రాజ్‌పాల్ యాదవ్ ఒంటరి కాదు.. అండగా బిగ్ స్టార్స్..

వెండితెరపై తన కామెడీతో కోట్లాది మందిని నవ్వించిన రాజ్‌పాల్ యాదవ్, నిజ జీవితంలో మాత్రం కన్నీళ్ల పర్యంతమవుతున్నారు. ఆర్థిక ఇబ్బందులు, చెక్ బౌన్స్ కేసుల వల్ల తీహార్ జైలుకు వెళ్లాల్సి రావడం సినీ పరిశ్రమను షాక్‌కు గురిచేసింది. "నాకు ఎవరూ స్నేహితులు లేరు, ఈ పోరాటంలో నేను ఒంటరిని" అంటూ ఆయన చేసిన భావోద్వేగ ప్రకటనకు సోనూ సూద్ స్పందించారు. "రాజ్‌పాల్ యాదవ్ ఒంటరి కాదు" అంటూ సోనూ చూపిన చొరవ ఇప్పుడు నెటిజన్ల మనసు గెలుచుకుంటోంది. వివరాలలోకి వెళితే..

తోటి నటుడి కోసం సోనూ సూద్ 'డిగ్నిటీ' మిషన్:

రాజ్‌పాల్ యాదవ్ జైలుకు వెళ్లాల్సి రావడంతో సోనూ సూద్ తక్షణమే స్పందించారు. తన తదుపరి సినిమాలో రాజ్‌పాల్‌కు అవకాశం ఇవ్వడమే కాకుండా, ముందే కొంత మొత్తాన్ని ‘సైనింగ్ అమౌంట్’గా అందజేస్తున్నట్లు ప్రకటించారు. "ఇది చారిటీ (భిక్ష) కాదు, ఇది ఒక అద్భుతమైన నటుడికి మనం ఇచ్చే గౌరవం (డిగ్నిటీ)" అని సోనూ పేర్కొన్నారు. ప్రతిభావంతుడైన నటుడు సమయం బాగోక కష్టాల్లో ఉన్నప్పుడు చిత్ర పరిశ్రమ మొత్తం ఒక కుటుంబంలా నిలబడాలని, ఆయనను ఒంటరిని చేయకూడదని సోనూ సూద్ పిలుపునిచ్చారు.

రాజకీయ నేతల నుండి భారీ ఆర్థిక సాయం:

సోనూ సూద్ ప్రారంభించిన ఈ సాయం గొలుసుకట్టులా విస్తరించింది. నటుడు గుర్మీత్ చౌదరి కూడా రాజ్‌పాల్‌కు మద్దతుగా నిలబడగా, రాజకీయ రంగం నుండి జనశక్తి జనతాదళ్ (JJD) అధినేత తేజ్ ప్రతాప్ యాదవ్ అనూహ్యంగా స్పందించారు. ఇక రాజ్‌పాల్ యాదవ్ పరిస్థితి తెలుసుకున్న ఆయన, తక్షణ సాయంగా రూ. 11 లక్షల ఆర్థిక సహాయాన్ని ప్రకటించారు. మానవతా దృక్పథంతో తాము రాజ్‌పాల్ కుటుంబానికి తోడుగా ఉంటామని, ఆయన త్వరగా ఈ సంక్షోభం నుండి బయటపడాలని ఆకాంక్షించారు.

కష్టాల్లో అండగా నిలిచిన సినీ లోకం:

రాజ్‌పాల్ యాదవ్ ఎదుర్కొంటున్న దాదాపు రూ. 9 కోట్ల అప్పుల భారం ఆయనను కుంగదీసింది. 2010లో ఒక సినిమా కోసం తీసుకున్న రుణం నేడు ఆయనను జైలు పాలు చేసింది. జైలుకు వెళ్లేముందు ఆయన పడిన ఆవేదన చూసి పరిశ్రమలోని మరికొందరు కూడా స్పందిస్తున్నారు. మ్యూజిక్ ప్రొడ్యూసర్ రావు ఇందర్జిత్ సింగ్ ఏకంగా రూ. 1.11 కోట్ల సాయం ప్రకటించగా, కమాల్ ఆర్ ఖాన్ (KRK) వంటి వారు కూడా రూ. 10 లక్షల సాయం చేస్తామన్నారు. ఒకప్పుడు ఒంటరిని అని భావించిన రాజ్‌పాల్‌కు, ఇప్పుడు అందుతున్న ఈ మద్దతు ఆయన మళ్ళీ కెమెరా ముందుకు రావడానికి గట్టి భరోసానిస్తోంది.