'రక్త కశ్మీర'లో 14 మంది స్టార్లను ఒకే ఫ్రేమ్‌లో చూడటం ఒక వైపు, రజనీకాంత్ పాతకాలపు మాస్ యాక్షన్‌ను 4K నాణ్యతలో చూడటం మరో వైపు..ఇది సినిమా ప్రియులకు పండగ లాంటి వార్త. సాంకేతిక కారణాలు లేదా ఆర్థిక ఇబ్బందుల వల్ల ఆగిపోయిన ఈ చిత్రాలు, ఎట్టకేలకు ప్రేక్షకుల ముందుకు రావడం అనేది సినీ చరిత్రలో ఒక అరుదైన ఘట్టంగా నిలిచిపోతుందని, సినీ విశ్లేషకులు అభిప్రాయపడుతున్నారు.