ఒక‌ప్పుడు అక్కాచెల్లెళ్లు.. ఇప్పుడు ఆస్తుల కోసం పోలీసుల వ‌ర‌కు

సినీ రంగంలో కలిసి ప్రయాణించిన అక్కాచెల్లెళ్లు.. ఒకే ఫ్యామిలీకి చెందిన వారు.. స్క్రీన్‌పై మాత్రమే కాదు, ప‌ర్స‌న‌ల్ లైఫ్ లోనూ ఎంతో అన్యోన్యంగా కనిపించిన సందర్భాలు చాలానే ఉన్నాయి. కానీ కాలం మారే కొద్దీ ఫ్యామిలీ ఆస్తులు, వ్యాపార వ్యవహారాలు, బ్యాంకు అకౌంట్స్ వంటి అంశాలు వారి సంబంధాల మధ్య కొత్త చిక్కులు తీసుకురావడం చూస్తుంటాం. ఇప్పుడు అలాంటి పరిస్థితే సీనియర్ హీరోయిన్లు రాధ, అంబికల విషయంలో చర్చనీయాంశంగా మారింది. ఒకప్పుడు అక్కాచెల్లెళ్లుగా కలిసి కనిపించిన వీరి మధ్య వివాదం తాజాగా పోలీస్ ఫిర్యాదు వరకు వెళ్లడం సినీ వర్గాల్లో చర్చకు దారితీసింది.

ఈ వివాదాన్ని కేవలం రూ.46 కోట్ల చెక్కుల వ్యవహారంగా చూస్తే అసలు కథలోని మరో కోణం మిస్ అయ్యే అవకాశం ఉంది. రాధ పోలీసుల‌కు చేసిన కంప్లైంట్ లో బ్యాంకు అకౌంట్స్, పాత చెక్‌బుక్, కంపెనీ పేరు మారడం, ఆస్తిలోకి ప్రవేశించలేకపోవడం వంటి పలు అంశాలు ప్రస్తావనకు వచ్చాయి. బిజినెస్ అవసరాల కోసం ముందుగానే సంతకం చేసిన చెక్కులను ఇంట్లో ఉంచడం, త‌ర్వాత కంపెనీ పేరును మార్చడం, పాత చెక్కుల వినియోగాన్ని నిలిపివేయడం వంటి పరిణామాల మధ్య పాత చెక్కులు తమకు తెలియకుండా ఉపయోగించారని రాధ ఆరోపించడం ఇప్పుడు ప్రధానాంశంగా మారింది. ఈ ఆరోపణలపై అస‌లు వాస్తవాలేంటివ‌న్న‌ది దర్యాప్తులోనే తెలియాల్సి ఉంది.

ఇక్కడ మ‌రో ఇంట్రెస్టింగ్ విషయం ఏమిటంటే.. సినీ సెల‌బ్రిటీల‌ జీవితాల్లో కనిపించే గ్లామర్ వెనుక ఆస్తుల నిర్వహణ కూడా అంతే పెద్ద బాధ్యతగా ఉంటుంది. సినిమాల ద్వారా సంపాదించిన ఆస్తులు, భూములు, ఇళ్లు, నగలు, బ్యాంకు అకౌంట్స్, కంపెనీలు, పెట్టుబడులు వంటి వాటిని ఫ్యామిలీ మెంబ‌ర్స్ కలిసి నిర్వహించే సందర్భాలుంటాయి. కానీ కొన్నేళ్ల తర్వాత సంస్థల పేర్లు మారడం, పాత బ్యాంకింగ్ పేప‌ర్స్ అలాగే ఉండిపోవడం, అవ‌న్నీ ఎవరి వద్ద ఉన్నాయన్న విషయంలో క్లారిటీ లేకపోవడం వంటి అంశాలు చిన్న సమస్యను పెద్ద వివాదంగా మార్చే అవకాశం ఉంటుంది.

రాధ కంప్లైంట్ లో ప్రస్తావించిన ఆస్తి అంశం కూడా ఈ నేపథ్యంలోనే ప్రాధాన్యం సంతరించుకుంది. తనకు చెందిన ఆస్తిలోకి కొంతకాలంగా వెళ్లేందుకు అవకాశం లేకపోవడంతో పాటు అక్కడ విలువైన వస్తువులు, నగలు, పత్రాలు ఉన్నాయని ఆమె పేర్కొనడం.. వివాదం కేవలం బ్యాంకు లావాదేవీలకే పరిమితం కాదన్న సంకేతాన్ని ఇస్తోంది. సెలబ్రిటీ కుటుంబాల్లో ఆస్తుల విషయంలో సంబంధాలకంటే వ్యవస్థలు, క్లియ‌ర్ డాక్యుమెంట్స్, బాధ్యతల విభజన ఎంత ముఖ్యమో ఈ తరహా పరిణామాలు మరోసారి గుర్తుచేస్తున్నాయి. ఒకప్పుడు అక్కాచెల్లెళ్లుగా ఎంతో క్లోజ్ గా కనిపించిన రాధ, అంబికల మధ్య మొదలైన ఈ వివాదం చివరకు పోలీసుల దృష్టికి వెళ్లడం.. సినీ గ్లామర్ వెనుక కుటుంబ ఆస్తుల నిర్వహణ ఎంత సున్నితమైన అంశమో చర్చకు తెచ్చింది.