రేసుగుర్రం రికార్డులు కొడుతుందనుకుంటే ఇలా అయిందేంటి?

ఐకాన్ స్టార్ అల్లు అర్జున్ నటించిన రేసు గుర్రం సినిమా 4K రీరిలీజ్ చుట్టూ ఏర్పడిన అంచనాలు ఇప్పుడు మిశ్రమ ఫలితాలను చూపిస్తున్నాయి. ముఖ్యంగా పుష్ప ఫ్రాంచైజ్ సినిమాల తర్వాత బన్నీకి దేశవ్యాప్తంగా పెరిగిన క్రేజ్ దృష్ట్యా, ఈ రీరిలీజ్ బాక్సాఫీస్ వద్ద కొత్త రికార్డులు సృష్టిస్తుందని ట్రేడ్ వర్గాలు భావించాయి. కానీ అడ్వాన్స్ ట్రెండ్స్ మాత్రం ఆ అంచనాలకు పూర్తి స్థాయిలో సరిపోలడం లేదు. క‌లెక్ష‌న్ల ప‌రంగా చూసుకోవాల్సి వ‌స్తే, ఈ రీరిలీజ్ మూవీకి అడ్వాన్స్ బుకింగ్స్ ఆశించిన స్థాయిలో లేవనే విషయం స్పష్టంగా కనిపిస్తోంది. ముఖ్యంగా ఓవర్సీస్ మార్కెట్‌లో రెస్పాన్స్ మందగించడం ట్రేడ్‌కు ఆందోళన కలిగిస్తోంది. USAలో కొన్ని ప్రాంతాల్లో మాత్రమే పరిమిత ప్రేక్షకులు కనిపించడం తో యూఎస్ లో అల్లు అర్జున్ మ్యాజిక్ పనిచేయలేదా? అన్న ప్రశ్నలను రేకెత్తుతున్నాయి.

తెలుగు రాష్ట్రాల్లో మంచి రెస్పాన్స్

ఇండియా- ఓవర్సీస్ కంపారిజన్‌లో పరిస్థితి కొంత భిన్నంగా ఉంది. తెలుగు రాష్ట్రాల్లో మాత్రం రీరిలీజ్‌కు మంచి స్పందన లభిస్తోంది. పలు సెంటర్లలో అడ్వాన్స్ బుకింగ్స్ స్ట్రాంగ్ గా ఉండటం, ఫ్యాన్స్ ఉత్సాహాన్ని చూపిస్తోంది. రేసు గుర్రం సినిమా ఇప్పటికీ ఒక ఎంటర్‌టైనర్‌గా మంచి గుర్తింపు కలిగిన సినిమా. మంచి కామెడీ, యాక్షన్, బన్నీ స్టైల్.. ఇవ‌న్నీ ఈ సినిమాను ప్ర‌త్యేకంగా నిల‌బెట్టాయి. ఈ ఫ్యాక్టర్ వల్లే వీకెండ్‌లో క‌లెక్ష‌న్లు పెరిగే అవకాశముందని ట్రేడ్ భావిస్తోంది. కానీ ఫ్యాన్స్ నమ్మకం మీదే ఈ రీరిలీజ్ నిలబడుతుందా? అన్నది ఇప్పుడు మ‌రో ప్ర‌శ్న‌.

ట్రేడ్ అనాలిసిస్ ప్రకారం, హై ఎక్స్‌పెక్టేషన్స్ ఒకవైపు, ప్రస్తుత మార్కెట్ రియాలిటీ మరోవైపు.. ఈ రెండు మధ్య గ్యాప్ స్పష్టంగా కనిపిస్తోంది. గతంలో రీరిలీజ్ అయిన కొన్ని సినిమాలు భారీ స్పందన తెచ్చుకున్నప్పటికీ, అదే ట్రెండ్ ఇక్కడ కొనసాగుతుందా లేదా అన్న సందేహాలు మొదలయ్యాయి. ఇక రీరిలీజ్ ట్రెండ్ యాంగిల్‌లో చూస్తే, ఇటీవలి కాలంలో పాత హిట్ సినిమాలకు కొత్త జీవం లభిస్తోంది. కానీ ప్రతి సినిమా అదే స్థాయి సక్సెస్ సాధించలేదనే విషయాన్ని రేసు గుర్రం ఉదాహరణగా చూపిస్తోంది. దీంతో రీరిలీజ్ ట్రెండ్‌కు బ్రేక్ పడుతోందా? అనే కొత్త చర్చ ఇండ‌స్ట్రీలో మొదలైంది.

అయితే దీన్ని పూర్తిగా నెగటివ్‌గా చూడలేం. మొదటి రోజు స్లో గా స్టార్ట్ అయిన సినిమాలు కూడా మంచి టాక్ వస్తే తరువాత పుంజుకున్న ఉదాహరణలున్నాయి. రేసు గుర్రం కూడా అదే మార్గంలో వెళ్లే అవకాశం లేక‌పోలేదు. ఈ రీరిలీజ్ టాక్, వీకెండ్ క‌లెక్ష‌న్లు, సోష‌ల్ మీడియా టాక్ ఈ సినిమా విష‌యంలో కీల‌కంగా మార‌నున్నాయి. మొత్తానికి రికార్డులు బద్దలు కొడుతుందనుకున్న సినిమా స్టార్ట్‌లోనే స్ట్రగుల్ అవుతోంద‌నే విమర్శలు వినిపిస్తున్నాయి. ఇది ఎక్స్‌పెక్టేషన్స్ ఎక్కువగా పెట్టుకోవడం వల్ల వచ్చిన గ్యాప్ అని విశ్లేషిస్తున్నారు. మరోవైపు, ఆడియన్స్ బిహేవియర్ కూడా మారుతోందని విశ్లేషకులు చెబుతున్నారు. ఓటీటీ, కొత్త కంటెంట్ ప్రభావంతో, రీరిలీజ్ సినిమాలపై ఆసక్తి త‌గ్గిపోతుంద‌ని కొంద‌రు అభిప్రాయ‌ప‌డుతున్నారు.