ఉస్తాద్ కు నష్టం.. పవన్ కళ్యాణ్ స్టామినా తగ్గుతోందా?

పవర్ స్టార్ పవన్ కళ్యాణ్ అంటేనే రికార్డుల వేట.. సినిమా ఫ్లాప్ అయినా వసూళ్ల వర్షం కురిపించే ఆయన క్రేజ్ ఇప్పుడు సవాళ్లను ఎదుర్కొంటోంది. 'ఓజీ'తో గర్జించిన పవన్, 'ఉస్తాద్ భగత్ సింగ్'తో భారీ డిజాస్టర్‌ను మూటగట్టుకున్నారు. రూ. 100 కోట్ల మార్కును కూడా దాటలేకపోవడం, దాదాపు రూ. 80 కోట్ల నష్టం రావడం ట్రేడ్ వర్గాలను షాక్‌కు గురిచేస్తోంది. అసలు పవర్ స్టార్ స్టామినా తగ్గుతోందా? లేక రాజకీయ బిజీ వల్ల సినిమాలపై పట్టు తప్పుతోందా? ఆ విశ్లేషణ చూద్దాం..

ఉస్తాద్ దెబ్బ.. బాక్సాఫీస్ వద్ద నష్టం:

పవన్ కళ్యాణ్, హరీష్ శంకర్ కాంబినేషన్ అంటే 'గబ్బర్ సింగ్' రేంజ్ అంచనాలు ఉంటాయి. కానీ, 'ఉస్తాద్ భగత్ సింగ్' ఆ అంచనాలను ఏమాత్రం అందుకోలేకపోయింది. సినిమా కథలో పస లేకపోవడం, కేవలం రొటీన్ మాస్ ఎలివేషన్లకే పరిమితం అవ్వడంతో ప్రేక్షకులు ముఖం చాటేశారు. దీంతో ఓపెనింగ్స్ బాగున్నా, లాంగ్ రన్‌లో సినిమా నిలబడలేకపోయింది. ఫలితంగా డిస్ట్రిబ్యూటర్లకు, నిర్మాతలకు సుమారు రూ. 80 కోట్ల వరకు నష్టం వాటిల్లిందని ట్రేడ్ లెక్కలు చెబుతున్నాయి. ఒకప్పుడు ఓ డైరెక్టర్ పవన్ ప్లాప్ సినిమా కలెక్షన్ మరో హీరో హిట్ మూవీ కలెక్షన్ కు సమానం అని అన్నారు ..మరి ఇప్పుడు పవన్ సినిమా కనీసం రూ. 100 కోట్ల గ్రాస్ సాధించకపోవడం ఆయన కెరీర్‌లోనే ఒక పెద్ద మాయని మచ్చగా మిగిలిపోనుంది.

పార్ట్ టైమ్ హీరో.. పాతకాలపు మేకింగ్:

ఒకప్పుడు పవన్ కళ్యాణ్ సినిమా కోసం ప్రాణం పెట్టేవారు. కానీ ఇప్పుడు ఆయన రాజకీయాల్లో అత్యంత బిజీగా ఉండటంతో సినిమాలకు కేవలం కొన్ని రోజులు మాత్రమే కేటాయిస్తున్నారు. దీనివల్ల షూటింగ్స్ హడావిడిగా జరుగుతున్నాయి. 'ఉస్తాద్' సినిమాలో పవన్ లుక్స్ చూస్తే ఆయన అలసట స్పష్టంగా కనిపిస్తోందని ఫ్యాన్స్ కూడా పెదవి విరుస్తున్నారు. నాసిరకం గ్రాఫిక్స్, పాతకాలపు ఫైట్ సీక్వెన్స్‌లు ప్రేక్షకులకు బోర్ కొట్టించాయి. ముఖ్యంగా రణ్‌వీర్ సింగ్ నటించిన ‘ధురందర్ 2’ లాంటి అంతర్జాతీయ స్థాయి యాక్షన్ సినిమాల ముందు, ఉస్తాద్ కంటెంట్ చాలా బలహీనంగా అనిపించింది.

తగ్గుతున్న ఒరిజినాలిటీ:

ఇక పవన్ కళ్యాణ్ కెరీర్ ప్రారంభంలో 'తొలిప్రేమ', 'ఖుషి' లాంటి ఒరిజినల్ కథలతో ట్రెండ్ సెట్ చేశారు. కానీ గత పదేళ్లుగా ఆయన వరుసగా 'వకీల్ సాబ్', 'భీమ్లా నాయక్', 'బ్రో' వంటి రీమేక్ సినిమాలే చేస్తున్నారు. సొంతంగా ఒక కొత్త కథతో ప్రయోగం చేసే ధైర్యం పవన్‌లో తగ్గిపోయిందా? అన్న అనుమానం ఇండస్ట్రీ వర్గాల్లో మొదలైంది.ఇక ప్రతిదీ రీమేక్ కావడం వల్ల ఆయనలోని ఒరిజినాలిటీ మిస్ అవుతోందని, అందుకే ఆడియన్స్ కూడా పవన్ సినిమాలను గతంలో అంత సీరియస్‌గా తీసుకోవడం లేదనే విమర్శలు వినిపిస్తున్నాయి. క్రేజ్ మాత్రమే ఉంటే సరిపోదని, సరైన కంటెంట్ కూడా ఉండాలని ఉస్తాద్ నిరూపించింది.

పవన్ నెక్స్ట్ స్టెప్ ఏంటి?:

పవన్‌ కళ్యాణ్‌కు ఉన్న ఫ్యాన్ బేస్ అజేయమైనది, కానీ మారిన కాలానికి అనుగుణంగా ఆయన సినిమాల ఎంపిక ఉండాలి. రాజకీయ బాధ్యతల వల్ల సినిమాలకు న్యాయం చేయలేనప్పుడు ఇక సినిమాలకు స్వస్తి పలకాలని ఒక వర్గం అంటుంటే, 'నేలకి కొట్టిన బంతిలా' పవన్ మళ్ళీ పుంజుకుంటారని ఫ్యాన్స్ భావిస్తున్నారు. ఇక ప్రస్తుతం ఆయన ఆశలన్నీ సురేందర్ రెడ్డి సినిమా పైనే ఉన్నాయి. మరి పవన్ తన తప్పులను సరిదిద్దుకుని మళ్ళీ బాక్సాఫీస్ సునామీ సృష్టిస్తారా లేక ఈ పరాజయాలతో కెరీర్ గ్రాఫ్ పడిపోతుందా అన్నది కాలమే నిర్ణయించాలి.