ఘోస్ట్ ప్రిన్సెస్ ఎవ‌రో తెలుసా? ప్రియానిక్ హ్యాలోవీన్ సంద‌డి!

మ‌నిషి లైఫ్ స్పాన్ చాలా చిన్న‌ది. ఇలాంటి చిన్న జీవితాన్ని వీలున్నంత‌గా ఆస్వాధించ‌డం ముఖ్యం. నిరంతరం ఫ్యామిలీ లైఫ్‌ను సెలబ్రేట్ చేసుకోవడం అనేది కొందరికే సాధ్యమవుతుంది. అలాంటి ఒక అందమైన జంటగా ప్రియానిక్ నెటిజన్ల మనసు దోచుకుంటోంది. ప్రియాంక చోప్రా - నిక్ జోనాస్ జంట ప్రపంచవ్యాప్తంగా ఎందరికో ఆదర్శంగా నిలిచింది. పెళ్ల‌యిన ప్రారంభంలోనే తమ వివాహ బంధంపై ఎన్నో రూమర్లు పుట్టుకొచ్చినా.. అవన్నీ పటాపంచలు చేస్తూ కాలానికి ఎదురొడ్డి ఈ జంట నిలిచింది. శత్రువుల దుష్ప్రచారాలకు అతీతంగా ఆదర్శవంతమైన కుటుంబ జీవనానికి పరమార్ధాన్ని చెబుతోంది. కుమార్తె మాల్తీ మేరీ ప్ర‌వేశంతో ఈ జంట మ‌రింత ప‌క‌డ్భంధీగా ప్ర‌తిదీ ప్లాన్ చేస్తోంది. మాల్తీతో కలిసి ఈ జోడీ చేసుకునే ప్రతీ వేడుకకు సంబంధించిన ఫోటోలు, వీడియోలు సోషల్ మీడియాలో నిరంతరం హాట్ టాపిక్‌గా మారుతూనే ఉంటాయి.

తాజాగా ఈ గ్లోబల్ బ్యూటీ షేర్ చేసిన‌ హ్యాలోవీన్ వేడుకల ఫోటోలు నెట్టింట విపరీతంగా వైరల్ అవుతున్నాయి. లాస్ ఏంజిల్స్‌లోని తమ నివాసంలో భర్త నిక్ జోనాస్, కుమార్తె మాల్టీ మేరీలతో కలిసి హ్యాలోవీన్ పండుగను ప్రియాంక ఎంతో వైవిధ్యంగా జరుపుకున్నారు. ఈ వేడుకల ఫోటోలను షేర్ చేస్తూ.. ``ఒక కౌబాయ్.. ఓ ఘోస్ట్ ప్రిన్సెస్.. కింగ్ కైలీ.. అందరూ కలిసి ట్రిక్ ఆర్ ట్రీట్ కి వెళ్లారు. హ్యాలోవీన్ జరుపుకుంటున్న అందరికీ శుభాకాం

క్షలు`` అంటూ ప్రియాంక సరదాగా క్యాప్షన్ ఇచ్చారు. పశ్చిమ దేశాల హ్యాలోవీన్‌తో పాటు తమ ఇంట్లో భారతీయ సాంప్రదాయం ప్రకారం చేసుకుంటున్న దీపావళి డెకరేషన్‌ను కూడా చూపిస్తూ #diwaloween అనే ప్రత్యేక హాష్‌ట్యాగ్‌ను జత చేశారు.

ఈ వేడుకల్లో ప్రధాన ఆకర్షణగా నిలిచినవి వారి కాస్ట్యూమ్స్. నిక్ జోనాస్ `కౌబాయ్` లుక్‌లో దర్శనమివ్వగా.. చిన్నారి మాల్తీ మేరీ `ఘోస్ట్ ప్రిన్సెస్` గెటప్‌లో అమాయకంగా అలరించింది. ప్రియాంక చోప్రా `కింగ్ కైలీ` అవతారంలో మెరిసారు. ఒకవైపు హ్యాలోవీన్ గెటప్స్, మరోవైపు బ్యాక్‌గ్రౌండ్‌లో దీపావళి కాంతుల డెకరేషన్ కొట్టొచ్చినట్లు కనిపిస్తుండటంతో ఎన్ఆర్ఐ సంస్కృతిని.. విదేశాల్లోనూ భారతీయ పండుగ వాతావరణాన్ని వారు కొనసాగిస్తున్న తీరుపై నెటిజన్లు ప్రశంసలు కురిపిస్తున్నారు. హ్యాలోవీన్, దీపావళి ఒకే సమయంలో రావడంతో అభిమానులు ఈ వేడుకను `దివాలోవీన్` అని కొనియాడుతూ ట్రెండ్ చేస్తున్నారు.

ఇక హాలీవుడ్, బాలీవుడ్ ప్రాజెక్ట్‌లతో నిరంతరం బిజీగా ఉండే ప్రియాంక చోప్రా కెరీర్ విషయానికి వస్తే.. 2026లో పీసీ నటించిన గ్లోబల్ యాక్షన్ థ్రిల్లర్ `ది బ్లఫ్` అమెజాన్ ప్రైమ్ వీడియో ద్వారా ప్రేక్షకుల ముందుకు వచ్చి విశేష ఆదరణ పొందింది. దీనితో పాటు ఇల్యా నైషుల్లర్ దర్శకత్వంలో జాన్ సీనాతో కలిసి నటించిన భారీ హాలీవుడ్ ప్రాజెక్ట్ `హెడ్స్ ఆఫ్ స్టేట్`లో పీసీ న‌ట‌న‌కు మంచి పేరొచ్చింది. గ్లోబల్ స్థాయిలో తనదైన స్టంట్లతో, నటనతో ప్రియాంక హాలీవుడ్‌లో సరికొత్త రికార్డులను నమోదు చేస్తోంది.

వీటన్నింటినీ మించి టాలీవుడ్ జానపద-అడ్వెంచర్ ప్రాజెక్ట్ `వారణాసి` ప్రియాంక సౌత్ కెరీర్‌కే కాకుండా గ్లోబల్ ఇమేజ్‌కి బిగ్గెస్ట్ `గేమ్ ఛేంజర్` కాబోతోందనడంలో ఎలాంటి సందేహం లేదు. ద‌ర్శ‌క‌ధీరుడు ఎస్.ఎస్. రాజమౌళి దర్శకత్వంలో సూపర్ స్టార్ మహేష్ బాబు కథానాయకుడిగా నటిస్తున్న ఈ పాన్-వరల్డ్ చిత్రంలో ప్రియాంక చోప్రా మందాకిని అనే కీలక పాత్రలో నటిస్తున్నారు. 2027 ఏప్రిల్‌లో భారీ ఎత్తున విడుదల కానున్న ఈ విజువల్ వండర్ భారతీయ చిత్రసీమ చరిత్రలోనే అత్యంత భారీ బడ్జెట్‌తో తెరకెక్కుతోంది. రాజమౌళి విజన్, మహేష్ బాబు స్టార్‌డమ్‌లతో పాటు ప్రియాంక అంతర్జాతీయ గుర్తింపు ఈ సినిమాకి తోడవ్వడం స్థాయిని అమాంతం పెంచేసింది. భారతీయ సినిమా ప్రమాణాలను మార్చివేసే స‌త్తా ఉన్న‌ ఈ చిత్రం ప్రియాంక చోప్రా కెరీర్‌లోనే ఒక మైలురాయిగా నిలవడం ఖాయంగా కనిపిస్తోంది.