వారణాసి.. అలాంటి సర్ప్రైజ్ ఒక్కటి పడినా..
రాజమౌళి దర్శకత్వంలో మహేష్ బాబు నటిస్తున్న ‘వారణాసి’లో ప్రియాంక చోప్రా, పృథ్వీరాజ్ సుకుమారన్ కీలక పాత్రలు పోషిస్తున్నారు. గత సినిమాల్లో నాని, సుదీప్, రానా, అజయ్ దేవగణ్ వంటి స్టార్స్కు ప్రత్యేక పాత్రలు ఇచ్చిన రాజమౌళి.. ఈ సినిమాలోనూ మరో స్టార్ను చూపిస్తారా అనే చర్చ జరుగుతోంది. ప్రభాస్, ఎన్టీఆర్, రామ్ చరణ్ వంటి హీరోలు కనిపించే అవకాశం ఉందనే ఊహాగానాలు ఉన్నప్పటికీ, ఎవరినీ సంప్రదించినట్లు సమాచారం లేదు.
By: M Prashanth | 18 Nov 2026 11:13 AM ISTరాజమౌళి 'వారణాసి'లో మహేష్ బాబుతో పాటు ప్రియాంక చోప్రా, పృథ్వీరాజ్ సుకుమారన్ లాంటి స్టార్స్ ఉన్న సంగతి తెలిసిందే. ఇప్పటికే ఈ కాంబినేషన్తోనే పాన్ వరల్డ్ స్థాయిలో సినిమాపై మంచి అంచనాలు ఉన్నాయి. అయితే రాజమౌళి గత సినిమాలను గుర్తు చేసుకుంటే 'వారణాసి'లో కూడా మరో స్టార్ కనిపించే అవకాశం ఉందా అనే ఆలోచన వస్తోంది. అదే జరిగితే సినిమాకు బిజినెస్ పరంగానూ అదనపు అడ్వాంటేజ్ దక్కొచ్చు.
నిజానికి రాజమౌళి తన సినిమాల్లో స్టార్స్ను ఉపయోగించుకునే విధానం కాస్త భిన్నంగా ఉంటుంది. 'మర్యాద రామన్న'లో రవితేజతో సైకిల్కు వాయిస్ ఓవర్ చెప్పించారు. 'ఈగ'లో నానితో పాటు కన్నడ స్టార్ సుదీప్ను విలన్గా తీసుకున్నారు. ఆ సినిమాలో సుదీప్ పాత్ర ఎంతగా క్లిక్ అయిందో తెలిసిందే. తర్వాత 'బాహుబలి'లో ప్రభాస్కు దీటుగా రానాను నిలబెట్టారు. మొదటి భాగంలో సుదీప్తో చిన్న పాత్ర కూడా చేయించారు.
ఇక 'ఆర్ఆర్ఆర్'లో ఎన్టీఆర్, రామ్ చరణ్ను ఒకే సినిమాలో చూపించడమే పెద్ద సర్ప్రైజ్. పైగా బాలీవుడ్ స్టార్ అజయ్ దేవగణ్ను కీలక పాత్రలో తీసుకున్నారు. అయితే రాజమౌళి ఎక్కడా కేవలం స్టార్ ఉన్నాడనే కారణంతో పాత్రను ఇరికించినట్లు అనిపించదు. కథకు అవసరమైన చోటే వాళ్లను ఉపయోగించుకుంటారు. అందుకే ఆయన సినిమాల్లో చిన్న పాత్ర చేసినా స్టార్స్కు మంచి గుర్తింపు దక్కుతోంది.
పైగా ప్రభాస్, ఎన్టీఆర్, రామ్ చరణ్, నాని లాంటి హీరోలతో రాజమౌళికి ఉన్న అనుబంధం గురించి ప్రత్యేకంగా చెప్పాల్సిన పనిలేదు. జక్కన్న ఒక్క మాట అడిగితే వీళ్లలో ఎవరైనా గ్రీన్ సిగ్నల్ ఇచ్చే అవకాశాలు ఎక్కువే. గతంలో ఆయనతో కలిసి పనిచేసిన హీరోలు మరోసారి చిన్న పాత్రలో కనిపించడానికి కూడా సిద్ధపడొచ్చు. అయితే వీరిలో ఎవరినైనా 'వారణాసి' కోసం సంప్రదించారనే సమాచారం మాత్రం లేదు. కథలో అలాంటి పాత్ర ఉంటేనే రాజమౌళి ఆ దిశగా ప్రయత్నించే అవకాశం ఉంది.
ఇప్పుడు 'వారణాసి' విషయానికొస్తే పృథ్వీరాజ్ సుకుమారన్ ఇప్పటికే కుంభ అనే పవర్ఫుల్ విలన్గా కనిపించబోతున్నారు. మహేష్ రుద్ర పాత్రతో పాటు రాముడిగా కూడా కనిపిస్తారని రాజమౌళి వెల్లడించారు. ప్రపంచంలోని వివిధ ప్రాంతాలు, పురాణ నేపథ్యం, అడ్వెంచర్ అంశాలతో కథను సిద్ధం చేశారు. ఇంత పెద్ద కథలో ఇప్పటివరకు బయటకు రాని మరో ముఖ్యమైన పాత్ర ఉన్నా ఆశ్చర్యపోవాల్సిన అవసరం లేదు.
ముఖ్యంగా ఈ రోజుల్లో ఒక భాషకు చెందిన స్టార్ మరో భాష సినిమాలో కనిపిస్తే ఆ మార్కెట్లో అదనపు ప్రచారం దక్కుతోంది. 'వారణాసి'ని ప్రపంచవ్యాప్తంగా భారీ స్థాయిలో విడుదల చేయాలని ప్లాన్ చేస్తున్నారు. అలాంటి సినిమాలో బాలీవుడ్ లేదా ఇతర ఇండస్ట్రీకి చెందిన పెద్ద స్టార్ చిన్న పాత్రలో కనిపించినా ప్రమోషన్లకు ఉపయోగపడొచ్చు. అయితే ఇప్పటికే షూటింగ్ పూర్తయి పోస్ట్ ప్రొడక్షన్ పనులు జరుగుతున్నాయి. మరి రాజమౌళి మరో స్టార్ను దాచిపెట్టారా, లేక మహేష్ పాత్రలు, కథలోని ట్విస్టులతోనే సర్ప్రైజ్ ఇవ్వబోతున్నారా అనేది చూడాలి.
