రీమేక్‌లలో కింగ్… గిన్నిస్‌లో చోటు సంపాదించిన సినిమా!

సాధారణంగా ఒక భాషలో సూపర్ హిట్ అయిన సినిమాను మరో రెండు మూడు భాషల్లో రీమేక్ చేయడం మనం చూస్తుంటాం. కానీ, ఒకే ఒక సినిమా ఏకంగా 27 సార్లు వేర్వేరు భాషల్లో రీమేక్ అయిందంటే నమ్ముతారా? వినడానికి వింతగా ఉన్నా ఇది అక్షరాలా నిజం! అత్యధిక సార్లు రీమేక్ అయిన చిత్రంగా ఈ సినిమా 'గిన్నిస్ బుక్ ఆఫ్ వరల్డ్ రికార్డ్స్'లో కూడా స్థానం సంపాదించుకుంది. సినిమా లవర్స్ అందరినీ ఆశ్చర్యపరుస్తున్న ఆ సినిమా విశేషాలు చూద్దాం.

ఇంతకీ ఏంటా సినిమా?: ప్రపంచవ్యాప్తంగా సంచలనం సృష్టించిన ఆ సినిమా పేరు 'పర్ఫెక్ట్ స్ట్రేంజర్స్'. ఇది 2016లో విడుదలైన ఒక ఇటాలియన్ సైకలాజికల్ కామెడీ-డ్రామా చిత్రం. దర్శకుడు పాలో జెనోవేస్ అద్భుతమైన కాన్సెప్ట్‌తో ఈ సినిమాను తెరకెక్కించారు. ఇక రిలీజైన సమయంలో ఈ ఇటాలియన్ మూవీకి ప్రేక్షకుల నుండి, విమర్శకుల నుండి సాలిడ్ రెస్పాన్స్ వచ్చింది. దాంతో ప్రపంచవ్యాప్తంగా ఉన్న మేకర్స్ కన్ను ఈ కథపై పడింది.

ఆసక్తి రేకెత్తించే సినిమా కథేంటి?:

ఈ సినిమా కథ చాలా సింపుల్‌గా, అంతే ఇంట్రెస్టింగ్‌గా ఉంటుంది. ఏడుగురు పాత స్నేహితులు ఒక రాత్రి డిన్నర్ కోసం ఒకచోట కలుస్తారు. సరదాగా గడుపుతున్న సమయంలో వారికి ఒక ఆలోచన వస్తుంది. అందరూ కలిసి ఒక ఆట ఆడదాం అనుకుంటారు. ఇక ఆ గేమ్ రూల్ ఏంటంటే.. ఆ రాత్రి ఎవరి ఫోన్‌కి ఏ మెసేజ్, ఈమెయిల్, లేదా ఫోన్ కాల్ వచ్చినా.. దాన్ని దాచకుండా అందరి ముందు ఓపెన్ చేయాలి, స్పీకర్‌ ఆన్ చేసి మాట్లాడాలి. ఈ చిన్న ఆట వల్ల వారి వ్యక్తిగత జీవితాల్లో దాగి ఉన్న అసలు బండారాలన్నీ బయటపడి, అందరి జీవితాలు ఎలా తలక్రిందులయ్యాయి అనేదే ఈ మూవీ స్టోరీ.

గిన్నిస్ బుక్ ఆఫ్ వరల్డ్ రికార్డ్స్:

ఈ ఒక్క చిన్న పాయింట్ ప్రేక్షకులను సీట్ ఎడ్జ్‌లో కూర్చోబెట్టింది. మనుషుల రహస్యాల వెనుక ఉన్న సైకాలజీని ఈ సినిమా చూపించిన తీరు అందరికీ నచ్చింది. దాంతో స్పానిష్, టర్కిష్, ఫ్రెంచ్, కొరియన్, రష్యన్ వంటి ఎన్నో అంతర్జాతీయ భాషల్లో ఈ సినిమాను రీమేక్ చేశారు. అలా ఇప్పటివరకు ఏకంగా 27 సార్లు రీమేక్ కావడంతో.. చరిత్రలోనే అత్యధిక సార్లు రీమేక్ అయిన సినిమాగా ఇది గిన్నిస్ రికార్డును సొంతం చేసుకుంది.

మన ఇండియన్ భాషల్లో కూడా:

ఈ కథాంశం మన దేశంలోనూ పలు సినిమాలకు బేస్‌గా నిలిచింది. తెలుగులో ఈ కాన్సెప్ట్‌ను ఆధారంగా చేసుకుని 'రిచి గాడి పెళ్లి' అనే సినిమా వచ్చింది. అలాగే, మలయాళ మెగాస్టార్ మోహన్ లాల్, జీతూ జోసెఫ్ కాంబినేషన్‌లో వచ్చిన సూపర్ హిట్ మూవీ '12త్ మ్యాన్' కూడా ఇదే తరహా పాయింట్‌తో నడుస్తుంది. ఇక బాలీవుడ్ స్టార్ హీరో అక్షయ్ కుమార్ నటించిన 'ఖేల్ ఖేల్ మే' సినిమా కూడా ఈ ఇటాలియన్ చిత్రానికి అఫీషియల్ రీమేక్ కావడం విశేషం.

భాషలు వేరైనా, మనుషుల ఎమోషన్స్ మరియు వారి ఫోన్ సీక్రెట్స్ అన్నీ ఒక్కటే అని 'పర్ఫెక్ట్ స్ట్రేంజర్స్' నిరూపించింది. అందుకే ఈ కథ గ్లోబల్ లెవెల్‌లో అంతలా కనెక్ట్ అయింది. ఒక మంచి పాయింట్ ఉంటే చాలు.. భారీ బడ్జెట్, గ్రాఫిక్స్ లేకపోయినా ప్రపంచ రికార్డులు సృష్టించవచ్చని ఈ సినిమా నిరూపించింది. సినిమా ప్రేమికులు ఖచ్చితంగా చూడాల్సిన మాస్టర్ పీస్ ఇది.