ప‌వ‌న్‌క‌ల్యాణ్ 'ఉస్తాద్..' కోసం రంగంలోకి దిగేనా?

జ‌న‌సేనాని, ప‌వ‌ర్‌స్టార్ ప‌వ‌న్‌క‌ల్యాణ్ ఏపీ డిప్యూటీ సీఎంగా బాధ్య‌త‌లు నిర్వ‌ర్తిస్తూ ఫుల్ జోష్‌తో ఉన్నారు. అదే జోష్‌తో వ‌రుస‌గా పెండింగ్‌లో ఉన్న సినిమాల‌ని చ‌క చక పూర్తి చేస్తూ మునుపెన్న‌డూ లేనంత‌గా అభిమానుల్లో జోష్ నింపుతూ స‌రికొత్త ఉత్సాహాన్ని అందిస్తున్నారు. ఓ ప‌క్క ఏపీ డిప్యూటీ సీఎంగా బాధ్య‌త‌లు నిర్వ‌ర్తిస్తూనే మ‌రో ప‌క్క సినిమాలు వ‌రుస‌గా పూర్తి చేస్తున్నారు. ఏళ్ల త‌ర‌బ‌డి పెండింగ్‌లో ఉన్న `హ‌రి హ‌ర వీర‌మ‌ల్లు` షూటింగ్‌ని పూర్తి చేయ‌డ‌మే కాకుండా దాని కోసం రంగంలోకి దిగి అందిరిని ఆశ్చ‌ర్య ప‌రిచారు.

మూవీ ప్ర‌మోష‌న్స్‌కు ఆమ‌డ దూరం ఉండే ప‌వ‌న్ క‌ల్యాణ్ ఈ సినిమా కోసం ప్ర‌త్యేకంగా ప్ర‌మోష‌న్స్‌లో పాల్గొన‌డం అంద‌రిని ఆశ్చ‌ర్యానికి గురి చేసింది. `హ‌రి హ‌ర వీర‌మ‌ల్లు` ప్ర‌మోష‌న్స్‌ని త‌న భూజ‌ల‌కెత్తుకుని ఎంత వ‌ర‌కు ప్ర‌మోట్ చేయాలో అంత‌వ‌ర‌కు చేసి ప‌వ‌న్ ఇలా కూడా చేస్తాడా? అని అంతా అవాక్క‌య్యేలా చేశారు. ఫ‌లితం ఎలా ఉన్నా ప్రాజెక్ట్ డిలే అయింది కాబ‌ట్టి నిర్మాత ఏ.ఎం.ర‌త్నం న‌ష్ట‌పోకూడ‌ద‌ని త‌న వంతు ఏ మేర‌కు స‌హ‌య స‌హ‌కారాలు అందించాలో అంత వ‌ర‌కు చేసి సినిమాని ప్రేక్ష‌కుల్లోకి తీసుకెళ్లారు.

ఇదే పంథాను `ఓజీ`కి కూడా అనుస‌రించి మ‌రోసారి అందరిని ఆశ్చ‌ర్య‌పరిచారు ప‌వ‌న్‌. సుజీత్ డైరెక్ష‌న్‌లో ప‌వ‌న్‌తో నిర్మాత డీవీవీ దాన‌య్య నిర్మించిన ఈ మూవీ సెప్టెంబ‌ర్ 25న భారీ స్థాయిలో విడుద‌లై ప‌వ‌న్ క‌ల్యాణ్ సినిమాల్లోనే స‌రికొత్త రికార్డులు నెల‌కొల్పింది. వ‌ర‌ల్డ్ వైడ్‌గా ఈ మూవీ దాదాపుగా రూ. 300 కోట్ల మేర వ‌సూళ్ల‌ని రాబ‌ట్టి ప‌వ‌న్ స్టామినాని నిరూపించింది. దీని త‌రువాత ప‌వ‌న్ నుంచి వ‌స్తున్న మూవీ `ఉస్తాద్ భ‌గ‌త్‌సింగ్‌`. హ‌రీష్ శంక‌ర్ డైరెక్ట‌ర్‌.

హ‌రి హ‌ర వీర‌మ‌ల్లు, ఓజీ చిత్రాల త‌ర‌హాలో ఆల‌స్యం అవుతూ వ‌చ్చిన ఈ ప్రాజెక్ట్ ఎట్ట‌కేల‌కు పూర్త‌యింది. ప‌వ‌న్‌కు సంబంధించిన షూటింగ్ పార్ట్ పూర్త‌యింది. బ్యాలెన్స్ వ‌ర్క్ పూర్తి కావాల్సి వుంది. `గ‌బ్బ‌ర్‌సింగ్` వంటి బ్లాక్ బ‌స్ట‌ర్ త‌రువాత హ‌రీష్ శంక‌ర్‌, ప‌వ‌న్‌ల క‌ల‌యిక‌లో రానున్న సినిమా కాబ‌ట్టి `ఉస్తాద్ భ‌గ‌త్‌సింగ్‌`పై భారీ అంచ‌నాలున్నాయి. డిసెంబ‌ర్ నుంచి ప్ర‌మోష‌న్స్ మొద‌లు పెట్టాల‌ని ద‌ర్శ‌కుడు ప్లాన్ చేస్తున్నాడు. ఫస్ట్ సింగిల్‌ని డిసెంబ‌ర్‌లో రిలీజ్ చేస్తున్నామ‌ని రీసెంట్‌గా జ‌రిగిన `12ఏ రైల్వేకాల‌నీ` మూవీ ఈవెంట్‌లో వెల్ల‌డించారు.

వ‌చ్చే ఏడాది ప్ర‌ధ‌మార్థంలో ఈ మూవీని రిలీజ్ చేయాల‌ని ప్లాన్ చేస్తున్నారు. అయితే హ‌రి హ‌ర వీర‌మ‌ల్లు, ఓజీ చిత్రాల ప్ర‌మోష‌న్స్‌లో పాల్గోని ఫ్యాన్స్‌లో జోష్ పెంచిన ప‌వ‌న్ క‌ల్యాణ్ `ఉస్తాద్ భ‌గ‌త్‌సింగ్‌` మూవీ ప్ర‌మోష‌న్స్‌లోనూ పాల్గొంటారా? అంత టైమ్ కేటాయిస్తారా? అన్న‌ది ఇప్పుడు చ‌ర్చ‌నీయాంశంగా మారింది. ఫ్యాన్స్ కూడా ప‌వ‌న్ `ఉస్తాద్‌` ప్ర‌మోష‌న్స్‌ని కూడా ముందుండి న‌డిపిస్తారా? లేక టీమ్‌కే వ‌దిలేస్తారా? అని చ‌ర్చించుకుంటున్నారు. ప‌వ‌న్ వ‌స్తే వ‌చ్చే మైలేజీ వేరుగ ఉంటుంద‌ని, త‌ను ప్ర‌మోష‌న్స్‌లో పాల్గొనాల‌ని అంతా ఆశ‌గా ఎదురు చూస్తున్నారు. అంతా ఆశ‌ప‌డుతున్న‌ట్టే `ఉస్తాద్‌..` కోసం ప‌వ‌న్ రంగంలోకి దిగుతాడా? అన్న‌ది తెలియాలంటే వేచి చూడాల్సిందే.