నిర్మాతకు నమ్మకం పోతే.. ఇండస్ట్రీ పరిస్థితి ఏంటి?

సినిమా తీయడానికి ముందు కథ కావాలి.. దర్శకుడు కావాలి.. హీరో కావాలి.. కానీ వీళ్లందరి కంటే ముందు ఒక వ్యక్తి కావాలి. అతడే నిర్మాత. డబ్బు పెట్టి రిస్క్ తీసుకునేది అతడే. ఆ రిస్క్ మీద సినిమా మొదలవుతుంది. అందుకే నిర్మాతకు సినిమా మీద నమ్మకం పోతే.. ఆ ఎఫెక్ట్ ఒక్క సినిమాకే కాదు, మొత్తం ఇండస్ట్రీ మీద పడుతుంది. ఇటీవల అనకాపల్లి మూవీ థ్యాంక్యూ మీట్‌ లో నటి ఇంద్రజ చేసిన కామెంట్స్ ఇప్పుడు అదే విషయంపై డిబేట్ స్టార్ట్ చేశాయి.

సినిమా తీసి ఏం చేసినా చివరకు లాభం లేదని నిర్మాత నిరాశపడితే మంచి సినిమాలు ఎలా వస్తాయని ఆమె ప్రశ్నించారు. కొత్త నిర్మాతలను ప్రోత్సహించాలని, ఇండస్ట్రీ బతకాలంటే వాళ్లకు అండగా ఉండాలని కోరారు. నిజానికి ఒక సినిమా మొదలవ్వాలంటే ముందు నిర్మాత పెట్టుబడి పెట్టాలి. కథ నచ్చితే కోట్ల రూపాయలు రిస్క్ చేయాలి. షూటింగ్ మొదలైన తర్వాత నటీనటులు, దర్శకుడు, టెక్నీషియన్లు, లొకేషన్లు, సెట్స్, పోస్ట్ ప్రొడక్షన్.. ఇలా ప్రతి స్టేజ్ లో కూడా ఖర్చు ఉంటుంది.

సినిమా పూర్తయ్యాక మరో పెద్ద టెన్షన్ మొదలవుతుంది. థియేటర్లు దొరకాలి. ప్రేక్షకుల వరకు సినిమాను తీసుకెళ్లాలి. ప్రమోషన్స్ చేయాలి. చివరకు సినిమా రిజల్ట్ ఎలా ఉంటుందో విడుదల వరకు ఎవరికీ తెలియదు. అంటే నిర్మాతకు సినిమా అనేది కేవలం డబ్బు ఇన్వెస్ట్మెంట్ కాదు. అది ఒక నమ్మకం. ఒక కథను నమ్మి డబ్బు పెట్టడం.. ఒక టీమ్‌ ను నమ్మి సినిమా మొదలుపెట్టడం.. విడుదల తర్వాత ప్రేక్షకులు ఆదరిస్తారని ఆశించడం.

ఆ నమ్మకం నిలబడితే మరో సినిమా చేయాలనే ధైర్యం వస్తుంది. అదే వరుసగా దెబ్బతింటే మాత్రం నిర్మాత వెనక్కి తగ్గే పరిస్థితి వస్తుంది. ఇక్కడే అసలు సమస్య మొదలవుతుంది. నిర్మాతలు సినిమాలు చేయకపోతే దర్శకులకు అవకాశాలు తగ్గుతాయి. కొత్త హీరోలు, హీరోయిన్లు పరిచయం కావడం తగ్గుతుంది. టెక్నీషియన్లకు పనులు తగ్గుతాయి. షూటింగ్ నుంచి థియేటర్లు వరకు ఆధారపడిన ఎంతోమందిపై ఎఫెక్ట్ పడుతుంది. అందుకే నిర్మాత సమస్య అనేది ఒక్క వ్యక్తి సమస్యగా చూడలేం.

ముఖ్యంగా కొత్త నిర్మాతల పరిస్థితి వేరేలా ఉంది. ఇండస్ట్రీలోకి కొత్తగా వచ్చి సినిమా చేయాలంటే ముందుగా పెట్టుబడి పెట్టే ధైర్యం ఉండాలి. సినిమా పూర్తయిన తర్వాత దానికి సరైన థియేటర్లు దొరుకుతాయనే నమ్మకం కూడా ఉండాలి. సినిమా బాగుంటే ప్రేక్షకుల వరకు తీసుకెళ్లే అవకాశం ఉంటుందనే భరోసా ఉండాలి. ఇవేవీ లేకపోతే కొత్తవాళ్లు ఎందుకు రిస్క్ చేస్తారు? ఇదే విషయాన్ని ఇంద్రజ కూడా తన మాటల్లో చెప్పే ప్రయత్నం చేశారు.

అందుకే ఇప్పుడు ఇండస్ట్రీలో నిర్మాతల నమ్మకాన్ని నిలబెట్టడం ముఖ్యం. హీరోలు, దర్శకులు, టెక్నీషియన్లు ఎంత ముఖ్యమో.. వాళ్లందరినీ కలిపే డబ్బులు పెట్టే నిర్మాత కూడా అంతే ముఖ్యం. నిర్మాత హ్యాపీగా ఉంటేనే కొత్త సినిమాలు వస్తాయి. కొత్త సినిమాలు వస్తేనే కొత్త టాలెంట్ కు అవకాశాలు వస్తాయి. అందుకే నిర్మాతకు నమ్మకం పోకుండా చూడటం అంటే.. ఇండస్ట్రీ ఫ్యూచర్ పై నమ్మకాన్ని కాపాడుకోవడమే.