ఉస్తాద్ భ‌గ‌త్‌సింగ్ ట్రిపుల్ సెల‌బ్రేష‌న్ అంటోన్న రాశీ

ఉగాది కానుకగా భారీ అంచనాల మధ్య ప్రేక్షకుల ముందుకు రాబోతున్న మాస్ ఎంటర్‌టైనర్ ఉస్తాద్ భగత్ సింగ్ రిలీజ్‌కు ముందు ప్రమోషన్లు తారాస్థాయికి చేరుకున్నాయి. పవర్ స్టార్ పవన్ కళ్యాణ్ మరియు దర్శకుడు హరీష్ శంకర్ కాంబినేషన్‌లో వస్తున్న ఈ సినిమా, గతంలో వచ్చిన గబ్బర్ సింగ్ విజయాన్ని గుర్తు చేస్తూ మరోసారి అభిమానుల్లో భారీ ఎక్సైట్మెంట్‌ను క్రియేట్ చేస్తోంది. మైత్రి మూవీ మేకర్స్ నిర్మించిన ఈ ప్రాజెక్ట్‌పై ఇండస్ట్రీ వర్గాల్లోనూ మంచి అంచనాలు నెలకొన్నాయి.

మార్చి 19న థియేటర్లలోకి రాబోతున్న ఈ సినిమా విడుదలకు ముందు చిత్ర బృందం ప్రీ రిలీజ్ ప్రెస్ మీట్ నిర్వహించింది. ఈ కార్యక్రమంలో పాల్గొన్న హీరోయిన్లు శ్రీలీల, రాశీ ఖన్నా తమ అనుభవాలను పంచుకుంటూ సినిమాపై ఉన్న నమ్మకాన్ని వ్యక్తం చేశారు.

ఈ సంద‌ర్భంగా శ్రీలీల మాట్లాడుతూ, ఉగాది సందర్భంగా ఒక మంచి తెలుగు సినిమా ప్రేక్షకుల ముందుకు రావడం చాలా ఆనందంగా ఉందని పేర్కొన్నారు. ఈ సినిమా కచ్చితంగా ప్రతి వర్గం ప్రేక్షకులను అలరించేలా ఉంటుందని ఆమె నమ్మకం వ్యక్తం చేశారు. షూటింగ్ టైమ్ లో యూనిట్‌తో కలసి పని చేసిన అనుభవం ప్రత్యేకమని చెప్పిన ఆమె, రాశి ఖన్నాతో స్క్రీన్‌పై సీన్స్ లేకపోయినా ఆఫ్ స్క్రీన్‌లో మంచి బాండింగ్ ఏర్పడిందని తెలిపారు. ప్రేక్షకులు సినిమాను ఆదరించి పెద్ద విజయాన్ని అందించాలని కోరారు.

ఇక రాశి ఖన్నా మాట్లాడుతూ, ఈ సినిమా తనకు 2026లో మొదటి రిలీజ్ కావడం, అదే ఉగాది పండుగ సందర్భంగా విడుదల కావడం మరింత ప్రత్యేకతనిచ్చిందని చెప్పారు. పవన్ కళ్యాణ్ లాంటి స్టార్ హీరోతో కలిసి పని చేయడం తనకు ట్రిపుల్ సెలబ్రేషన్ లాంటిదని పేర్కొన్నారు. సినిమా కోసం మొత్తం యూనిట్ ఎంతో కష్టపడ్డారని, ముఖ్యంగా డైరెక్ట‌ర్ హరీష్ శంకర్ డెడికేష‌న్ తో పని చేశారని ఆమె అభినందించారు. ఈ సినిమా ప్రేక్షకులందరికీ నచ్చుతుందనే నమ్మకం వ్యక్తం చేశారు.

సినిమా నుంచి ఇప్పటికే రిలీజైన ప్ర‌మోష‌న‌ల్ కంటెంట్ కు ఆడియ‌న్స్ నుంచి మంచి రెస్పాన్స్ వ‌చ్చింది. మొత్తంగా చూస్తే, ఉస్తాద్ భగత్ సింగ్ కేవలం ఒక కమర్షియల్ సినిమా కాకుండా, మాస్ ఎంటర్‌టైనర్‌కు కొత్త నిర్వచనం ఇవ్వాలనే లక్ష్యంతో వస్తున్నట్లు స్పష్టమవుతోంది. భారీ అంచనాల నడుమ విడుదలవుతున్న ఈ సినిమా బాక్సాఫీస్ వద్ద ఎలాంటి సంచలనాలు సృష్టిస్తుందో చూడాలి.