హైదరాబాద్ ఐమ్యాక్స్ రీఎంట్రీ: జక్కన్నను కలవరపెట్టిన జ్ఞాపకాలు

భారతీయ చలనచిత్ర రంగాన్ని ప్రపంచ స్థాయికి తీసుకెళ్లిన దర్శకుడు ఎస్.ఎస్. రాజమౌళి (జక్కన్న) చిత్రాలు ఎల్లప్పుడూ సరికొత్త రికార్డులను సృష్టిస్తాయి. బాహుబలి, RRR వంటి బ్లాక్‌బస్టర్ చిత్రాల తర్వాత ఆయన దర్శకత్వంలో రూపొందుతున్న అత్యంత ప్రతిష్టాత్మక చిత్రం `వారణాసి`. ఏప్రిల్ 2027లో విడుదల కానున్న ఈ చిత్రంపై ఇప్పటికే భారీ అంచనాలు ఉన్నాయి. వేల సంవత్సరాల కాల గమనంలో అంటార్కిటికా వంటి మారుమూల ప్రదేశాల నేపథ్యంలో సాగే ఒక అద్భుతమైన సైన్స్ ఫిక్షన్ కథాంశంతో ఈ సినిమా రూపుదిద్దుకుంటోంది. వారణాసి నగరం ఒక గ్రహశకలాన్ని ఎదుర్కొనే ఉత్కంఠభరితమైన సన్నివేశాలను ఈ చిత్రంలో చూపించనున్నారు. విశేషమేమిటంటే ఈ సినిమాలోని కొన్ని కీలక భాగాలను 70ఎంఎం ఐమ్యాక్స్ (IMAX) ఫిల్మ్‌పై చిత్రీకరిస్తున్నారు.

ఇటీవల ఆన్సీ యానిమేషన్ ఫెస్టివల్‌లో `బాహుబలి: ది ఎటర్నల్ వార్` యానిమేషన్ చిత్రానికి సంబంధించిన ప్యానెల్‌లో పాల్గొన్న రాజమౌళి, `వెరైటీ` పత్రికతో మాట్లాడుతూ `వారణాసి` చిత్ర పురోగతిని వివ‌రించారు. సినిమాకు సంబంధించిన ప్రధానమైన‌ భారీ యాక్షన్ సన్నివేశాల చిత్రీకరణ అంతా ఇప్పటికే పూర్తయిందని ఆయన వెల్లడించారు. ప్రస్తుతం కేవలం చిన్న చిన్న అనుసంధాన (ప్యాచ్ వర్క్) సన్నివేశాల చిత్రీకరణ మాత్రమే మిగిలి ఉందని, సెప్టెంబర్ లేదా అక్టోబర్ చివరి నాటికి చిత్ర షూటింగ్ మొత్తాన్ని పూర్తి చేయడానికి ప్రణాళికలు సిద్ధం చేసినట్లు ఆయన పేర్కొన్నారు.

ఈ సందర్భంగా హైదరాబాద్ నగరానికి ఐమ్యాక్స్ థియేటర్ తిరిగి రావడంపై రాజమౌళి ఎంతో ఉద్వేగంగా మాట్లాడారు. గతంలో హైదరాబాద్ ప్రసాద్ ఐమ్యాక్స్‌లో ప్రపంచంలోనే అత్యుత్తమమైన 70ఎంఎం ఐమ్యాక్స్ ప్రొజెక్టర్లలో ఒకటి ఉండేదని ఆయన గుర్తు చేసుకున్నారు. అయితే ఐమ్యాక్స్ టెక్నాలజీ డిజిటల్‌గా మారిన తర్వాత సాంకేతిక కారణాల వల్ల హైదరాబాద్ ఆ హోదాను కోల్పోయింది. దేశంలోని ఇతర నగరాల్లో ఐమ్యాక్స్ థియేటర్లు అందుబాటులోకి వచ్చినా సినిమాకు కేరాఫ్ అడ్రస్ అయిన హైదరాబాద్‌లో అది లేకపోవడం ఒక సినిమా ప్రేమికుడిగా తనను ఎంతో కలవరపెట్టిందని, తీవ్ర నిరాశకు గురిచేసిందని రాజమౌళి తన మనసులోని మాటను పంచుకున్నారు.

చివరకు హైదరాబాద్‌కు మళ్లీ ఐమ్యాక్స్ థియేటర్లు వస్తుండటం పట్ల రాజమౌళి అపరిమితమైన ఆనందాన్ని వ్యక్తం చేశారు. యావత్ ప్రపంచంలోనే ఆంధ్రప్రదేశ్, తెలంగాణ రాష్ట్రాల్లోని తెలుగు ప్రజల కంటే పెద్ద సినిమా అభిమానులు ఎక్కడా ఉండరని ఆయన కొనియాడారు. మన ప్రేక్షకులు కేవలం తెలుగు సినిమాలనే కాకుండా హిందీ, తమిళం, మలయాళం, ఇంగ్లీష్ ఇలా ప్రపంచంలో ఏ మూల నుండి వచ్చిన సినిమాలనైనా మనస్ఫూర్తిగా ఆదరిస్తారని చెప్పారు. అంతగా సినిమాను ప్రేమించే హైదరాబాద్ ప్రేక్షకులకు కచ్చితంగా సొంత ఐమ్యాక్స్ థియేటర్ ఉండాల్సిన అర్హత ఉందన్నారు. 2027లో `వారణాసి` విడుదల సమయానికి హైదరాబాద్‌లో ఐమ్యాక్స్ పునరాగమనం జరగడం ఒక అద్భుతమైన కాకతాళీయమని అభివర్ణించారు.

`వారణాసి` సినిమా పనుల్లో బిజీగా ఉంటూనే, రాజమౌళి తన `బాహుబలి` ఫ్రాంచైజీ ద్వారా భారతీయ యానిమేషన్ రంగాన్ని అంతర్జాతీయ స్థాయికి తీసుకెళ్లే ప్రయత్నాలు చేస్తున్నారు. ఇషాన్ శుక్లా దర్శకత్వంలో రూపొందుతున్న `బాహుబలి: ది ఎటర్నల్ వార్` యానిమేషన్ చిత్రం ద్వారా ప్రపంచ యానిమేషన్ పరిశ్రమతో భారతదేశానికి ఉన్న బంధాన్ని మరింత బలోపేతం చేయాలని వారు ఆశిస్తున్నారు. అటు భారీ బడ్జెట్ లైవ్-యాక్షన్ సినిమాలు, ఇటు అంతర్జాతీయ స్థాయి యానిమేషన్ చిత్రాలతో రాజమౌళి భారతీయ సినిమా సరిహద్దులను నిరంతరం విస్తరిస్తూనే ఉన్నారు.