ప్రదీప్ రంగనాథన్.. మళ్లీ అదే రూట్లో..

తమిళ ఇండస్ట్రీలో సెన్సేషన్ క్రియేట్ చేసిన పేరు ప్రదీప్ రంగనాథన్. 'లవ్ టుడే' సినిమాతో ఒక్కసారిగా సౌత్ ఇండియా మొత్తం తన వైపు చూసేలా చేసుకున్నాడు. ఆ సినిమాతో దర్శకుడిగా, హీరోగా డ్యూయల్ రోల్ లో అద్భుతమైన విజయాన్ని అందుకున్నాడు. అయితే ఆ తర్వాత దర్శకత్వాన్ని పక్కన పెట్టి పూర్తిగా నటనపైనే ఫోకస్ పెట్టాడు. ఇప్పుడు మళ్ళీ తన పాత రూట్ లోకి వచ్చి డైరెక్షన్ చేయడానికి రెడీ అవుతున్నట్లు తెలుస్తోంది.

లవ్ టుడే తర్వాత ప్రదీప్ హీరోగా బిజీ అయిపోయాడు. డ్రాగన్, డ్యూడ్ వంటి సినిమాలతో వరుస విజయాలను అందుకున్నాడు. ఎల్ఐకే అనే సినిమా కూడా త్వరలోనే రానుంది. కేవలం దర్శకుడిగానే కాకుండా, ఒక పక్కా కమర్షియల్ హీరోగా కూడా తాను పనికివస్తానని ఈ సినిమాలతో నిరూపించుకున్నాడు. కానీ అభిమానులు మాత్రం ఆయనలోని దర్శకుడిని చాలా మిస్ అవుతున్నారు.

అప్పట్లో చిన్న సినిమాగా వచ్చిన లవ్ టుడే బాక్సాఫీస్ దగ్గర ఏకంగా 100 కోట్లు వసూలు చేసింది. యూత్ పల్స్ పట్టుకోవడంలో ప్రదీప్ కు ఉన్న టాలెంట్ ఏంటో ఆ సినిమా చూపించింది. తన బాడీ లాంగ్వేజ్ కు తగ్గట్టుగా కథను రాసుకుని, దాన్ని తెరకెక్కించే విధానం ప్రేక్షకులకు బాగా నచ్చింది. అందుకే ఇప్పుడు మళ్ళీ ఆయన మెగా ఫోన్ పడితే చూడాలని ఆశపడుతున్నారు.

లేటెస్ట్ గా అందుతున్న సమాచారం ప్రకారం ప్రదీప్ రంగనాథన్ మళ్ళీ ఏజీఎస్ బ్యానర్ లో సినిమా చేయబోతున్నాడు. లవ్ టుడే సినిమాను నిర్మించింది కూడా వీరే కావడం విశేషం. ఈ సక్సెస్ ఫుల్ కాంబినేషన్ మళ్ళీ రిపీట్ కాబోతోంది. ఈ సినిమాలో కూడా ప్రదీప్ హీరోగా నటిస్తూనే, దర్శకత్వం బాధ్యతలు కూడా చేపట్టబోతున్నాడు.

సాధారణంగా దర్శకులు హీరోలుగా మారిన తర్వాత డైరెక్షన్ వైపు చూడటం చాలా అరుదు. నటనలో వచ్చే క్రేజ్, రెమ్యూనరేషన్ చూసి అక్కడే సెటిల్ అయిపోతారు. కానీ ప్రదీప్ మాత్రం అలా కాకుండా మళ్ళీ కథ, స్క్రీన్ ప్లే, దర్శకత్వం బాధ్యతలు తీసుకోవడం నిజంగా సాహసమే. తన విజన్ ను తానే స్వయంగా తెరకెక్కిస్తే అవుట్ పుట్ ఇంకా స్ట్రాంగ్ గా ఉంటుందని ఆయన నమ్ముతున్నట్లున్నాడు.

ప్రస్తుతం స్క్రిప్ట్ పనులు జరుగుతున్నాయని, 2026లో ఈ సినిమాను విడుదల చేసేలా ప్లాన్ చేస్తున్నారని టాక్. లవ్ టుడే లాంటి మ్యాజిక్ ను మరోసారి రీ క్రియేట్ చేయడానికి ప్రదీప్ సిద్ధమవుతున్నాడు. వరుసగా నటుడిగా హిట్లు కొట్టిన ప్రదీప్, ఈసారి దర్శకుడిగా ఎలాంటి సంచలనం సృష్టిస్తాడో చూడాలి.