థియేటర్‌లోనే రెస్టారెంట్ ఫీల్.. ఇండియాలోనే మొట్టమొదటి!

సినిమా చూస్తూ కేవలం పాప్‌కార్న్, కూల్‌డ్రింక్ తాగే రోజులు మారిపోయాయి, ఇప్పుడు ఏకంగా లగ్జరీ రెస్టారెంట్‌ తరహాలో కూర్చున్న సీటుకే వేడివేడి భోజనం వస్తే ఎలా ఉంటుంది? సరిగ్గా ఇలాంటి సరికొత్త అనుభవాన్ని అందించడానికే PVR INOX బెంగళూరులోని ఎలక్ట్రానిక్ సిటీలో ఉన్న M5 ECity మాల్‌లో భారతదేశపు మొట్టమొదటి ఫుల్-కోర్స్ డైన్-ఇన్ సినిమాను ప్రారంభించింది. అద్భుతమైన సినిమా వీక్షణతో పాటు నోరూరించే విలాసవంతమైన రెస్టారెంట్ అనుభవం ఇప్పుడు అందరినీ విపరీతంగా ఆకట్టుకుంటూ సోషల్ మీడియాలో వైరల్ అవుతోంది. ఆ విశేషాలు చూద్దాం..

కూచున్న చోటకే లగ్జరీ భోజనం:

ఈ లగ్జరీ థియేటర్‌లో కేవలం స్నాక్స్ మాత్రమే కాదు, ప్రసిద్ధ చెఫ్‌లు ప్రత్యేకంగా తయారు చేసిన అంతర్జాతీయ వంటకాలు, నోరూరించే ప్రాంతీయ రుచులు, లైవ్ కిచెన్ల నుండి వచ్చే వేడివేడి భోజనం మరియు చేతితో తయారు చేసిన స్పెషల్ డెజర్ట్‌లు లభిస్తాయి. ఇక ప్రత్యేకత ఏమిటంటే, సినిమా టికెట్ లేకపోయినా ఇక్కడికి వచ్చి ఈ భోజనాన్ని ఆస్వాదించవచ్చు.

మీ సౌకర్యం కోసం ప్రత్యేక సీటింగ్ :

సినిమా చూస్తూ హాయిగా తినడానికి వీలుగా ఇక్కడి ఆడిటోరియంలో ప్రత్యేకంగా తిరిగే మరియు వాలుగా ఉండే సోఫాలను ఏర్పాటు చేశారు. ఇక ఇవి 2-సీటర్ మరియు 4-సీటర్ ప్రైవేట్ పాడ్స్‌గా డిజైన్ చేయబడ్డాయి. దీనివల్ల పక్కవారి వల్ల ఎలాంటి ఆటంకం కలగకుండా, ప్రశాంతంగా సినిమా చూస్తూ, మీ భోజనాన్ని ఫుల్ లగ్జరీగా ఎంజాయ్ చేయవచ్చు.

అత్యాధునిక టెక్నాలజీతో విజువల్ ఫీస్ట్:

కేవలం తిండి మాత్రమే కాదు, సినిమా ఎక్స్‌పీరియన్స్ కూడా నెక్స్ట్ లెవల్ లో ఉంటుంది. ప్రతి స్క్రీన్‌లోనూ 4K లేజర్ ప్రొజెక్షన్ అమర్చారు, దీనివల్ల విజువల్స్ చాలా స్పష్టంగా కనిపిస్తాయి. అంతేకాకుండా డాల్బీ అట్మోస్ సరౌండ్ సౌండ్ సిస్టమ్స్ ఉండటం వల్ల థియేటర్ లోపల ప్రతి శబ్దం అద్భుతంగా వినిపిస్తూ సరికొత్త లోకంలోకి తీసుకెళ్తుంది.

యువత కోసం సరికొత్త హంగులు :

ఈ మాల్‌లోని మల్టీప్లెక్స్ కేవలం సినిమాకే పరిమితం కాకుండా యువత కోసం 'యూతిఫికేషన్' కాన్సెప్ట్‌తో రూపొందింది. ఇక సినిమా ప్రారంభమయ్యే లోపు రిలాక్స్ అవ్వడానికి కేఫ్ లాంటి లౌంజ్ ఏరియాలు, గేమింగ్ జోన్లు, వినూత్నమైన వర్చువల్ రియాలిటీ స్టేషన్లు కూడా ఇక్కడ ఉన్నాయి

ఇక ఇంట్లోనే కూర్చుని ఓటీటీల్లో సినిమాలు చూసే ఈ కాలంలో, థియేటర్ కి వస్తే ఎలాంటి అద్భుతమైన అనుభూతిని పొందవచ్చో PVR INOX నిరూపించింది. ఇక సినిమా కథతో పాటు అద్భుతమైన వంటకాల రుచిని మిళితం చేసిన ఈ సరికొత్త లగ్జరీ సినిమా ఎక్స్‌పీరియన్స్ ఖచ్చితంగా ప్రతి ఒక్కరూ ఒకసారైనా అనుభవించాల్సిందే..