దేవుడికి లేని బాధ మీకెందుకు? రాజమౌళి కోసం RGV లాజిక్స్

'వారణాసి' సినిమా ఈవెంట్ లో రాజమౌళి చేసిన వ్యాఖ్యలు, దానికి హిందూ సంఘాల నుంచి వస్తున్న నిరసనలపై వివాదాస్పద దర్శకుడు రామ్ గోపాల్ వర్మ తనదైన శైలిలో స్పందించారు. ట్విట్టర్ వేదికగా ఆయన చేసిన వరుస ట్వీట్లు ఇప్పుడు సోషల్ మీడియాలో హాట్ టాపిక్ గా మారాయి. రాజమౌళి నాస్తికత్వాన్ని సమర్థిస్తూ, ఆయన్ని విమర్శించే వారికి RGV కౌంటర్ ఇచ్చారు.

వర్మ తన ట్వీట్ లో, "రాజమౌళి నాస్తికుడు అని తెలిసినా ఆయనపై విషం కక్కడం సరికాదు. భారత రాజ్యాంగంలోని ఆర్టికల్ 25 ప్రకారం దేవుడిని నమ్మకపోవడం నేరం కాదు. నమ్మే హక్కు మీకు ఎంత ఉందో, నమ్మకపోవడానికి ఆయనకు అంతే హక్కు ఉంది" అని పేర్కొన్నారు. రాజమౌళి వ్యక్తిగత నమ్మకాలను ప్రశ్నించే అర్హత ఎవరికీ లేదని ఆయన స్పష్టం చేశారు.

"దేవుడిని నమ్మనప్పుడు సినిమాల్లో దేవుడిని ఎందుకు చూపిస్తున్నాడు?" అని ప్రశ్నించే వారికి వర్మ తనదైన లాజిక్ తో సమాధానం ఇచ్చారు. "గ్యాంగ్ స్టర్ సినిమా తీయాలంటే దర్శకుడు గ్యాంగ్ స్టర్ అవ్వాలా? హారర్ సినిమా తీయాలంటే దెయ్యం అవ్వాలా?" అని ఎద్దేవా చేశారు. సినిమా అనేది ఒక క్రియేటివ్ ప్రాసెస్ అని, దానికి వ్యక్తిగత నమ్మకాలకు సంబంధం లేదని వర్మ అభిప్రాయపడ్డారు.

అంతేకాకుండా, రాజమౌళికి దక్కిన సక్సెస్ గురించి కూడా వర్మ ఆసక్తికర వ్యాఖ్యలు చేశారు. "రాజమౌళి దేవుడిని నమ్మకపోయినా, దేవుడు అతనికి 100 రెట్లు ఎక్కువ సక్సెస్, డబ్బు, కీర్తిని ఇచ్చాడు. చాలామంది భక్తులకు వంద జన్మలెత్తినా దక్కని భాగ్యం ఆయనకు దక్కింది" అని అన్నారు. దీన్ని బట్టి దేవుడికి నాస్తికులంటే ఇష్టమా? లేక దేవుడు ఇవన్నీ పట్టించుకోడా? అని వర్మ సెటైరికల్ గా ప్రశ్నించారు.

రాజమౌళి నాస్తికత్వం దేవుడిని తగ్గించదని, కానీ నమ్మకం లేని వారిని చూసి భయపడే భక్తుల అభద్రతా భావాన్ని బయటపెడుతుందని వర్మ విశ్లేషించారు. "దేవుడు క్షేమంగానే ఉన్నాడు, రాజమౌళి కూడా క్షేమంగానే ఉన్నాడు. మధ్యలో అనవసరంగా బాధపడేది కేవలం అర్థం చేసుకోలేని వాళ్ళు మాత్రమే" అని చురకలు అంటించారు.

చివరగా, 'వారణాసి' సినిమాతో రాజమౌళి బ్యాంక్ బ్యాలెన్స్ ఇంకా పెరుగుతుందని, అసూయపడే వాళ్ళు ఏడుస్తూనే ఉంటారని వర్మ ముగించారు. ఈ మొత్తం గొడవ వెనుక భక్తి ముసుగులో ఉన్న అసూయ దాగి ఉందని ఆయన తేల్చిచెప్పారు. అలాగే చివరలో "జై హనుమాన్" అంటూ ట్వీట్ ని ముగించడం మరో షాకింగ్ పాయింట్. మరి దీనికి ఎవరైనా ధీటుగా సమాధానం ఇస్తారేమో చూడాలి.